ەكسپو-2017 حالىقارالىق مامانداندىرىلعان كورمەسىنىڭ سوڭعى كۇنى. شارا ادەتتەگىدەي, ەسىگىن ايقارا اشىپ, كەلۋشىلەردى قابىلداپ, شەرۋ ءوتتى.
كورمەنىڭ العاشقى كۇندەرى تكورەرمەندەر سانى 20-30 مىڭنىڭ شاماسىندا بولسا, اقىرعى تاۋلىكتەردە بۇل كورسەتكىش بەس ەسەگە دەيىن كوبەيىپ, ءجۇز مىڭنان اسىپ جىعىلدى. ەكسپو-نىڭ جابىلۋ سالتاناتى كەشەن اۋماعىنداعى امفيتەاتردا ۇيىمداستىرىلدى. وندا الدىمەن DJ Timofei مەن نۇربەرگەن ماحامبەتوۆ سىندى ەسترادا انشىلەرى, «Americano», «Holliwood» قاتارلى توپتار مەيماندارعا كوتەرىڭكى كوڭىل-كۇي سىيلاپ, كونتسەرت قويدى.
سودان كەيىن ساحناداعى الىپ ەكرانداردان ەكسپو كورمەلەرىنىڭ تاريحى كورسەتىلدى. وندا ادامزات بالاسىنىڭ جەتكەن جەتىستىكتەرى, اتاپ ايتقاندا اۆتوكولىكتەن باستاپ, قولىمىزداعى سمارتفوندارعا دەيىنگى ۇزدىك تەحنولوگيالاردىڭ تاريحىنان سىر شەرتىلدى.
ۇيىمداستىرۋشىلار جاس ۇرپاقتىڭ بۋىنى رەتىندە بالانى سوڭعى تەحنولوگيالارمەن بەزەندىرىلگەن ساحناعا شىعارىپ, جاس بۋىننىڭ كوزىمەن كەلەشەكتەن حابار بەرەدى. كوركەم قويىلىمدا كۇن جانە جەل كۇشىمەن بىرگە, سۋ استىنداعى بالدىرلاردان دا ەنەرگيا ءوندىرۋدىڭ تەحنولوگياسى ايشىقتالعان.
سونداي-اق, ءححى عاسىردىڭ كرەاتيۆتى جوباسى – بولاشاقتىڭ ۆاكۋمدى پويىزىنىڭ جوباسى تانىستىرىلدى. ساعاتىنا 1300 شاقىرىمعا جۇرەتىن كەلەشەكتىڭ كولىگىنىڭ جوباسىنىڭ اۆتورى – اتاقتى امەريكالىق ونەرتاپقىش يلون ماسك. پويىزدىڭ سىناعى اقش-تا وتكىزىلگەن. قازىرگى ۋاقىتتا ونى ىسكە اسىرۋ جوباسى قولعا الىنۋدا. بۇل پويىز كەلەشەكتە الماتى مەن استانا ارالىعىن 45 مينۋتتا ءجۇرىپ وتەدى.
شارادا سونداي-اق, ءار ادامنىڭ قادامىنان, وسىمدىكتەردەن وندىرىلەتىن ەنەرگيانىڭ جوبالارى تانىستىرىلدى. ۇيىمداستىرۋشىلار قويىلىم ارقىلى قاراپايىم گۇلدىڭ سمارتفوندى قۋاتتاي الاتىنىن كورسەتكەن. دەمەك, قورشاعان ورتا ەنەرگيانىڭ كوزىنە اينالادى. تەرەزەدەگى گۇل ءۇيدىڭ كوركىنە اينالىپ قانا قويماي, شاڭىراققا جارىق بەرە الادى. ەكولوگيالىق تازا ەنەرگيالار قورشاعان ورتا ارقىلى ارنايى قويماعا جينالىپ, حالىققا قىزمەت ەتپەك.
اسحات رايقۇل, "ەگەمەن قازاقستان"