بۇگىن ەلوردادا مەملەكەت باسشىسى نۇرسۇلتان نازارباەۆتىڭ قاتىسۋىمەن يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءبىرىنشى ءسامميتى باستالدى. قازاقستان پرەزيدەنتى ءسامميتتىڭ پلەنارلىق وتىرىسىنىڭ اشىلۋ سالتاناتىندا ءسوز سويلەپ, القالى جيىن يسلام تاريحىندا ەرەكشە ءىز قالدىراتىنىنا سەنىم ءبىلدىردى.
- ەگەر تاريحقا جۇگىنەتىن بولساق, يسلام وركەنيەتى ءوز كەزەڭىندە الەمنىڭ نەعۇرلىم دامىعان ورتالىعى بولدى. ول بۇكىل ادامزاتتىڭ وركەندەۋىنە زور ۇلەس قوستى. قازىرگى تسيفرلىق ەكونوميكانىڭ ءۇش تۇعىرى بار. ياعني, ساندار, الگەبرا, الگوريتم. بۇل ءبىر عالىمعا بايلانىستى ەكەنىن اتاپ وتكەن ءجون. ول 12 عاسىر بۇرىن ءبىزدىڭ وڭىردە امۋداريانىڭ سالاسىندا تۋعان مۇحاممەد يبن مۇسا ءال-حورەزمي بولاتىن. الگوريتم تەرمينى ءال-حورەزمي ەسىمىنىڭ لاتىن تىلىندەگى ترانسكريپتسياسى بولىپ تابىلادى. قازىر دامۋدىڭ جاڭا ۇيىمداستىرۋشىلىق ساتىسىنا وتۋگە مۇمكىندىك تۋدى, ونى پايدالانۋىمىز كەرەك. پايعامبارىمىزدىڭ حاديستەرىندە مىناداي جولدار بار: «كىمدە-كىم ءبىلىم ىزدەۋ جولىنا تۇسسە, اللا تاعالا ونىڭ جانناتقا بارۋ جولىن جەڭىلدەتەدى,– دەدى ەلباسى.
مەملەكەت باسشىسى اتاپ وتكەندەي, يسلام بۇگىندە قارقىندى دامىپ كەلە جاتقان ءدىن. ءححى عاسىردا ول الەمدەگى ەڭ كوپ تاراعان دىنگە اينالادى. پايعامدار حاديسىندە «بەسىكتەن قابىرگە دەيىن ءبىلىم ىزدەىدەپ» دەپ ايتىلعان. ولاي بولسا, ءبىزدىڭ باستى مىندەتىمىز يسلام وركەنيەتىنە قىزمەت ەتەتىن جاڭا يدەيالاردى جۇزەگە اسىراتىن ينتەللەكتۋالدى جاڭا ەليتانى تاربيەلەۋ.
ارنۇر اسقاروۆ, «ەگەمەن قازاقستان»