قازاقستان رەسپۋبليكاسىنىڭ سىرتقى ىستەر ءمينيسترى قايرات ءابدىراحمانوۆ ۇلىبريتانيا جانە سولتۇستىك يرلانديا قۇراما كورولدىگى ەۋروپا جانە امەريكا ىستەرى جونىندەگى مەملەكەتتىك ءمينيسترى سەر الان دانكانمەن كەزدەسۋ وتكىزدى, دەپ حابارلادى ءسىم-ءنىڭ ءباسپاسوز قىزمەتى.
كەزدەسۋ بارىسىندا تاراپتار ەلدەرىمىز اراسىندا قالىپتاسقان ستراتەگيالىق سەرىكتەستىك ماتىنىندە ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى. ساۋدا-ەكونوميكالىق جانە ينۆەستيتسيالىق ىنتىماقتاستىق سالاسىندا قول جەتكىزىلگەن ۋاعدالاستىقتاردىڭ ىسكە اسىرىلۋىنا ەرەكشە كوڭىل ءبولىندى. «استانا» حالىقارالىق قارجى ورتالىعىنىڭ ءساتتى تۇردە ىسكە قوسىلۋى ريزاشىلىقپەن اتالىپ كەتتى. بريتاندىق ساياسي قايراتكەر قازاقستاندى ەكسپو-2017 كورمەسىن ويداعىداي وتكىزگەنىمەن قۇتتىقتادى. استاناداعى ۇلىبريتانيانىڭ پاۆيلونى اتالعان ەلدىڭ بولاشاق ەنەرگياسىنىڭ دامۋىنا قوسىپ وتىرعان ۇلەسى ايقىن.
قازاقستاننىڭ بۇۇ قاۋىپسىزدىك كەڭەسىندەگى تۇراقتى ەمەس مۇشەلىگىن جانە بۇل ماڭىزدى حالىقارالىق قۇرىلىمداعى ەلىمىزدىڭ 2018 جىلى توراعالىعىن ەسكەرە وتىرىپ, حالىقارالىق كۇن ءتارتىبىنىڭ ەڭ وزەكتى ماسەلەلەرى بويىنشا پىكىر الماسىلدى. تاراپتار سيرياداعى احۋالدى, ونىڭ ىشىندە قازاقستان رەسپۋبليكاسى پرەزيدەنتىنىڭ قولداۋىمەن وتەتىن استانا پروتسەسىنىڭ ءتۇرلى اسپەكتىلەرىن ءجىتى قاراستىردى.
بريتان تاراپىنىڭ نازارى تومەن بايىتىلعان ۋران بانكىنىڭ عيماراتىن اشۋ قارساڭىندا مەملەكەت باسشىسىنىڭ يادرولىق قارۋسىزداندىرۋ جانە يادرولىق قارۋدى سىناۋعا تىيىم سالۋ ارقىلى حالىقارالىق بەيبىتشىلىك پەن قاۋىپسىزدىكتى نىعايتۋعا باعىتتالعان جاھاندىق باستامالارىنا اۋدارىلدى.
سونىمەن بىرگە, ءتۇرلى دەڭگەيدە جوسپارلانعان ەكىجاقتى كەزدەسۋلەر مەن ءىس-شارالار كەستەسى, سونداي-اق, بىرقاتار حالىقارالىق قۇرىلىمدارعا سايلاۋ ۇدەرىسى تالقىلاندى.