كورمەدە قىرعىزستاننىڭ ۇلتتىق كۇنى مەرەكەلەندى

قازىرگى تاڭدا كورشىلەس مەملەكەتتە 2018-2040 جىلدارعا ارنالعان ستراتەگيالىق جوبالار نەگىزىندە تۇراقتى دامۋدىڭ ۇلتتىق ستراتەگياسى ازىرلەنۋدە. جاڭا قۇجاتقا سايكەس مەملەكەت الدىندا نەگىزگى ءۇش ماقسات بار: حالىقتىڭ ەكونوميكالىق ءال-اۋقاتى, الەۋمەتتىك امان­دى­عى, ازاماتتاردىڭ قاۋىپسىز جانە قولايلى ورتاسى. بۇل تۋرالى شارانىڭ رەسمي بو­لىمىندە قىرعىز ەلىنىڭ ۆيتسە-پرەمەرى چولپان سۋل­تانبەكوۆا مالىمدەدى. ول جا­ھان­دىق جىلىنۋ ورىن العان زا­ماندا «بولاشاق ەنەرگيا­سى» تاقىرىبىن تۋ ەتكەن استا­ناداعى كورمەنىڭ ماڭىزى زور ەكەنىن دە تىلگە تيەك ەتتى. 

«قازاقستاننىڭ 2012 جى­لى ەكسپو-2017 كورمەسىن وت­كىزۋگە دەگەن ءوتىنىمىنىڭ جەڭىسى مەم­لەكەتتىڭ حالىقارالىق جو­عارى بەدەلىنىڭ تاعى ءبىر دالەلى بولدى. ەكولوگيانىڭ زياندى سال­دارىنان قۇتىلۋ ءۇشىن جاڭ­عىرمالى ەنەرگەتيكانى دامىتۋىمىز قاجەت. كورمە اياسىندا وزىق تاجىريبەمەن الماسۋدىڭ جانە جاڭعىرمالى ەنەرگيا كوزدەرىن قولدانۋ سالاسىندا ىنتىماقتاستىق ورناتۋدىڭ ماڭىزى زور دەپ ويلايمىن. قىرعىزستان ەنەرگەتيكانىڭ تۇراقتى دامۋى ءۇشىن مەم­لەكەتتىك قولداۋ بويىنشا الەمدىك باعىتتى قولدايدى. 

ەنەرگەتيكا – حالىقتىڭ ءومىر ءسۇرۋ دەڭگەيىنە جانە ەكو­نوميكانىڭ بارلىق سەكتورلارىنا تىكەلەي اسەر ەتەتىن سترا­تەگيالىق سالا. ءبىزدىڭ مەملە­كەتىمىزدە اتالعان سالا ءىجو 2 پايىز جانە ونەركاسىپتىك ءوندىرىستىڭ 16 پايىز, رەسپۋبليكالىق بيۋد­جەتتىڭ 10 پايىز كىرىسىن قۇراي­دى», دەدى قىرعىزستان ۆيتسە-پرەمەرى. 

قازاقستان تاراپىنان ءسوز سويلەگەن ۇلتتىق ەكونوميكا ءمينيسترى تيمۋر سۇلەيمەنوۆ مەملەكەتتەر اراسىنداعى دوستىق قارىم-قاتىناس ءوزارا قۇرمەت پەن قىزىعۋشىلىققا نەگىزدەلگەنىن جانە قىرعىزستاننىڭ ەكسپو-2017 كورمەسىنە قاتى­سۋى ونىڭ ايقىن دالەلى ەكەنىن اتاپ ءوتتى. «ەكى ەل اراسىندا جوعارى دەڭگەيدە كەلىسسوزدەر مەن ءتۇرلى جيىندار جۇرگىزىلۋدە. قىرعىزستاننىڭ ۇلتتىق پاۆيلونىن قۇرۋدا ايتارلىقتاي جۇ­مىستار اتقارىلعاندىعى ايقىن. قازاقستان ۇكىمەتى اتىنان جانە جەكە ءوز اتىمنان قىرعىستانعا قولداۋ كورسەتكەنى ءۇشىن جانە استانا قالاسىنداعى ەكسپو-2017 حالىقارالىق مامان­داندىرىلعان كورمەسىنە قاتىسقانى ءۇشىن العىسىمدى بىلدىرەمىن», دەدى مينيستر. 

قىرعىزستان پاۆيلونى جىبەك جولى پلازاسىندا ۇسى­نىلعان. پاۆيلونداعى ينتەراكتيۆتى ەكسپوزيتسيالار كورمە كەلۋشىلەرىنە مەملەكەت تۋرالى اقپارات بەرەدى. سونداي-اق, ەلدىڭ ەكسپورتتىق الەۋەتىن دامىتۋعا, ەنەرگەتيكالىق قاۋىپ­سىزدىكپەن قامتاماسىز ەتۋگە باعىتتالعان جوبالار مەن سۋ ەنەرگەتيكاسى سالالارىنداعى جەتىستىكتەرىمەن تانىستىرادى.