تاۋەلسىزدىك سارايىندا بەلگىلى قوعام قايراتكەرى, ەتنوگراف عالىم وزبەكالى جانىبەكوۆتىڭ 80 جىلدىق مەرەيتويىنا ارنالعان ەتنوگرافيالىق كورمە ءوتتى.
وزاعاڭنىڭ قولىنىڭ تابى قالعان اسىل مۇرالارىنىڭ ءبارىن بىردەي سورەلەرگە قويۋ مۇمكىن بولماعانمەن, تۇلعامەن كەزىندە قىزمەت ىستەگەن, ءتالىم-تاربيەسىن كورگەن شاكىرتتەرىنىڭ ەڭبەكتەرىن كوپشىلىككە تانىستىرعان بۇل كورمە جاستارعا حالقىمىزدىڭ سالت-ءداستۇرى مەن ادەت-عۇرپى تۋرالى مول ماعلۇمات بەرۋىمەن تاعىلىمدى. ونىڭ تىكەلەي اتسالىسۋىمەن قۇرىلعان ىقىلاس اتىنداعى حالىق مۋزىكا اسپاپتارى مۇراجايى مەن ورتالىق مەملەكەتتىك مۋزەيىندە عالىم ەسىمىن تاريحتان وشىرمەيتىن قۇندى دۇنيەلەر جەتكىلىكتى دەسەك, ەتنوگرافيالىق مۇراجايداعى العاشقى كورمەنىڭ وسىنداي عاجاپ تۇلعاعا ارنالۋىنىڭ وزىندە ۇلكەن ءمان بار. تاۋەلسىزدىك سارايىنىڭ قولدانبالى ونەر جانە ەتنوگرافيا گالەرەياسىنىڭ جەتەكشىسى تىلەۋكەش جاۋباسوۆا كەيىنگى جاس بۋىن ءو.جانىبەكوۆ ەڭبەكتەرىمەن سۋسىنداپ ءوسۋى تيىستىگىن تىلگە تيەك ەتسە, عالىممەن بەس جىل بىرگە جۇمىس ىستەگەن شاكىرتتەرىنىڭ ءبىرى, سۋرەتشى, اعاش شەبەرى ءماراش عابدىلماجيتقىزى 1978-1982 جىلدار ارالىعىندا «قازمۋزەيرەستاۆراتسيا» ماماندارى قالپىنا كەلتىرگەن تاريحي جادىگەرلەرمەن تانىستىردى. ولاردىڭ ىشىندە قىزىلوردا مۋزەيىندە ساقتاۋلى قىمىز ىدىستارىنىڭ جيىنتىعى, الماتىداعى دەمالىس پاركىنەن ورىن تەپكەن «تۇلكى مەن كۇلشە» ەرتەگىسىنىڭ كوشىرمەسى, ارىستانباب كەسەنەسىندەگى XV عاسىردان قالعان دىڭگەك, سۋرەتشى نيكولاي حلۋدوۆتىڭ ورىندىعى, جانىبەك باتىردىڭ قىمىز ىشكەن ساپتىاياعى, الىبەك جانگەلدينگە سىيلانعان دومبىرا, ش.ءۋاليحانوۆتىڭ ءىنىسى ماقى جاساعان قىمىز وجاۋ سياقتى ءبىرتالاي اسا باعالى بۇيىمدار بار.
ەتنوگراف عالىمنىڭ قازاق ساحنا ونەرىنە قوسقان ۇلەسى ۇشان-تەڭىز ەكەنىن وسىنداعى ۇلتتىق كيىمدەر ۇلگىسىنەن, مۋزىكالىق اسپاپتاردان كورۋگە بولادى. ەل اۋزىندا ساقتالعان حالىق ءاندەرىنىڭ سيرەك نۇسقالارىن قايتا جاڭعىرتۋدا دا ولشەۋسىز تەر توككەنىنە «شەرتەر», «سازگەن», «ادىرنا», «التىناي», «ارقاس» سەكىلدى ءوزى دۇنيەگە اكەلگەن فولكلورلىق-ەتنوگرافيالىق انسامبلدەرى ءدالەل. ون ساۋساعىنان ونەر تامعان شەبەر-رەستاۆراتورلاردى, زەرگەرلەر مەن قولونەرشىلەردى مۋزەي ىستەرىنە كوپتەپ تارتقانى وسى سالانىڭ بۇگىنگى مايتالماندارى اتقارىپ جاتقان قىرۋار ىستەردەن دە ايقىن اڭعارىلىپ تۇراتىنىن ايتا كەتۋ كەرەك.
قاراشاش توقسانباي.