ءبىز بۇل ەلدەردىڭ بوكسشىلارىن تەگىننەن-تەگىن تۇگەندەپ وتىرعان جوقپىز. ويتكەنى, الەم چەمپيوناتىنداعى قازاقستان قۇراماسىنىڭ نەگىزگى قارسىلاستارى وسى اتالعان ەلدەردىڭ سپورتشىلارى بولماق. شەتەلدىك بوكس ساراپشىلارىنىڭ پىكىرىنشە, نەگىزگى ايقاس قازاقستان, كۋبا, فرانتسيا, رەسەي, ۋكراينا, وزبەكستان جانە ازەربايجان بوكسشىلارىنىڭ اراسىندا وتپەك.
بوكستان ۇلتتىق قۇرامامىزدىڭ باس باپكەرى دە جوعارىدا اتى اتالعان ەلدەردىڭ بىلعارى قولعاپ شەبەرلەرى ءبىزدىڭ بوكسشىلارعا لايىقتى قارسىلىق كورسەتەتىنىن ايتادى. سونداي-اق, باپكەرلەرىمىز بيىلعى دودادان ءتورت-بەس مەدالمەن ورالۋدى جوسپارلاپ وتىر. «قازاقستاندىق بوكسشىلار الەم چەمپيوناتىنىڭ تاريحىندا ەشقاشان جۇلدەسىز ورالعان ەمەس. بيىل دا وسى بيىگىمىزدەن تومەندەمەسەك ەكەن دەيمىز. شاكىرتتەرىم جەكپە-جەككە جانە كەز كەلگەن قارسىلاستى جەڭۋگە تولىق دايىن. مەنىڭشە, بوكسشىلارىمىز كەم دەگەندە ءتورت-بەس مەدال يەلەنەدى. ونىڭ ىشىندە مىندەتتى تۇردە التىن بولادى», – دەيدى باس جاتتىقتىرۋشى مىرزاعالي ايتجانوۆ.
التىن مەدال دەمەكشى, الەم بىرىنشىلىگىنە 1993 جىلدان بەرى قاتىسىپ كەلە جاتقان قازاقستان قۇراماسى وسى ارالىقتا 10 التىن مەدال يەلەنىپتى. تارقاتىپ ايتار بولساق, بولات ءجۇمادىلوۆ 1999 جىلى توپ جارسا, 2003 جىلى گاليب دجافاروۆ (57 كگ) پەن 75 كيلوداعى گەننادي گولوۆكين قارسىلاس شاق كەلتىرمەگەن. اراعا ەكى جىل سالىپ وتانداستارىمىز تاعى دا ەكى التىن جۇلدە يەلەندى. بۇل جولى سەرىك ساپيەۆ (64 كگ) پەن (81 كگ) ەردوس جاڭابەرگەنوۆ ۇزدىك دەپ تانىلدى. 2007 جىلعى دودادا سەرىك ساپيەۆ (64 كگ) ەكىنشى رەت الەم چەمپيونى اتاندى. ال 2013 جىلى الماتىدا وتكەن الەم بىرىنشىلىگىندە وتانداستارىمىز التىن مەدال جاعىنان رەكورد ورناتىپ, ءتورت بىردەي وعلانىمىز جەڭىس تۇعىرىنىڭ ەڭ بيىك ساتىسىنان كورىندى. ولار – ءبىرجان جاقىپ (49 كگ), مەرەي اقشالوۆ (64 كگ), دانيار ەلەۋسىنوۆ (69 كگ) جانە جانىبەك ءالىمحان ۇلى (75 كگ). الەمدىك سىنعا 12 رەت قاتىسقان ۇلتتىق قۇرامامىز جالپى سانى 34 مەدال يەلەنىپتى. ونىڭ 10-ى التىن, ءدال سونداي كۇمىس جانە 14 قولا جۇلدە. 2015 جىلى دوحادا وتكەن سايىستا قازاقستاندىق بىلعارى قولعاپ شەبەرلەرى ەكى كۇمىسپەن شەكتەلگەن بولاتىن.
سونىمەن, گامبۋرگتە 25 تامىز بەن 3 قىركۇيەك اراسىندا وتەتىن الەم چەمپيوناتىنا قازاقستان كومانداسى مىنا قۇرامدا ونەر كورسەتەدى: ەرجان جومارت (49 كگ), ازامات يساقۇلوۆ (52 كگ), قايرات ەراليەۆ (56 كگ), ادىلەت قۇرمەتوۆ (60 كگ), بەكداۋلەت يبراگيموۆ (64 كگ), ابىلايحان ءجۇسىپوۆ (69 كگ), ءابىلحان امانقۇل (75 كگ), ەرىك ءالجانوۆ (81 كگ), ۆاسيلي لەۆيت (91 كگ) جانە قامشىبەك قوڭقاباەۆ (+91 كگ).
ەكى جىل سايىن الەمنىڭ ۇزدىكتەرىن انىقتايتىن بايراقتى باسەكەدە ەل نامىسىن قورعايتىن نامىستى جىگىتتەرىمىزگە ساتتىلىك تىلەيمىز.
ءالي بيتورە, «ەگەمەن قازاقستان»