بۇل شوۋدىڭ القيسساسى ءسال ارىرەكتەن باستالادى. وتكەن جىلدىڭ مامىر ايىندا شەتەلدىك باسىلىمدار مەيۆەزەردىڭ UFC تارلانى ماكگرەگورعا جەكپە-جەك وتكىزۋ تۋرالى ۇسىنىس جاساعانىن, ولاردىڭ 2016 جىلدىڭ جازىندا جۇدىرىقتاسۋى مۇمكىن ەكەنىن جازىپ جاتتى. بىراق, بۇعان ول كەزدە ەشكىم سەنە قويعان جوق ەدى. كوپشىلىك مۇنى مەيۆەزەردىڭ ءىشى پىسقان كەزىندەگى كەزەكتى ءبىر اڭگىمەسى شىعار دەگەن بولاتىن. ەل اراسىنداعى گۋ-گۋ اڭگىمەگە UFC پرەزيدەنتى دەين ۋايتتىڭ «ماكگرەگورمەن كەزدەسۋ وتكىزگىڭ كەلسە, ماعان حابارلاس», دەپ مەيۆەزەرگە ايتقانى وتقا ماي قۇيا ءتۇستى.
ءسويتىپ, ءبىر جىلدىق ءسوز قاعىسۋدان كەيىن كاسىپقوي بوكس پەن ارالاس جەكپە-جەكتىڭ قارجىلاي «ماگناتتارى» 15 ماۋسىم كۇنى فلويد مەيۆەزەر مەن يرلانديالىق كونور ماكگرەگوردىڭ 26 تامىز كۇنى جەكپە-جەك وتكىزۋگە كەلىسكەندەرىن جاريالادى. ءبىر قىزىعى, ەكى سپورت وكىلىنىڭ ءبىر-بىرىمەن كەزدەسۋى تاريحتا ەكىنشى رەت قايتالانىپ وتىر. 1976 جىلدىڭ 26 ماۋسىمىندا اتى اڭىزعا اينالعان ايگىلى بوكسشى مۇحاممەد ءالي مەن جاپونيالىق رەستلەر جانە كاراتە سپورتىنىڭ وكىلى انتونيو ينوكي اراسىندا وتكەن-ءدى. توكيودا ۇيىمداستىرىلعان كەش ەكى سپورتقا دا بەيتاراپ ەرەجە بويىنشا ۇيىمداستىرىلىپ, تەڭ ناتيجەمەن اياقتالعان بولاتىن. ال ءبىز ءسوز ەتىپ وتىرعان مەيۆەزەر-ماكگرەگور جەكپە-جەگى بوكس ەرەجەسى بويىنشا وتەدى. بىلايشا ايتقاندا, ارىستاندى سۋعا جىبەرىپ, قولتىراۋىنمەن توبەلەستىرگەنمەن بىردەي بولماق.
اتالعان جەكپە-جەكتى الەم جانكۇيەرلەرى تاعاتسىزدانا كۇتۋدە. ءتىپتى, قازاقستاندىق كورەرمەندەردىڭ دە بۇل ايقاستى تاماشالاۋعا اسا نيەتتى ەكەنىن الەۋمەتتىك جەلىلەر مەن ءتۇرلى سايتتارعا جازعان پىكىرلەرىنەن بايقاۋعا بولادى. ال «نە سويسا دا قاساپشى سويسىن» دەگەن ۇستانىمداعى سپورت ساراپشىلارى بۇل كەزدەسۋدى كورۋگە ىنتالى ەمەس. جانە دە جانكۇيەرلەردى گولوۆكين-الۆارەس جەكپە-جەگىنە بارۋعا ۇگىتتەپ جاتىر. ولار مۇنى تەك بيزنەس ءۇشىن جاسالعان شوۋ ەكەنىن ايتادى. امەريكالىق تانىمال پروموۋتەر لۋ ديبەللا بولسا, بۇل كەزدەسۋدى بوكس ەمەس, سپەكتاكل دەپ اتادى. «بۇل بوكس كەشى ەمەس, بۇل – سپەكتاكل. مەيۆەزەر-ماكگرەگور بوكستىڭ شوۋ ەكەنىن دالەلدەدى», دەيدى. دەسە دە, كاسىپقوي بوكستىڭ ءوزى شوۋ-بيزنەس ەكەنىن ەستەن شىعارماعان ءجون.
ەندى اتالعان كەزدەسۋ تۋرالى پىكىر ايتىپ جاتقان سپورت ساراپشىلارى مەن الەمگە تانىمال سپورتشىلاردىڭ بولجامدارىنان مىسال كەلتىرە كەتەيىك. بىرقاتار بوكس ماماندارىنىڭ ايتۋى بويىنشا, بۇل ايقاستا فلويد مەيۆەزەر قارسىلاسىن ەش قيىندىقسىز جەڭەتىنىنە كۇمان كەلتىرمەيدى. اۋىر سالماقتاعى الەمنىڭ ەكس-ءابسوليۋتتى چەمپيونى لەننوكس ءليۋيستىڭ پىكىرىنشە, بۇل كەزدەسۋدى تولىققاندى جەكپە-جەك دەپ ايتۋ قيىن. «شىنىمدى ايتسام, مۇنى جەكپە-جەك دەپ ەسەپتەمەيمىن. جانكۇيەرلەر بۇل ايقاسقا «ماكگرەگور اياقپەن تەۋىپ قويماي ما ەكەن؟» دەگەن سۇراقتىڭ جاۋابىن ىزدەۋ ءۇشىن باراتىن شىعار», دەيدى ول. ال اتاعى جەر شارىنا تارالعان ايگىلى پروموۋتەر بوب ارۋم: «و, توبا. بۇل قانداي بوكس بولماق؟ ماكگرەگوردىڭ بۇل كەشتە تيتتەي بولسىن جەڭىسكە جەتۋگە مۇمكىندىگى جوق», دەپ بۇل جەكپە-جەككە تاڭدانىسى مەن پىكىرىن وسىلايشا ءبىلدىردى.
ۇلكەن فلويد مەيۆەزەر ۇلىنىڭ جەڭىسكە جەتەتىنىنە كۇمان كەلتىرمەيدى. سونداي-اق, الپىس جاستى القىمداعانىنا قاراماستان ول: «كونوردى مەن دە جەڭە الامىن», دەپ بۇكىل الەمگە جار سالدى. «تىڭداڭىزدار, مەن 64 جاستامىن, ول (ماكگرەگور) – 28 جاستا بولسا دا, مەنىڭ سوققىلارىما توتەپ بەرە المايدى. ءتىپتى, كوز ىلەسپەس جىلدامدىعىمنان مەنىڭ سوققىم قايدا باعىتتالعانىن دا بىلمەي قالادى», دەپ ءوزىنىڭ ءالى تىڭ ەكەنىن جانكۇيەرلەرگە دالەلدەگەندەي بولدى. وسى ورايدا گەننادي گولوۆكيننىڭ باپكەرى ابەل سانچەستىڭ پىكىرىن كەلتىرە كەتەيىك. «كونوردا جوعالتاتىن ەشتەڭە جوق. سوندىقتان, ول بۇل ايقاستا بار كۇشىن سالۋ كەرەك. ماكگرەگوردىڭ بۇل كەزدەسۋدە باستى مۇمكىندىگى – ۇزىن قولدارىن پايدالانىپ, فلويدقا سوققى جاساۋعا مۇمكىندىك بەرمەۋ. ول ءار ءۇش مينۋت سايىن تولىق جۇمىس ىستەۋى كەرەك. جانە دە مەيۆەزەردىڭ قاتەلەسۋىنە مۇمكىندىك تۋدىرىپ, ورايى كەلگەندە انىق سوققىلار جاساۋى ءتيىس. سوندا عانا يرلانديالىق بوكسشى جەڭىسكە جەتەدى», دەپ UFC وكىلىنە اقىل-كەڭەس بەردى. ال جانات جاقيانوۆتىڭ پروموۋتەرى ريككي حاتتون كونور ماكگرەگوردىڭ نوكاۋتپەن جەڭىسكە جەتەتىنىنە سەنەدى. «فلويد قازىر بۇرىنعى بابىندا ەمەس. ول قازىر شاۋ تارتىپ قالدى. مەنىڭشە, كونور نوكاۋتپەن جەڭىسكە جەتەدى. جانە سونى قاتتى تىلەيمىن. ويتكەنى, مەن ماكگرەگوردىڭ جانكۇيەرىمىن», دەپ يرلانديالىق بوكسشىعا تىلەكتەس ەكەندىگىن جەتكىزدى.
بۇل ساراپشىلار مەن مامان پىكىرىنىڭ ءبىر پاراسى عانا. شەتەلدىك باسىلىم بەتتەرىندە كۇن سايىن بىرنەشە بولجامدار مەن ساراپتامالى پىكىرلەر جاريالانىپ جاتىر. ولاردىڭ كوبى الداعى كەزدەسۋدە ماكگرەگوردىڭ جەڭىسكە جەتۋگە ەش مۇمكىندىگى جوق ەكەنىن العا تارتۋدا. بىراق, مۇنى تەك ءار ادامنىڭ پىكىرى رەتىندە قابىلداعان دۇرىس. ويتكەنى, يرلانديالىق بوكسشىنىڭ دا ءبىر ويلاعان جوسپارى بار. ونىڭ ۇستىنە, ماكگرەگور امەريكالىق بوكسشىدان 12 جاسقا كىشى. جاس ايىرماشىلىق ءبارىبىر ماڭىزدى ءرول اتقاراتىنى بەلگىلى. سونىمەن قاتار, كونوردىڭ امەريكالىق بوكسشىعا قاراعاندا دەنە ءبىتىمى دە ءىرى. دەگەنمەن, ءدال قازىرگى ساتتە ەكى سپورتشىنىڭ دا جەڭىسكە جەتۋگە دەگەن مۇمكىندىگى تەڭ. كىمنىڭ جەڭىسكە جەتەتىنىن 27 تامىز كۇنى بىلەتىن بولامىز.
ءالي بيتورە, «ەگەمەن قازاقستان»