اسىرەسە, قالالى جەرلەردە كولىك قوزعالىسىن رەتتەۋ قيىن. بۇعان جولدىڭ تارلىعى دا, كولىكتىڭ كوپتىگى دە اسەر ەتپەي قويمايدى. سوندىقتان, كولىك قوزعالىسىن رەتتەۋ ارقىلى قاۋىپسىزدىكتى قامتاماسىز ەتۋ دە باستى نازاردا بولۋى ءتيىس. بۇگىندە تاراز قالاسىندا 369 مىڭ تۇرعىن بار. سول تۇرعىنداردىڭ 100 مىڭعا جۋىعى «الماتى – شىمكەنت» باعىتىنداعى تەمىر جول جەلىسىنىڭ ارعى بەتىندە تۇرادى. قازىرگى كەزدە شاھاردىڭ ەكى بولىگى اراسىنداعى كولىك قاتىناسى اباي كوشەسىندە ورنالاسقان تەك قولدانىستاعى جالعىز جول وتكەلى ارقىلى قامتاماسىز ەتىلىپ كەلەدى.
سوڭعى جىلدارى وڭىردەگى كولىك قوزعالىسىنىڭ قارقىنى ەكى-ءۇش ەسەگە وسكەنى بايقالادى. سوندىقتان دا قولدانىستاعى جالعىز جول وتكەلى كولىك اعىمىن يگەرە الماي وتىر. وعان قوسا, قىرعىز رەسپۋبليكاسى شەكاراسى مەن «ايشا ءبيبى» كەدەن بەكەتى باعىتى ارقىلى تاۋلىگىنە 4-5 مىڭ اۆتوكولىك قاتىنايدى. مۇنىڭ ءبارىن قوسقاندا وڭىردەگى كولىك قوزعالىسى مەن جول ماسەلەسى وسى ۋاقىتقا دەيىن كۇن تارتىبىندە تۇرعان ەدى.
الايدا تاراز قالاسىنداعى ايشا ءبيبى كوشەسىنىڭ سوڭىندا ورنالاسقان, قۇرىلىسى توقسانىنشى جىلدارى باستالىپ, بىراق ءالى كۇنگە دەيىن بىتپەگەن جول وتكەلىن قايتا جاڭارتىپ, پايدالانۋعا بەرۋ بۇل ماسەلەنىڭ وڭ شەشىمى بولعالى تۇر. «اتالعان جول وتكەلىن قايتا جاڭارتۋ ماقساتىندا, وبلىستىق بيۋدجەت ەسەبىنەن قاجەتتى جوبالىق-سمەتالىق قۇجاتتاما ازىرلەنىپ, وعان مەملەكەتتىك ساراپتامانىڭ وڭ قورىتىندىسى الىنعان. جوبانىڭ قۇنى 1 ميلليارد 917 ميلليون 311 مىڭ تەڭگەنى قۇرايدى. جوبانى ىسكە اسىرۋ ءۇشىن 2016 جىلى رەسپۋبليكالىق بيۋدجەتتەن 1 119 ميلليون تەڭگە قاراستىرىلىپ, «ارايسترويماركەت» جشس مەردىگەر بولىپ تانىلدى. كەلىسىمشارت كولەمى 1 828,1 ميلليون تەڭگە. ال وتكەن جىلعا بولىنگەن قارجى تولىعىمەن يگەرىلدى», دەيدى وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسىنىڭ باسشىسى
ءا.احاتاەۆ. سونداي-اق, باسقارما باسشىسى قايتا جاڭارتۋ جۇمىستارىن اياقتاۋ ماقساتىندا بيىل وبلىستىق بيۋدجەتتەن 709,1 ميلليون تەڭگە بولىنگەنىن دە جەتكىزدى. بۇگىنگى تاڭدا نىساننىڭ قۇرىلىس-مونتاج جۇمىستارى كۇنتىزبەلىك جۇمىستاردى ورىنداۋ كەستەسىنە سايكەس جۇرگىزىلۋدە ەكەن. بۇدان كەيىن كورشى قىرعىزستانعا قاراي قاتىنايتىن اينالما جول سالۋ دا جوسپاردا بار. بۇل ءوز كەزەگىندە جولاۋشىلارعا جاسالعان جاقسى جاعداي بولىپ تابىلادى.
جالپى, اتالعان جول وتكەلىن قايتا جاڭارتىپ, پايدالانۋعا بەرۋ تاراز قالاسى تۇرعىندارىنىڭ قاۋىپسىز قوزعالۋىنا ءارى وڭىردەگى كولىك قوزعالىسىنىڭ رەتتەلۋىنە مۇمكىندىك بەرەتىن بولادى.
حاميت ەسامان, «ەگەمەن قازاقستان» جامبىل وبلىسى