كورمەگە مەملەكەتتىك مۋزەيدىڭ قورىندا ساقتاۋلى بەلگىلى عالىمداردىڭ جەكە كەشەندەرى قويىلعان. ونىڭ ىشىندە, قازاقستان عىلىم اكادەمياسىنىڭ نەگىزىن قالاۋشى, ەلىمىزدەگى گەولوگيالىق ينستيتۋتىن قۇرۋعا بەلسەنە ارالاسقان اكادەميك قانىش ساتباەۆتىڭ, ەتنوارحەولوگ, شىعىستانۋشى, تاريحشى-عالىم الكەي مارعۇلاننىڭ جەكە بۇيىمدارى كەلۋشىلەر نازارىنا ۇسىنىلىپ وتىر. بۇل كورمەنىڭ كەلەسى ەكسپوزيتسياسى كەزىندە ەسىك وباسىنان تابىلعان «التىن ادامدى» زەرتتەۋشى, قازاقستان مەملەكەتتىك سىيلىعىنىڭ لاۋرەاتى, تاريح عىلىمدارىنىڭ دوكتورى كەمەل اقىشەۆتىڭ, ەتنوگراف, ارحەولوگ, تاريح عىلىمدارىنىڭ دوكتورى پروفەسسور, قازاقستان حالىقتارى شارۋاشىلىق مادەنيەتى مەن تۇرمىسىن تياناقتى تۇردە باياندايتىن كوپتەگەن عىلىمي-تانىمدىق مونوگرافيالاردىڭ اۆتورى حالەل ارعىنباەۆتىڭ جەكە كەشەندەرى قۇرايدى.
سونداي-اق, كورمەدە العاشقى عالىم ايەل – پالەونتولوگ, پالەوزوولوگ, بيولوگيا عىلىمىنىڭ كانديداتى, رەسەي پالەونتولوگيا قوعامىنىڭ قۇرمەتتى مۇشەسى ب.س. قوجامقۇلوۆانىڭ فوتوقۇجاتتارى قويىلعان.
كورمەنىڭ «تاۋەلسىز قازاقستاننىڭ عالىمدارى – اكادەميكتەر» دەپ اتالاتىن ەكىنشى ءبولىمى اكادەميكتەر س.ز. زيمانوۆ, م.ح. اسىلبەكوۆ, ج.ق.قاسىمباەۆ, م.ق.قوزىباەۆ, ا.ق.قوشانوۆ, ە.ە.ەرعوجين جانە باسقا عالىمداردىڭ جەكە كەشەندەرىنە ارنالعان. بۇل ءبولىم قازاقستاننىڭ زاڭ عىلىمدارىنىڭ باستاۋىندا تۇرعان, زاڭگەرلىك ءبىلىمنىڭ دامۋىنا زور ۇلەس قوسقان, 200-دەن اسا عىلىمي ەڭبەكتىڭ, ونىڭ ىشىندە 12 مونوگرافيانىڭ اۆتورى, اكادەميك س.ز. زيمانوۆقا ارنالعان ەكسپوزيتسيادان باستالادى.
تاۋەلسىزدىك جىلدارى قوعامدىق عىلىمدار سالاسىنداعى قازاقتاردىڭ ەتنيكالىق اۋماعىن قالىپتاستىرۋ جانە قازاق مەملەكەتتىگىنىڭ تاريحى مەن ماسەلەلەرىنىڭ زەرتتەلگەنى ماقتانارلىق جاعداي.
ەلباسى نۇرسۇلتان نازارباەۆتىڭ «بولاشاققا باعدار; رۋحاني جاڭعىرۋ» باعدارلامالىق ماقالاسىنىڭ ء«بىلىمنىڭ سالتانات قۇرۋى» دەگەن بولىمىندە ء«بىلىمدى, كوزى اشىق, كوكىرەگى وياۋ بولۋعا ۇمتىلۋ – ءبىزدىڭ قانىمىزدا بار قاسيەت» دەپ كورسەتكەن بولاتىن. جاستار ءۇشىن ءبىلىم قاشاندا كەرەك قاسيەت. كورمەدە قويىلعان ءاربىر زات جاستارعا ەرتەڭ قاجەتتىگىمەن قۇندى ەكەندىگىن تۇيسىنەسىز.
ساپارباي پارمانقۇل,
«ەگەمەن قازاقستان»
الماتى