«قازسپورت» تەلەارناسىنان تىكەلەي ەفيردە كورسەتكەنىندەي, گرەك-ريم كۇرەسىنەن 71 كگ سالماقتا فينالدىق باسەكەدە التىن جۇلدە ءۇشىن قازاقستاندىق دەمەۋ جادىراەۆ پەن گەرمانيالىق فرانك شتەبلەر تالاستى. نەمىس پالۋانى ناعىز بابىندا ەكەن, بەلدەسۋدى قارقىندى باستاپ, بىردەن العا كەتتى. اقىرى سول باسىمدىلىعىنان ايىرىلماي, 8:3 ەسەبىمەن جەڭىسكە جەتتى. ءسويتىپ ول ەكى مارتە الەم چەمپيونى اتاندى.
كوپتەن بەرى جولى بولماي جۇرگەن دەمەۋ ءۇشىن كۇمىس جۇلدە - ۇلكەن تابىس. وسى جەتىستىگى ارقىلى ول قازاقستاننىڭ ەڭبەك سىڭىرگەن سپورت شەبەرى اتاعىن يەلەنگەلى وتىر.
ايتا كەتەيىك, بۇدان التى جىل بۇرىن گرەك-ريم كۇرەسىنەن المات كەبىسپاەۆ الەم چەمپيوناتىنىڭ فينالىنا دەيىن جەتكەن بولاتىن. سول تابىستى بيىل دەمەۋ قايتالادى. 22 تامىز كۇنى الەم چەمپيوناتى ودان ءارى جالعاسادى. بۇل كۇنى دە كىلەمگە شىعاتىن قازاقستاندىق پالۋاندار جۇلدە ءۇشىن بارىن سالاتىنى انىق.
"بۇل دەمەۋدىڭ قانشا جىلدان بەرگى توككەن تەرىنىڭ جەمىسى, ەڭبەگىنىڭ اقتالعانى دەپ بىلەمىن. اللاعا شۇكىر بۇعان دا. اقتىق سىنعا دەيىن الەمنىڭ مىقتى, بەلدى پالۋاندارىنان باسىم ءتۇستى. فينالدا نەمىس پالۋانى دۇنيە جۇزىندە ءوزىنىڭ كۇشتى ەكەندىگىن تاعى دا دالەلدەپ, ەكى مارتە الەم چەمپيونى اتاندى. دەمەۋدىڭ ءىرى جەڭىستەرى الدا دەپ سەنەمىن", - دەدى گرەك-ريم كۇرەسىنەن بەيجىڭ وليمپياداسىنىڭ جۇلدەگەرى نۇرباقىت تەڭىزباەۆ.