سەنبىنىڭ كەشىندە قالا تۇرعىندارى مەن قوناقتارى مەدەۋ شاتقالىن بەتكە الدى. الاتاۋدان ەسكەن سالقىن سامالمەن تىنىستاپ, اسەم انگە تەربەلسەك دەپ كەلگەندەردىڭ سانى ءۇش مىڭ ادامنان اسىپ جىعىلدى. ەكى كۇن بويى ارۋ الماتىنى انمەن سۋسىنداتقان ونەر يەلەرى اراسىندا قىتاي, تۇركيا, جاپونيا, كورەيا, ينديا ەلىنەن كەلگەن ءان ونەرىنىڭ جۇلدىزدارى, ناقتىراق ايتساق, وڭتۇستىك كورەيالىق «U-KISS» K-pop توبى, ينديالىق ءانشى Sanah Moidutty, تۇرىكتىڭ جۇلدىزى Murat Boz سىندى الەمگە ايگىلى انشىلەر ساحنا كوركىنە اينالدى. الەمنىڭ 118 مەملەكەتىنىڭ تەلەارنالارى ارقىلى تاراتىلعان فەستيۆالدە شەتەلدىك ورىنداۋشىلارمەن قاتار وتاندىق ونەر يەلەرى دە ءوز ونەرلەرىن ورتاعا سالدى. «دوس-مۇقاسان», «مۋزارت», قايرات نۇرتاس, ءمادينا سادۋاقاسوۆا, كامشات جولدىباەۆا, ءالي وقاپوۆ, ەركە ەسماحان, سۇندەت بايعوجين, زارينا التىنباەۆا, مارجان اراپباەۆا, الىشەر كاريموۆ, Roya, Ademi, ايۋمي, Renzo, Black Dial سىندى تانىمال توپتار مەن جەكە ورىنداۋشىلار كورەرمەن ىقىلاسىنا بولەندى.
– ارۋ قالامىزدا اۋقىمى كەڭ شىعارماشىلىق شارا وتۋدە. ول بۇرىنعى «ازيا داۋسىنىڭ» جالعاسى ىسپەتتى كورىنەدى. بۇگىن ءبىز سول ءبىر كەزدەرى ءان ايتقان ورىنداۋشىلاردى ەسكە الىپ, زاماناۋي انشىلەردى تىڭداۋدامىز. بۇل فەستيۆال الداعى ۋاقىتتاردا دا جالعاسىن تابادى دەگەن سەنىمدەمىن. ونەردى باعالاپ كەلگەن بارشا تىڭدارماندارعا العىس بىلدىرەمىن – دەيدى ءانشى مەدەۋ ارىنباەۆ.
كونتسەرت بارىسىندا پيروتەحنيكالىق, لازەرلىك قوندىرعىلار, جارىقديوتتى كونسترۋكتسيالار, ەكراندار, لەد-فاكەلدەرى, جىلجىمالى ساحنا ۇتىمدى پايدالانىلدى. سپورت موتوتسيكلدەرىنە مىنگەن كاسكادەرلەر, گيمناست شەبەرلەرى, بالەت ارتىستەرى, سيمفونيالىق وركەستر جينالعاندارعا ەرەكشە مەرەكە سىيلادى.
ۇيىمداستىرۋشىلاردىڭ ايتۋىنشا: مەدەۋدە راديالدى فورماداعى ساحنا العاش رەت قويىلىپ وتىر. «بۇل فورمانىڭ تەحنيكالىق نيۋانسى وتە كۇردەلى, سوندىقتان ەلىمىزدە مۇنداي ساحنالار جاسالمايدى. اۆتورلىق جوبا گەرمانيادان, رەسەي مەن ۋكراينادان كەلگەن ارىپتەستەر ارقىلى جۇزەگە استى. بۇگىنگى كەش بارىسىندا پورتالدارداعى ۆەرتيكالدى ەكران كورەرمەندەر مەن انشىلەردى دە تامساندىردى» دەيدى شارانى ۇيىمداستىرۋشىلار.
وسىلايشا, ەكى كۇن قاتارىنان الماتى اسپانىن انگە بولەگەن مەرەكە كوپشىلىكتىڭ كوڭىلىنەن شىقتى. الداعى كۇز ايلارىندا دا قالا تۇرعىندارى مەن قوناقتارىنا 70-تەن استام مادەني-ساۋىقتىرۋ شارالار ۇسىنىلادى, ولاردىڭ اراسىندا تىڭ جوبالارمەن قوسا ءداستۇرلى فەستيۆالدەر مەن كونتسەرتتەر دە بار. قالا قوناقتارى «كوك-توبە-وپەرا» حالىقارالىق مۋزىكا فەستيۆالىنە بارىپ, اشىق اسپان استىندا «وركەسترلەر شەرۋىن», «الما fest» الما فەستيۆالىن تاماشالاپ, «تويقازان 2017» اتتى قازاقستان حالىقتارىنىڭ ۇلتتىق اس مازىرلەرى فەستيۆالىنەن ءدام تاتىپ, «Gakku داۋسى» كوپمىڭدىق Open Air ءدى قىزىقتاپ, «تۇلپار» ۇلتتىق كينوسىيلىعىن تاپسىرۋعا قاتىسىپ, ع. مۇسىرەپوۆ اتىنداعى جاستار تەاترىنىڭ «بازارىم تارقاماسىن» سپەكتاكلىن جانە باسقالارىن تاماشالاي الادى. «Almaty Sales Festival: Summer 2017» جەڭىلدىك فەستيۆالى اياسىندا قالانىڭ 100-دەن استام ساۋدا ورتالىقتارى ارزان تاۋارلارىن ۇسىنادى.
ارمان وكتيابر,
«ەگەمەن قازاقستان»
الماتى