ءبىرىنشى ورىندى كوكشەتاۋدان كەلگەن, ۇلتتىق ناقىشتا ءۇش ءتىلدى ۇيالى قوسىمشا-ويىن جاساپ شىعارعان ينسااي كومانداسى جەڭىپ الدى. «سەزىمدەرىمىزدى بيلەي الماي تۇرمىز. «ينسااي» دەپ اتاعانىن ەستىگەنىمىزدە ءوز قۇلاعىمىزعا ءوزىمىز سەنە المادىق. ءبىر-بىرىمىزگە قارادىق, سودان سوڭ عانا ءبىزدى ايتىپ جاتقانىن تۇسىندىك», - دەپ جەڭىمپاز ايگەرىم ساعىندىقوۆا العان اسەرىمەن ءبولىستى. ۇزدىك ۇشتىككە, سونداي-اق, QamCare قوسىمشاسىمەن Flash كومانداسى جانە 3D Alippe قوسىمشاسىن جاساپ شىعارعان كوماندا كىردى.
ءادىل قازىلار القاسىندا يۋنيسەف وكىلىنىڭ ورىنباسارى فياكرا ماكەيسي, يۋنيسەف-ءتىڭ جاھاندىق يننوۆاتسيالىق قورىنىڭ ۆەنچۋر مەنەدجەرى كريس فابيان, Urban Forum Almaty نەگىزىن قالاۋشى اسەل ەسجانوۆا, Google.org ايماقتىق باسشىسى حەكتور مۋحيكا, Project Connect ۇيىمى باسقارماسىنىڭ توراعاسى سارا دجەيكوبس, حالىقارالىق اقپاراتتىق تەحنولوگيالار ۋنيۆەرسيتەتىنىڭ پروفەسسورى بەيبىت امىرعاليەۆ جانە AUA Group وكىلى انەل مولداحمەتوۆا بولدى.
جەڭىمپازداردى ماراپاتتاپ جاتقاندا قازاقستانداى يۋنيسەف وكىلى يۋري وكساميتنىي: «الەۋمەتتىك جاۋاپكەرشىلىكتىڭ وسىنشالىق جوعارى دەڭگەيى مەنى قاتتى قۋانتتى – ءار قوسىمشانىڭ ناقتى ءمان-ماڭىزى بار جانە قوعامدى بۇرىنعىدان دا جاقسىراق ەتۋگە باعىتتالعان» دەپ اتاپ ءوتتى.
حاكاتون يۋنيسەف-ءتىڭ بالالاردىڭ قۇقىقتارىن يننوۆاتسيالار ارقىلى دامىتۋ شاراسى شەڭبەرىندە وتكىزىلدى. سونداي-اق قالالارعا قاتىستى شەشىمدەر ويلاپ تابۋعا ارنالدى. ەكى كۇندىك شارا تەحنولوگيالىق يننوۆاتسيالار, عىلىم الەمىنىڭ, قازاقستاننىڭ جانە وزگە ەلدەردىڭ بەيۇكىمەتتىك جانە مەملەكەتتىك سەكتورلارىنىڭ ساراپشىلارىنىڭ باسىن بىرىكتىردى.