ۆەلوشاباندوزدار استانانىڭ تۇركىستان, دوستىق, اقمەشىت جانە قوناەۆ كوشەلەرى بويىمەن ارقايسىسى 1,6 شاقىرىمدىق 35 اينالىمنان تۇراتىن قاشىقتىقتى ارتقا قالدىرىپ, «بايتەرەك» مونۋمەنتى تۇبىندەگى مارەدە جارىستى اياقتادى.
تاس جولداعى تارتىستى وتكەن ۆەلوبايگەدە ۇلىبريتانيادان كەلگەن شاباندوز ەدۆارد كلەنسي الدىنا جان سالمادى. مارە سىزىعىن ەكىنشى بولىپ نيكولاس ماريني (يتاليا) كەسىپ ءوتتى. سكوتت شاندەرلەند ( ۇلىبريتانيا) بولسا, قولا جۇلدەگە قاناعات ەتتى. ال جەرلەسىمىز, Astana Pro Team كلۋبىنىڭ مۇشەسى باقتيار قوجاتاەۆ ازيانىڭ ۇزدىك ۆەلوشاباندوزى اتاندى.
جالپى, «Astana EXPO 2017 International Criterium» ۆەلوجارىسىنا 15 ەلدەن 20 كوماندا قاتىستى. ولاردىڭ اراسىندا الەمدىك تۋرلاردىڭ كاسىپقوي كوماندالارى, قۇرلىقارالىق كوماندالار مەن ۇلتتىق قۇرامالار بولدى. ال بۇل ۇجىمداردىڭ ساپىندا «گراند-تۋرلاردىڭ» جەڭىمپازدارى مەن جۇلدەگەرلەرى, وليمپيادا مەدالىنىڭ يەگەرلەرى ونەر كورسەتتى. ايگىلى «تۋر دە فرانس» ۆەلوكوپكۇندىگىنىڭ بىلتىرعى جەڭىمپازى, بريتاندىق Team Sky كومانداسىنىڭ مۇشەسى كريس فرۋمنىڭ جانە Astana Pro Team ۇجىمىنىڭ كوشباسشىسى فابيو ارۋدىڭ جانە تاعى باسقا اتاقتى سپورتشىلاردىڭ استانا ۆەلوبايگەسىنە ارنايى كەلىپ قاتىسۋى جارىستىڭ وتە جوعارىدا دەڭگەيدە ۇيىمداستىرىلعانىن كورسەتسە كەرەك.
جەڭىمپاز بەن جۇلدەگەرلەردى ماراپاتتاۋ راسىمىنە مادەنيەت جانە سپورت ءمينيسترى ارىستانبەك مۇحامەدي ۇلى, قازاقستان ترياتلون فەدەراتسياسىنىڭ پرەزيدەنتى, ۇقك توراعاسى كارىم ءماسىموۆ, استانا قالاسىنىڭ اكىمى اسەت يسەكەشەۆ قاتىستى.
ماراپاتتاۋ ءراسىمى كەزىندە ۆەلوسپورت جانكۇيەرلەرى ءۇشىن قۋانىشتى حاباردى «استانا» ۆەلوكلۋبىنىڭ باس مەنەدجەرى الەكساندر ۆينوكۋروۆ جەتكىزدى. ايگىلى ۆەلوشاباندوز باق وكىلدەرىنە بەرگەن سۇحباتىندا «Astana EXPO 2017 International Criterium» ۆەلوبايگەسىن ءداستۇرلى تۋرنيرگە اينالدىرۋ جونىندە كەلىسسوزدەر جۇرگىزىلىپ جاتقانىن حابارلادى.
قايرات ءابىلدا, «ەگەمەن قازاقستان»