«ەگەر تاريحقا كوز جۇگىرتسەك, ءبىزدىڭ كوگىمىزدە ايدىڭ تۇتىلماعانىنا ءبىراز ۋاقىت ءوتىپتى. سوڭعى رەت التى جىل بۇرىن تولىق تۇتىلعان ەكەن. اراعا وسىنشا ۋاقىت سالىپ, ياعني تامىزدىڭ 7-سىنەن 8-ىنە قاراعان ءتۇنى ءبىزدى عاجايىپ كورىنىس كۇتىپ تۇر. جارتىلاي بولسا دا اي تۇتىلادى. جارتىلاي دەگەنىمىز, بۇل ءتۇنى جەر كولەڭكەسى كونۋسىنىڭ تۇنەگىندە تولعان اي تاباعىنىڭ ءبىر بولىگى عانا ورنالاسادى. ياعني ءتۇن باستالعاندا اي تولىپ تۇرادى دا, ۋاقىت وتە كەلە, ونىڭ باسىم بولىگى كوزدەن «عايىپ» بولادى», - دەدى سولتۇستىك قازاقستان مەملەكەتتىك ۋنيۆەرسيتەتىنىڭ دوتسەنتى اندرەي سولودوۆنيك Sputnik كازاحستان پورتالىنا بەرگەن سۇحباتىندا.
ال ۆاسيلي فەسەنكوۆ اتىنداعى استروفيزيكا ينستيتۋتىنا قاراستى اي جانە عالامشارلار زەرتحاناسىنىڭ مەڭگەرۋشىسى ۆيكتور تەيفەلدىڭ پىكىرىنشە, بۇل جىلىنا ەكى ءۇشى رەت بولاتىن سيرەك قۇبىلىس. پروفەسسور ايدىڭ تۇتىلعان ءساتىن قالاي كورۋگە بولاتىنىن دا ايتا كەتتى.
«اي كورىنەتىن جەرگە شىعۋ كەرەك. ءدۇربى بولسا جاقسى, ارينە. تەرەزە وڭتۇستىككە قاراپ تۇرسا جانە اسپاندى كورۋگە ەشقانداي كەدەرگى بولماسا, ۇيدەن شىقپاي-اق تاماشالاۋعا بولادى», - دەيدى ول.
ايتا كەتەيىك, ايدىڭ تۇتىلۋىن استانا ۋاقىتىمەن ساعات 23.20 مەن ساعات 01.10 ارالىعىندا بايقاۋعا بولادى.