باتىردىڭ كەۋدە ءمۇسىنىنىڭ اشىلۋ سالتاناتىنا قاتىسقان اۋدان اكىمىنىڭ ورىنباسارى دارحان جورگەكباەۆ, اۋداندىق ءماسليحاتتىڭ حاتشىسى سەيىلبەك ىسقاقوۆ, «قاسقالداق» قوعامدىق قورىنىڭ توراعاسى امانگەلدى كەرىمتاەۆ سەكىلدى ازاماتتار اياگوز وڭىرىندە بابالاردى ۇلىقتاۋ, وتكەنىمىزدى ۇمىتپاۋ باعدارىندا اۋقىمدى جۇمىستاردىڭ جۇرگىزىلىپ جاتقانىن اتاپ ءوتىپ, ەسكەرتكىشتىڭ بوي كوتەرۋىنە مۇرىندىق بولعان دارا تۇلعانىڭ ۇرپاقتارىنا العىستارىن ايتتى.
«اقتامبەردى بابامىز ءسوز ۇستاعان اقىن عانا ەمەس, ايتۋلى باتىر, قول باستاعان قولباسى بولعان. ول كىسىنىڭ باسشىلىعىمەن قازاق جاۋىنگەرلەرى بىرنەشە مارتە جوڭعارلارعا كۇيرەتە سوققى بەرگەن. سوندىقتان جىراۋ ەسكەرتكىشىنىڭ اشىلۋى جاس ۇرپاقتى وتانشىلدىق رۋحتا تاربيەلەۋگە زور ۇلەسىن قوسادى دەپ ويلايمىز», - دەيدى باتىردىڭ ۇرپاعى, اباي اۋدانىنىڭ اكىمى تۇرسىنعازى مۇساپىربەكوۆ.
قالانىڭ قاق ورتاسىنا باتىردىڭ ءوز اتىنداعى كوشەگە ورناتىلعان ەسكەرتكىشتىڭ اۆتورى - نۇربول قاليەۆ, كەۋدە ءمۇسىننىڭ بيىكتىگى - تۇعىرىمەن قوسا ەسەپتەگەندە 2,5 مەتر.
ازامات قاسىم,
«ەگەمەن قازاقستان»
شىعىس قازاقستان وبلىسى,
اياگوز اۋدانى