بىلعارى قولعاپ شەبەرىنىڭ ايتۋىنشا, كوپ نارسە شەشىلىپ قويعان. شامامەن ءبىر اپتادان كەيىن كەلەسى قارسىلاسى كىم بولاتىنى بەلگىلى بولماق. قازىر تەك جەكپە-جەك قازان ايىندا شەت ەلدە وتەتىنى بەلگىلى. جانات بۇل كەزدەسۋگە ۇلىبريتانيادا جاتتىعادى. دايىندىق جۇمىستارى جەكپە-جەككە سەگىز اي قالعاندا باستالادى. - ءسىزدىڭ كەلەسى قارسىلاسىڭىز كىم بولاتىنىن بىلمەيمىن. بىراق كوپشىلىك ءسىزدى بۇل كەزدەسۋدە اۋتسايدەر بولادى دەيدى عوي ... - اۋتسايدەر دەپ ايتسا, ايتا بەرسىن. روۋشي ۋوررەنمەن وتكەن كەزدەسۋدىڭ الدىندا مەنى ءتىپتى امەريكالىق بوكسشىعا لايىقتى قارسىلاس ەمەس دەپ ەدى. مەن شارشى الاڭعا شىعىپ, كىمنىڭ مىقتى ەكەنىن دالەلدەدىم. ماعان كوپشىلىكتىڭ نە ايتاتىنى اسا ماڭىزدى ەمەس. بوكستا بارلىعىن شارشى الاڭ شەشەدى. مىقتى بولساڭ مىقتىلىعىڭدى رينگتە دالەلدە. - بولاشاققا قانداي جوسپارىڭىز بار؟ - الداعى كەزدەسۋ بيىلعا جوسپارلاعان سوڭعى جەكپە-جەگىم بولادى. جالپى بولاشاقتاعى جوسپارىم تۋرالى ءالى ويلانعان جوقپىن. باستىسى ءار جەكپە-جەككە سوڭعى كەزدەسۋ سەكىلدى دايىندالىپ شىعۋىم كەرەك. ويتكەنى, بوكستا ءارتۇرلى جاعداي بولۋى مۇمكىن. دەنساۋلىعىم جاقسى بولسا جۇدىرىقتاسا بەرەمىن. قازىر ءوزىمدى جاقسى سەزىنىپ ءجۇرمىن. بىراق الداعى بەس جىلدا وسىلاي جوعارى دەڭگەيدە جۇدىرىقتاسامىن دەپ ايتا المايمىن.