مەملەكەتتىك حاتشىنىڭ ايتۋىنشا, «بولاشاق» پرەزيدەنتتىك ستيپەندياسى قازاقستاننىڭ ءۇشىنشى جاڭعىرۋى باسىمدىقتارىنىڭ ءبىرى بولىپ تابىلاتىن ادامي كاپيتال ساپاسىن جاقسارتۋداعى ءرولى ايرىقشا. سونداي-اق, گۇلشارا ابدىقالىقوۆا كادرلاردى ساپالى دايارلاۋ جانە ءبىلىم جۇيەسىندەگى وزىق بۋىن رەتىندە «بولاشاق» تۇلەكتەرىنىڭ الەۋەتىن پايدالانۋ جونىندەگى جۇمىستى كۇشەيتۋ قاجەتتىلىگىنە توقتالدى.
وتىرىس بارىسىندا ءبىلىم جانە عىلىم ءمينيسترى ەرلان ساعاديەۆتىڭ شەتەلدە كادرلار دايارلاۋعا قاتىستى رەسپۋبليكالىق كوميسسياسىنىڭ حاتتامالىق شەشىمدەرىنىڭ ورىندالۋ بارىسى تۋرالى ەسەبى تىڭدالدى. سونىمەن قاتار, «بولاشاق» باعدارلاماسىن ىسكە اسىرۋعا قاتىستى بىرقاتار ماسەلەلەر قارالدى.
كوميسسيا شەشىمىمەن ماگيستراتۋرا جانە دوكتورانتۋرا بويىنشا جانە الەمنىڭ جەتەكشى عىلىمي ورتالىقتارىندا تاعىلىمدامادان وتۋگە لايىق ۇمىتكەرلەرگە ستيپەنديا تاعايىندالدى.
وتىرىستى قورىتىندىلاي كەلە مەملەكەتتىك حاتشى گۇلشارا ابدىقالىقوۆا «بولاشاق» حالىقارالىق ستيپەندياسىن ىسكە اسىرۋ تەتىكتەرىن ودان ءارى جەتىلدىرۋ جانە تيىمدىلىگى ارتتىرۋ بويىنشا بىرقاتار تاپسىرمالار بەردى.
«بولاشاق» ستيپەندياسى 1993 جىلى ەلباسى نۇرسۇلتان نازارباەۆتىڭ تىكەلەي بۇيرىعىمەن تاعايىندالعان بولاتىن. سودان بەرى اتالعان باعدارلاما ارقاسىندا الىس جانە جاقىن شەتەلدە 12 مىڭنان استام شاكىرت «ينەمەن قۇدىق قازىپ», ءبىلىم جيناپ قايتتى. بۇگىنگە دەيىن الەمنىڭ 35 ەلىندەگى 170 ۇزدىك جوعارعى وقۋ ورداسى الاش ورەندەرىن ءبىلىم نارىمەن سۋسىنداتتى. 2015 جىلدان باستاپ اعىلشىن ءتىلىن قازاقستاندا وقىتۋدى كوزدەيتىن «6+6» تىلدىك دايارلاۋدىڭ جاڭا مودەلى ىسكە قوسىلدى. ماگيستراتۋرا جانە دوكتورانتۋرا باعىتى اياسى كەڭەيدى.
فوتو: el.kz