قازاقستان رەسپۋبليكاسىنىڭ مادەنيەت قايراتكەرى جۇمابەك كەنجالينمەن قوشتاسۋ ءراسىمى ەرتەڭ, 25 شىلدە كۇنى قر جازۋشىلار وداعى عيماراتىندا ساعات 10-00-دە, جانازاسى مارقۇمنىڭ ءوز ۇيىندە ساعات 09-00-دە وتەدى.
ەستەرىڭىزگە سالا كەتسەك, بۇگىن 24 شىلدە كۇنى, 63 جاسقا قاراعان شاعىندا «قازاق گازەتتەرى» جشس-ءنىڭ باس ديرەكتورى جۇمابەك كەنجالين دۇنيەدەن وزدى.
ج.و.كەنجالين – قازاقستان رەسپۋبليكاسى پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىعىنىڭ لاۋرەاتى (2006 ج.), قازاقستان جۋرناليستەر وداعى سىيلىعىنىڭ لاۋرەاتى (1983 ج), قازاقستان جۋرناليستەر اكادەمياسىنىڭ تولىق مۇشەسى-اكادەميگى (2001 ج), قازاقستان رەسپۋبليكاسىنىڭ مادەنيەت قايراتكەرى (2004 ج.), «قۇرمەت» وردەنىنىڭ (2009ج.), قازاقستان رەسپۋبليكاسىنىڭ تاۋەلسىزدىگىنە – 20 جىل» مەدالىنىڭ (2011ج.) يەگەرى, قازاقستان جازۋشىلار وداعىنىڭ مۇشەسى. بۇگىنگە دەيىن «قازاق گازەتتەرى» جشس-نى باسقاردى.
ول 1971 جىلى تورعاي وبلىسى ارقالىق اۋدانىنداعى قايىڭدى ورتا مەكتەبىن بىتىرگەن سوڭ, اسكەر قاتارىندا قىزمەت ەتتى, شارۋاشىلىقتاردا جۇمىس ىستەدى.
1981 جىلى س.م.كيروۆ اتىنداعى قازاق مەملەكەتتىك ۋنيۆەرسيتەتىن ويداعىداي اياقتادى. ول بىرقاتار دۇنيەجۇزىلىك جانە بۇكىلوداقتىق جاستار مەن ستۋدەنتتەردىڭ فورۋمدارىنا قاتىستى. 1978 جىلى حالىق دەپۋتاتتارى الماتى قالالىق سوۆەتىنىڭ دەپۋتاتتىعىنا سايلاندى.
1981 جىلى «ەگەمەن قازاقستان» («سوتسياليستىك قازاقستان») گازەتىندە اۋەلى ءتىلشى, كەيىن ءبولىم مەڭگەرۋشىسى, 1986-1988 جىلدارى «زەردە» ء(«بىلىم جانە ەڭبەك») جۋرنالىندا جاۋاپتى حاتشى, باس رەداكتوردىڭ مىندەتىن اتقارۋشى, 1994 جىلدان «حالىق كەڭەسى» گازەتىنىڭ باس رەداكتورى بولدى.
1996 جىلدان «اقيقات» جۋرنالىنىڭ باس رەداكتورى, 1997-1999 جىلدار ارالىعىندا «قازاق ادەبيەتى» گازەتىنىڭ باس رەداكتورى قىزمەتىن اتقاردى.
1999 جىلدان 2007 جىلعا دەيىن «قازاق گازەتتەرى» جاق-نىڭ پرەزيدەنتى, باس ديرەكتورى, «انا ءتىلى» ۇلتتىق اپتالىعىنىڭ, «اقيقات» ۇلتتىق قوعامدىق-ساياسي جۋرنالىنىڭ باس رەداكتورى قىزمەتتەرىندە بولدى. قازىر «قازاق گازەتتەرى» جشس-نىڭ باس ديرەكتورى – رەداكتورلار كەڭەسىنىڭ توراعاسى.
ول 2004 جىلى «بۇقارالىق اقپارات قۇرالدارىنىڭ قازاقستاندىق ءپاتريوتيزمدى قالىپتاستىرۋداعى ءرولى» دەگەن تاقىرىپتا ساياسي عىلىمدارىنىڭ كانديداتى اتاعىن الۋ ءۇشىن ديسسەرتاتسيا قورعادى. ج.و.كەنجالين قازاقستان ۇكىمەتى جانىنداعى مەملەكەتتىك تەرمينولوگيالىق كوميسسيا مۇشەسى, ءحVىى شاقىرىلعان حالىق دەپۋتاتتارى الماتى قالالىق كەڭەسىنىڭ دەپۋتاتى بولىپ سايلاندى. ول «جەلكىلدەپ وسكەن قۇراقتاي» (1988ج.), «شىندىقتى شىراق ەتىپ ۇستاڭىز» (1998ج.), «ۇلت رۋحىن ۇلىقتاعان ۇرپاقپىز» (2005ج.), «ساياسي مەنەدجمەنت جانە ءباسپاسوزدىڭ جۇرتشىلىقپەن بايلانىس ماسەلەلەرى» (2010ج.), «ەر جاۋكە مىنبەگەنمەن التىن تاققا» (2011ج.) دەپ اتالاتىن كىتاپتاردىڭ اۆتورى.