باسقوسۋدا ارالدىڭ تاۋ-كەن ءوندىرىسى, ەنەرگيا جانە اۋىلدىق ايماقتاردى ەلەكترلەندىرۋ ءمينيسترى دەۆيد دەي پاچي ءسوز سويلەدى. ول مەملەكەتتىڭ بارلىق وڭىرلەرىندە جەل, كۇن جانە سۋ قۋاتى قالاي پايدالانىلاتىنىن تىلگە تيەك ەتتى. «سولومون ارالدارىنىڭ قالادا دا, اۋىلدا دا جاڭارتىلاتىن ارزان ەنەرگيا كوزدەرىنە قول جەتكىزۋدى قامتاماسىز ەتە الاتىن الەۋەتى بار. قازىرگى ۋاقىتتا ءبىزدىڭ وڭىرلەردە ەلەكتر قۋاتى شەكتەۋلى جانە مينيسترلىك سەنىمدى ءارى قولجەتىمدى ەنەرگيا جەتكىزىلىمدەرى ءۇشىن بىرقاتار جوبالاردى ىسكە اسىرۋدا. پروۆينتسيالاردى ەنەرگەتيكالىق دامىتۋ, تينا وزەنىنىڭ گيدروەنەرگەتيكاسىن ىلگەرىلەتۋ سەكىلدى بىرنەشە جوبا بويىنشا دونورلارمەن تىعىز بايلانىس ورناتتىق. بىزگە ءتاڭىر سىيلاعان رەسۋرستاردى نىعايتۋ جانە پايدالانۋ ماقساتىندا ۇكىمەتپەن جانە سولومون ارالدارىنىڭ حالقىمەن جۇمىس ىستەۋ ءۇشىن بارلىق الەۋەتتى ينۆەستورلاردى جانە ارىپتەس دونورلاردى شاقىرامىز», دەدى دەۆيد دەي پاچي.
سالتاناتتى شارا مارەسىنە جەتكەننەن كەيىن, قوناقتار 600 مىڭ عانا تۇرعىنى بار ەلدىڭ كورمەدەگى پاۆيلونىن ارالادى. سولومون ارالدارى – تىنىق مۇحيتىنىڭ وڭتۇستىك باتىسىندا ورنالاسقان 992 ارالدان تۇراتىن مەملەكەت. ەكى ەل اراسىنداعى ديپلوماتيالىق قارىم-قاتىناستار بەس جىل بۇرىن ورناعان. بۇل ارال تابيعي رەسۋرستارعا باي. الايدا, شيكىزاتتىڭ باسىم بولىگى ەكسپورتقا جىبەرىلەدى. سالدارىنان ەلدە جانار-جاعارماي, وتىن باعاسى قارىشتاپ تۇر. سول سەبەپتى, ارالدا بالامالى ەنەرگيا كوزدەرىن دامىتۋ – وتە وزەكتى ماسەلە.
2015 جىلى ينۆەستورلاردىڭ ارقاسىندا ەل استاناسى حونيارا قالاسىندا فوتوەلەكتر كۇن ستانساسى اشىلدى. قۇرىلعى تەك ەلوردانى عانا ەمەس, بۇكىل مەملەكەت اۋماعىنىڭ 7%-ىن بالامالى ەنەرگيامەن قامتاماسىز ەتەدى.