پرەمەر «اتامەكەن» ۇكپ-نىڭ پاۆلودارداعى وڭىرلىك كەڭەس مۇشەلەرىمەن كەزدەستى

كەزدەسۋدىڭ نەگىزگى تاقىرىپتارى قارجىلىق جانە زاڭنامالىق سيپاتتاعى مەملەكەتتىك قولداۋ شارالارى مەن بيزنەس ورتانى ودان ءارى جاقسارتۋ ماسەلەلەرى بولدى. اڭگىمە تەكسەرىستەر مەن تالاپتاردىڭ سانىن ازايتۋ جانە رۇقسات پەن انىقتامالار بەرۋ ۇدەرىستەرىن وڭتايلاندىرۋ جونىندە ءوربىدى.

ونەركاسىپتىك ءوڭىر ءۇشىن وزەكتى ماسەلەلەردىڭ ءبىرى - كاسىپورىنداردىڭ تەحنولوگيالىق جاڭعىرۋى بولىپ تابىلادى. جاڭعىرتۋ 3.0 اياسىندا ءوندىرىس ۇدەرىستەرىن تسيفرلاندىرۋ مەن اۆتوماتتاندىرۋ ەڭبەك رەسۋرستارىن ونەركاسىپتىك سەكتوردان بوساتۋعا اكەلەدى.

وسىعان وراي, ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋ اياسىندا بيزنەس قاۋىمداستىق پەن جەرگىلىكتى اتقارۋشى ورگاندار جاڭا جۇمىس ورىندارىن اشۋ, جۇمىستان بوساتىلعان مامانداردى قايتا وقىتۋ ءارى قايتا دايارلاۋ شارالارىن قولعا الۋى كەرەك. بۇل جۇمىستار تۋرالى پاۆلودار وبلىسىنىڭ اكىمى ب. باقاۋوۆ باياندادى.

ءوڭىر كاسىپكەرلەرى جاڭا جوبالارعا «پاۆلودار» اەا سالىقتىق جەڭىلدىكتەردىڭ قولجەتىمدىلىگى, «بيزنەستىڭ جول كارتاسى - 2020» باعدارلاماسى بويىنشا قاراجاتتاردىڭ قولجەتىمدىلىگى, وندىرۋشىلەردىڭ بىرىڭعاي ءتىزىمىن قالىپتاستىرۋ تاقىرىپتارىن قوزعادى.

بۇدان وزگە, پاۆلودارلىق كاسىپكەرلەر ءۇشىن وتاندىق وندىرۋشىلەردى جوسىقسىز كاسىپكەرلەردەن قورعاۋ, بيزنەس سۋبەكتىلەرىن شاعىن نەمەسە ءىرى ساناتىنا جاتقىزۋ بەلگىلەرىن انىقتاۋ ماسەلەلەرى وزەكتى بولىپ تابىلادى. سونداي-اق, «اتامەكەن» ۇكپ وڭىرلىك كەڭەسىنىڭ مۇشەلەرى وقىتۋ مەكەمەلەرىن ليتسەنزيالاۋ راسىمدەرىنە جانە ەلەكتروندى شوت-فاكتۋرالاردى شىعارۋ ۇدەرىستەرىنە قىزىعۋشىلىق تانىتتى.

وبلىس كاسىپكەرلەرىنىڭ ۇسىنىستارى مەن سۇراقتارىنا قر ۇلتتىق ەكونوميكا ءمينيسترى ت. سۇلەيمەنوۆ, قر ينۆەستيتسيالار جانە دامۋ ءمينيسترى ج. قاسىمبەك, قر ەنەرگەتيكا ءمينيسترى ق. بوزىمباەۆ, قر ءبىلىم جانە عىلىم ۆيتسە-ءمينيسترى ب. اسىلوۆا تۇسىنىكتەمە بەرىپ ءوتتى.

كەزدەسۋدە «اتامەكەن» ۇكپ باسقارما توراعاسىنىڭ ورىنباسارى ن. التاەۆ, وڭىرلىك ۇكپ مۇشەلەرى: «بونا» جشس ديرەكتورى ن. ەرەجەپوۆ, پاۆلودار يننوۆاتسيالىق ۋنيۆەرسيتەتىنىڭ قارجى جانە دامۋ جونىندەگى ۆيتسە-پرەزيدەنتى ل. فرەزورگەر, «پوبەدا» جشس ديرەكتورى ا. پولياكوۆ, «تپب اگرومير» جشس ديرەكتورى ن. پوپلاۆەتس, «قازەنەرگوكابەل» اق باس ديرەكتورى و. كرۋك, «تالاپكەر» شق باسشىسى ا. بەيسەمبينوۆ, «سوم-پۆ» جشس ديرەكتورى ا. دياك, «گاليتسكوە» جشس ديرەكتورى ا. كاسيتسىن ءسوز سويلەدى.