الايدا, ولاردىڭ ءبارى جارقىراپ شىققانمەن, ءتۇرلى سەبەپتەرمەن الەمدى مويىنداتا العان جوق. ءبىز بىرنەشە فۋتبولشىنىڭ ومىردە جىبەرگەن قاتەلىكتەرىنە توقتالىپ كورگەن ەدىك. ءبىرى تەرىس مىنەزىنىڭ سالدارىنان ۇلكەن قاتەلىكتەر جىبەرسە, ەندى ءبىرى ەۋروپانىڭ الپاۋىت ۇجىمدارىنا ەرتە اۋىسۋىنا بايلانىستى ءۇمىتتى اقتاي المادى.
ريكاردۋ كۋارەجما
پورتۋگاليانىڭ تالانتتى فۋتبولشىلارىنىڭ ءبىرى بولاتىن. «سپورتينگ» كلۋبىنىڭ اكادەمياسىنان شىققان. 17 جاسىندا-اق ءتۇرلى فينتتەرىمەن تاجىريبەلى قورعاۋشىلاردىڭ اراسىنان وڭاي سىتىلىپ وتەتىن. ءبىر كەزدەرى اقپارات قۇرالدارى ونىڭ ءتىپتى, وتانداسى كريشتيانۋ رونالدۋدان دا تالانتتىراق ەكەنىن جازعان. جاتتىعۋ كەزىندە رونالدۋ جاڭا ۇيرەنگەن ءفينتىن كورسەتسە, كۋارەجما ونى ەش قينالماستان بىردەن قايتالاپ بەرەتىن. بىراق مۇنداي دارىنىمەن قوسا ونىڭ وزىمشىلدىگى, وركوكىرەكتىگى, سونداي-اق شىدامسىزدىعى دا جوق ەمەس ەدى. جارتىلاي قورعاۋشى بولسا دا, قورعانىسقا كومەكتەسكەندى ۇناتپايتىن. وسىنداي تەرىس مىنەزىنىڭ سالدارىنان ۇلتتىق قۇرامانىڭ باپكەرلەرى ونى شاقىرۋدان باس تارتاتىن.
ونىڭ مىنەزى جايلى پورتۋگاليالىق مامان جوزە موۋرينيۋ: «ريكاردۋ وتە تالانتتى ويىنشى. بىراق ونىڭ ءالى ۇيرەنەرى كوپ. ول تارتىپكە باعىنىپ, ەموتسياسىن باعىندىرا ءبىلۋى كەرەك. ايتپەسە, ول ءوز دەڭگەيىنە جەتپەك تۇرماق, الاڭعا مۇلدەم شىقپاي قالۋى مۇمكىن. ول كوڭىل-كۇيدىڭ ادامى. كەشە باسقا ادام, بۇگىن مۇلدەم بولەك, ەرتەڭگى مىنەزىن ءبىلۋ تىپتەن قيىن» دەگەن ەدى ول 2008 جىلى. ايتقانى اينا-قاتەسىز كەلدى.
كۋارەجمانىڭ سپورتتىق جولىنا توقتالساق. باستاپقىدا «سپورتينگتە» ءجۇرىپ, الپاۋىت كوماندالاردىڭ نازارىنا ىلىكتى. 2003 جىلدىڭ جازىندا ونى «بارسەلونا» 6 ميلليون ەۋروعا ساتىپ الدى. الايدا, مۇندا ول نەگىزگى قۇراممەن نەبارى ون رەت, قوسالقى قۇراممەن ون ءبىر رەت قانا الاڭعا شىقتى. وسى ۋاقىتتا ءبىر گولمەن عانا كوزگە ءتۇستى. ماۋسىمنىڭ اياقتالۋىنا ءبىر اپتا قالعاندا جاراقات الىپ, 2004 جىلعى ەۋروپا چەمپيوناتىنا قاتىسا المادى. ءساتسىز ماۋسىمى ءۇشىن سول كەزدەگى باس باپكەر فرانك رايكااردتى جازعىرىپ, «ماعان الاڭدا ەركىندىك بەرۋگە ۋادە بەرگەن. رايكاارد تۇرعاندا «بارسەلونادا» وينامايمىن» دەپ جار سالعان ەدى. بىراق كەيىنىرەك وكىنىپ: «بارسەلونادا» ماعان شىدامدىلىق جەتىسپەدى. قوسالقى قۇراممەن بىرگە وتىرا المادىم. اقىماقتىق جاساعانىمدى مويىندايمىن» دەدى. ونىڭ بۇل ءسوزىن ۋەفا-نىڭ رەسمي سايتى جاريالادى.
سول جىلدىڭ جازعى ترانسفەرى كەزىندە «پورتۋ» بەلسەندىلىك تانىتىپ, ءوز قاتارىنا قوسىپ الدى. ونىڭ ەڭ ۇزدىك جىلدارى وسى كوماندادا ءوتتى. مۇندا ول پورتۋگاليانىڭ ۇزدىك ويىنشىسى اتاعىنا قول جەتكىزىپ, ەكى دۇركىن ەل چەمپيونى اتاندى. ءوز ەلىندە مىقتىلىعىن مويىنداتقاننان كەيىن ەۋروپانىڭ الپاۋىت ۇجىمدارىندا ونەر كورسەتۋدى ماقسات ەتتى.
2008 جىلى يتاليانىڭ «ينتەر» كومانداسى ونى 24,6 ميلليون ەۋروعا ساتىپ الدى (سالىستىرمالى تۇردە الار بولساق, ايگىلى برازيليالىق رونالدينو ءۇشىن «بارسەلونا» «پاري سەن جەرمەنگە» 24 ميلليون ەۋرو تولەگەن بولاتىن). بىراق مىنەزىنىڭ كەسىرىنەن ءتىپتى, وتانداسى جوزە موۋرينونىڭ كومانداسىنا دا ءسىڭىپ كەتە المادى. ناتيجەسىندە, سول جىلى 8 جەلتوقسانىندا يتاليادا ەڭ ناشار ويىنشىعا بەرىلەتىن «التىن جاشىك» سىيلىعىنا لايىق دەپ تانىلسا, وتانداسى كريشتيانۋ رونالدۋ ۇزدىك ويىنشىعا بەرىلەتىن «التىن دوپ» سىيلىعىنىڭ يەگەرى اتاندى.
2009 جىلدىڭ 2 اقپانىندا لوندوننىڭ «چەلسيىنە» جالعا بەرىلدى. مۇندا دا ونىڭ جاعدايى كەلىسە قويمادى. سەنىم ارتقان باپكەرى لۋيس فەليپپە سكولاري قىزمەتىنەن كەتىپ, ورنىنا گۋس حيددينك كەلدى. گوللانديالىق ماماننىڭ قول استىندا بار-جوعى بەس-اق رەت الاڭعا شىقتى. ودان كەيىن موۋرينوعا ورالىپ, سەنىمىن اقتاۋعا تىرىسپاق بولعان. بىراق «ينتەردىڭ» نەگىزگى قۇرامىنان ورىن الا المادى.
يتاليادان كەيىن «بەشيكتاشقا», ەگيپەتتىڭ «ال-احلي» كومانداسىنا باردى. بارلىق جەردە دە سەنىمدى اقتاي المادى. ساتسىزدىكتەرى ءۇشىن كلۋب باسشىلىعىن, باپكەرلەرىن جازعىرۋمەن بولدى.
«ماتچتاردان كەيىن قايتالاۋلاردى كورىپ, ءوزىمدى تانىماي قالاتىن كەزدەرىم بولاتىن. ءجوندى ويناي الماعانىمدى مويىندايمىن. دەگەنمەن, ءبىر جايتتى ءالى تۇسىنە الماي كەلەمىن. «ينتەرگە» جوزە موۋرينونىڭ ارقاسىندا كەلدىم. بىراق ماعان كوبىرەك مۇمكىندىك بەرمەدى» دەدى ريكاردۋ.
ال تۇركيادا جۇرگەندە كەزەكتى ويىنداردىڭ بىرىندە باپكەردىڭ الماستىرۋىنا نارازىلىعىن ءبىلدىرىپ: «سەن مەنىڭ ارقامدا عانا وسىندا ءجۇرسىڭ. مەنى الماستىرا الامايسىڭ. مەن بولماسام سەن ەشكىم ەمەسسىڭ» دەدى. بۇل وقيعا 2012 جىلدىڭ ناۋرىز ايىندا بولعان ەدى.
وسىنداي تەرىس مىنەزىنىڭ كەسىرىنەن كارەراسى ورگە جۇرمەدى.
روبينو (تولىق اتى – روبسون دە سوۋزا)
برازيليانىڭ تالانتتى جاستارىنىڭ ءبىرى بولاتىن. ءجاسوسپىرىم كەزىنەن-اق جۇرت ونى رونالدو, پەلە سىندى ايگىلى فۋتبولشىلاردىڭ ءىزباسارى دەپ سانايتىن. «سانتوستاعى» ءۇش جىلىندا 80 گولدىڭ اۆتورى اتاندى. ونىڭ دا مىنەزى شاتاق ەكەنى ەرتە كەزدەن بەلگىلى بولدى. ەۋروپانىڭ بىرقاتار كوماندالارىنان كەلگەن ۇسىنىستى «سانتوس» باسشىلىعى قابىلداماعان ەدى. سول كەزدە روبينو شۋ شىعارىپ, برازيليالىق كلۋبتىڭ نامىسىن قورعاۋدان باس تارتتى.
وسىدان كەيىن «سانتوس» ونى 2005 جىلى يسپانيانىڭ «رەالىنا» 25 ميلليون ەۋروعا ساتۋىنا تۋرا كەلدى. ارينە, ريكاردۋ كۋارەجماعا قاراعاندا بۇل جىگىتتىڭ ەۋروپاداعى العاشقى جىلى ويداعىداي ءوتتى. مادريدتىكتەردىڭ ساپىندا نەگىزگى قۇرامنان ورىن الدى. بىراق ءوز ەلىندەگىدەي جارقىراپ كوزگە تۇسە المادى. كلۋب باسشىلىعى وعان مۇمكىندىكتى دە كوپ بەردى. بىراق مادريدتە وتكىزگەن ءۇش جىلىندا دا ۇمىتتەرىن اقتاي المادى. وسى ۋاقىت ارالىعىندا 101 ويىنعا قاتىسىپ, 25 گول عانا سوقتى. 2008 جىلى «مانچەستەر سيتي» ونى 40 ميلليون ەۋروعا ساتىپ الدى.
روبينو جايلى سول كەزدەگى «رەالدىڭ» پرەزيدەنتى رامون كالدەرون بىلايشا ايتقان ەدى: «انگليادان ۇسىنىس تۇسكەننەن كەيىن ارا-قاتىناسىمىز قيىنداي ءتۇستى. روبينونىڭ «رەال» ساپىندا ويناعىسى كەلمەگەنى بەلگىلى بولدى. ءبىز ءۇشىن اقشا ماڭىزدى ەمەس ەدى. شىنى كەرەك, ونىڭ مىنەزى قيىن. كوڭىلىندە نە بار ەكەنى دە بەلگىسىز. كاسىبي فۋتبولشى بولعاننان كەيىن ول ءبىرىنشى فۋتبولدى ويلاۋى كەرەك. «مانچەستەر سيتيدەن» تۇسكەن ۇسىنىستى ويلانباستان قابىل الدى. ال بىزگە مۇنداي اداممەن بىرگە جۇمىس ىستەۋ وڭاي ەمەس. تالانتىنا كۇمان كەلتىرمەيمىن. كەشەگى كۇنگە دەيىن بەرند شۋستەر (سول كەزدەگى «رەالدىڭ» باس باپكەرى) ونى ىڭعايلى تۇستا پايدالانۋعا تىرىسىپ باقتى. بىراق روبينو ءوز تاڭداۋىن جاساپ قويدى».
ول انگلياداعى العاشقى جىلىندا كوماندانىڭ ۇزدىك ويىنشىلارىنىڭ ءبىرى بولدى. بىراق ەكىنشى ماۋسىمىنان باستاپ جولى بايلانا بەردى. جاراقاتتارى دا كوبەيدى. جالپى ايتقاندا بۇرىنعى دەڭگەيىنە كوتەرىلە المادى. ءتارتىپ ساقتاماۋىنا بايلانىستى كلۋب باسشىلىعى ونى بىرنەشە رەت جازالادى. ءجوندى ويناي الماعاندىقتان, 2010 جىلى «قالالىقتار» ونى «ميلانعا» ساتىپ جىبەردى.
يتاليادا العاشقى ماۋسىمىندا ءوزىن جاقسى قىرىنان كورسەتكەنمەن, جىل وتكەن سايىن دەڭگەيى تومەندەي بەردى. 2015 جىلى ءوز ەلىنە, بۇرىنعى «سانتوسىنا» ورالدى. برازيليادا دا ايتارلىقتاي وزگەرىس بايقالمادى. مۇنان كەيىن قىتايدىڭ «گۋانچجوۋ ەۆەرگراند» كومانداسىنا, ارتىنشا «اتلەتيكو مينەيروعا» باردى.
مىنە, وسىلايشا, پەلەنىڭ, رونالدونىڭ ءىزباسارى اتانادى دەگەن سەنىم بىرتە-بىرتە سونە بەردى. وعان نەگىزگى سەبەپتەردىڭ ءبىرى روبينونىڭ مىنەزى ەدى.
مارتەن ەدەگور – الەن حاليلوۆيچ
مارتەن ەدەگور – نورۆەگيالىق ويىنشى. 2015 جىلى «سترەمسگودسەت» كلۋبىنان ءمادريدتىڭ «رەالىنا» اۋىستى. يسپانيالىقتار 16 جاستاعى ويىنشى ءۇشىن ءتورت ميلليون ەۋرو تولەدى. جاس تا بولسا «رەال» پرەزيدەنتى فلورەنتينا پەرەس وعان جىلدىق جالاقىسى 2,25 ميلليون ەۋرونى قۇرايتىن كەلىسىمشارت ۇسىندى.
سول جىلدىڭ 23 مامىرىندا «حەتافەگە» قارسى ماتچتا كريشتيانۋ رونالدۋدىڭ ورنىنا الاڭعا شىعىپ, مادريدتىكتەردىڭ تاريحىنداعى ەڭ جاس دەبيۋتانت اتاندى (16 جاس, 156 كۇن). بۇل ونىڭ «رەالداعى» ازىرگە جالعىز ويىنى بولىپ قالدى. وسى جىلدىڭ قاڭتارىندا نيدەرلاندتىڭ «حەرەنۆەن» كلۋبىنا جالعا بەرىلدى.
الەن حاليلوۆيچ – حورۆاتيالىق جارتىلاي قورعاۋشى. «دينامو» زاگرەب كومانداسىنىڭ اكادەمياسىنان شىققان. 14 جاسىندا-اق ەۋروپانىڭ بىرقاتار ماماندارى ونى نازاردا ۇستادى. 16 جاسىندا «دينامو» ساپىندا الاڭعا شىعىپ, كلۋب تاريحىنداعى ەڭ جاس دەبيۋتانت اتاندى. ءدال وسى جاسىندا حورۆاتيا قۇراماسىمەن العاشقى ويىنىن وتكىزدى. وسىدان كەيىن وعان قىزىعۋشىلىق تانىتقان كوماندالاردىڭ قاتارى كوبەيدى. ويىن مانەرى جاعىنان ارگەنتينالىق ليونەل مەسسيگە ۇقساعاندىقتان جۇرت ونى «حورۆاتيالىق مەسسي» دەپ اتايتىن.
2014 جىلى «بارسەلونا» 17 جاستاعى ويىنشىنى 2,2 ميلليون ەۋروعا ساتىپ الدى. مۇندا ول كلۋبتىڭ جاستارىمەن بىرگە «بارسەلونا ب» كومانداسىندا وينادى. 2015 جىلى «بارسەلونا» باسشىلىعى كوبىرەك تاجىريبە جيناۋ ءۇشىن ونى يسپانيانىڭ «سپورتينگ» كومانداسىنا جالعا بەرۋدى ءجون كوردى. حيحوندىق ۇجىمدا ماڭىزدى ويىنشىلاردىڭ ءبىرى اتاندى. كەلەر جىلى «بارسەلونا» ونى گەرمانيانىڭ «گامبۋرگ» كومانداسىنا 5,5 ميلليون ەۋروعا ساتىپ جىبەردى. بىراق كەلىسىمشارت بويىنشا «كوك-انارلار» ونى ەكى جىل ارالىعىندا قايتىپ ساتىپ الۋ قۇقىعىنا يە بولدى.
وكىنىشكە قاراي, حاليلوۆيچ بۋندەسليگانىڭ ويىنىنا بەيىمدەلە المادى. مۇندا ول نەبارى التى ويىنعا عانا قاتىستى. بۇرىنعى دەڭگەيىنە كوتەرىلۋ ءۇشىن نەمىستەر ونى يسپانيانىڭ «لاس پالماس» ۇجىمىنا جالعا بەردى.
قوس جىگىتتىڭ فۋتبولداعى جولى ءالى الدا. بىراق ەڭ ۇلكەن قاتەلىكتەرىنىڭ ءبىرى – ءوز ەلدەرىنە تىم ەرتە كەتىپ, ەۋروپانىڭ الپاۋىت كوماندالارىنا اۋىسقاندىعى.
بويان كركيچ
كركيچ «بارسەلونانىڭ» اكادەمياسىنا 9 جاسىندا كەلدى. قاتارلاستارىنا قاراعاندا تاكتيكالىق جاعىنان دا, فيزيكالىق جاعىنان دا جىلدام دامىدى. وسىنداي قابىلەتىنىڭ ارقاسىندا وزىنەن ءبىر-ەكى جاس ۇلكەن بالالارمەن بىرگە دايىندالىپ ءجۇردى. جەتى ماۋسىمدا 800-دەن استام گول سوقتى.
كاتالوندىق كلۋبتىڭ ءبىرىنشى كومانداسىمەن بىرگە 2007 جىلى 17 جاسىندا الاڭعا شىعىپ, كوماندا تاريحىنداعى ەڭ جاس دەبيۋتانت اتاندى. وعان دەيىن بۇل رەكورد ليونەل مەسسيگە تيەسىلى بولاتىن. فرانك رايكاارد تۇسىندا ول «بارسەلونا» ساپىنداعى العاشقى ماۋسىمىندا 31 ويىنعا قاتىسىپ, 10 گولدىڭ اۆتورى اتاندى.
بىراق كەلەر جىلى كومانداعا حوسەپ گۆارديولا كەلگەننەن كەيىن بوياننىڭ جاعدايى قيىنداي بەردى. ەكى ماۋسىمدا بارلىعى 46 رەت الاڭعا شىعىپ, 10 گول عانا سوقتى. كومانداعا زلاتان يبراگيموۆيچ, داۆيد ۆيليا سىندى تاجىريبەلى شابۋىلشىلار كەزەك-كەزەگىمەن كەلگەننەن كەيىن گۆارديولا دا وعان اسا سەنىم ارتپادى. ونىڭ ۇستىنە «بارسەلونا» سەكىلدى الپاۋىت كوماندادان جانكۇيەرلەردىڭ ۇلكەن جەڭىستەر عانا كۇتەتىنى بەلگىلى. ال ۇلكەن جەڭىستەرگە سەپتىگى از تيگەن دارىندى ويىنشىلار قاتال سىنعا ۇشىرايدى. بويان كركيچ نەگىزگى قۇرامعا ىلىنە الماعاننان كەيىن بىرقاتار ماماندار سىنعا العان بولاتىن. ناتيجەسىندە, 2011 جىلى كوماندا اۋىستىرۋدى ءجون كورەدى.
سول جىلى «روماعا», ودان كەيىن «ميلان», «اياكس», «ستوك سيتي» كوماندالارىندا وينادى. بىراق «بارسەلوناداعى» العاشقى جىلىنداي اشىلا المادى. قازىر كەلىسىمشارتى «ستوك سيتيگە» تيەسىلى بولعانمەن گەرمانيانىڭ «ماينتس» ۇجىمىنا جالعا بەرىلدى. وسىلايشا بالا كۇنىندە 800-دەن استام گول سوققان كركيچ ۇلكەن فۋتبولعا كەلگەننەن كەيىن 80-گە جۋىق قانا دوپتىڭ اۆتورى اتاندى.
قازىر جاسى 26-عا كەلدى. ارينە, ءالى دە بولسىن ۋاقىتى بار. بىراق جانكۇيەرلەر بوياننان بۇدان دا ۇلكەن بيىكتىكتى كۇتكەن ەدى. مامانداردىڭ بولجامى بويىنشا بۇگىنگە دەيىن ۇزدىك سۇرمەرگەنگە بەرىلەتىن «التىن بۋتسا» سىيلىعىن ەڭ كەمىندە ءبىر رەت الۋى ءتيىس بولاتىن. بىراق بابى كەلگەنمەن, باعى جانبادى.
قورىتا ايتار بولساق, فۋتبولعا جاڭادان قادام باسقان جاستاردىڭ الدىندا ۇزاق جول تۇر. بۇل جولدا ولاردىڭ تالانتى دا, ادامدىق قاسيەتتەرى دە سىنعا تۇسپەك. جوعارىدا اتى اتالعان فۋتبولشىلاردىڭ كەمشىلىگى كوپشىلىك ءۇشىن ساباق بولۋعا ءتيىس.
دايىنداعان: ايان ءابدۋالي, «ەگەمەن قازاقستان»