10 شىلدەدەن باستاپ 12-16 جاس شاماسىنداعى 60 جاس سپورتشى مەن اقتوبە, اقمولا, قوستاناي, قاراعاندى, پاۆلودار جانە شىعىس قازاقستان وبلىستارىنان, سونداي-اق الماتى جانە استانا قالالارىنان 7 جاتتىقتىرۋشى لاگەرگە كەلىپ جەتتى. سەگىز كۇن بويى اسەرگە تولى مادەني باعدارلامالار مەن جاتتىعۋلاردان بالالاردىڭ ەرتەلى-كەش قولدارى بوسامادى دەۋگە بولادى.
بالالارعا ارنالعان جازعى لاگەردىڭ ۇيىمداستىرۋشىسى «قازاقستان رەسپۋبليكاسى شاڭعى جارىسىنىڭ ۇلتتىق فەدەراتسياسى» قب بالالارعا ارناپ سان ءتۇرلى باعدارلاما ازىرلەدى. سپورتشى بالالار باسسەيندە شومىلىپ, ۆوللەيبولدان جارىسقا قاتىستى. ناتيجەسىندە, اقمولا وبلىسىنىڭ كومانداسى ءبىرىنشى ورىندى قانجىعاسىنا بايلادى. سونىمەن قاتار, ولار اتپەن سەرۋەندەپ, ۇستەل تەننيسىن ويناپ جانە شاڭعى روللەرلەرىندە كوماندالىق جارىسقا قاتىسۋ مۇمكىندىگىن الدى. اتالمىش جارىستا دوستىق جەڭدى.
بالالاردىڭ قۋانىشىندا شەك جوق. سەبەبى, قازاقستاندا وسى تەكتەس لاگەر بۇرىن-سوڭدى بولماعان ەدى.
— لاگەرگە باراتىنىمدى بىلگەن جوقپىن, مەن تەك كوپ جاتتىعىپ, باپكەرلەردىڭ كوزىنە تۇسۋگە تىرىستىم. وسىلايشا, ولار مەنىڭ لاگەرگە براتىنىمدى ايتتى. قۋانىشىمدى سوزبەن ايتىپ جەتكىزۋ مۇمكىن ەمەس! ول جەردىڭ تابيعاتى, تازا اۋاسى, تاس جولدارى قاتتى ۇنادى. ال, كوماندامىز وتە ۇيىمشىل بولدى. اسەرگە تولى كۇندەرىمىزبەن قيماي-قيماي قوشتاستىق. الداعى ۋاقىتتا دا وسىنداي لاگەرلەر كوپتەپ ۇيىمداستىرىلسا ەكەن دەيمىن, – دەيدى اقمولا وبلىسىنان كەلگەن 15 جاسار سپورتشى كسەنيا سوروكينا. قازاقستان شاڭعى جارىسى ۇلتتىق فەدەراتسياسىنىڭ باس حاتشىسى اندرەي يگورەۆيچ نەۆزوروۆ لاگەردىڭ قازاقستاندا شاڭعى سپورتىن دارىپتەۋدىڭ وزىندىك فلەشموبىنا اينالعانىن ايتادى.
— بىزدە شاڭعى جارىسىنىڭ قالىپتاسقان جاقسى داستۇرىمەن قاتار ءوز چەمپيوندارىمىز دا بار. بۇگىندە بالالارعا ارنالعان لاگەردى ۇيىمداستىرۋ مۇمكىندىگى تۋىپ, ءار ايماقتان جاس سپورتشىلاردى شاقىرامىز دەپ شەشتىك. ولار مۇنداعى ۋاقىتتارىنىڭ كوپ بولىگىن ارينە, جاتتىعۋعا ارناعانىمەن, ولاردىڭ نازارىنا مادەني جانە الەۋمەتتىك شارالار دا ۇسىندىق. ەستەن كەتپەس اسەر مەن قۋانىشقا تولى ساتتەر سىيلادىق. ەڭ باستىسى, بالالار ءبىر-بىرىمەن تانىسىپ, ءتىپتى جاقىن دوستارعا اينالدى, - دەيدى اندرەي يگورەۆيچ.
سونداي-اق, نەۆزوروۆ اتالعان لاگەردىڭ سپورتتى دامىتۋ عانا ەمەس, وسكەلەڭ ۇرپاققا ءتالىم بەرۋ ماقساتىن كوزدەگەنىن العا تارتتى.
—قازىرگى ۋاقىتتا بالالاردىڭ كوبى بوس ۋاقىتتارىن تەلەفونعا تەلمىرۋمەن وتكىزەتىنى شىندىق. ال, لاگەردە ولار ءبىر-بىرىمەن جاقىن ارالاسىپ, اڭگىمەلەسىپ, شۇيىركەلەسەدى. جالپى سپورت لاگەرىندە قانداي دا ءبىر ىسپەن اينالىسىپ, جارىستارعا قاتىسقان كەزدە بوس جۇرۋگە ۋاقىتتارى بولمايدى. ەلىمىزدە سپورتپەن اينالىسۋ سانگە اينالعان. قازىرگى ۋاقىتتا, كىمدە-كىم سپورتپەن اينالىسسا, ول – مادەنيەتتى, ساۋاتتى, سىپايى ءارى پارساتتى ادام دەگەن باعا بەرىلەدى. العاشقى كۇننەن باستاپ, وسى قاسيەتتەردى جاس شاڭعىشىلاردىڭ بويىنا سىڭىرۋگە تىرىستىق, - دەيدى اندرەي يگورەۆيچ.
ايتا كەتسەك, اتالعان لاگەر ىلە الاتاۋى جوتاسىنىڭ بەتكەيىنەن 1500 مەتر بيىكتىكتەگى بىرەگەي جەردە, تالعار قالاسىندا ورىن تەپكەن.