– بۇل قويىلىمدى ءبىز ءبىر اي ىشىندە ازىرلەپ ۇلگەردىك, ماڭىزدى مۋزىكالىق ءارى رەجيسسەرلىك جۇمىس ءجۇرىپ جاتتى. مۇنى باسىندا وزىمە الىپ تۇرىپ, ىشتەي ءبىراز قوبالجىدىم, ويتكەنى كەز كەلگەن جاڭا, كۇردەلى پارتياعا تاۋەكەل ەتۋ ءۇشىن ادامعا جۇرەك كەرەك. سول تۇرعىدان كەلگەندە, «بۇل مەنىڭ قولىمنان كەلە قويار ما ەكەن؟» دەپ تولقىعانىم راس. بىراق ءبىر جاعىنان, بەلكانتو ءستيلىن شىڭداپ جاتىرمىن دەگەن زور قۋانىشپەن جۇمىسىمدى جالعاستىرا بەردىم, سەبەبى بۇل ءرولدىڭ ويداعىداي ورىندالۋى كەيىنگى باسقا سپەكتاكلدەرگە وڭ ىقپالىن تيگىزەرى ءسوزسىز. كۇندەر وتە كۇدىك كۇشى بىرتە-بىرتە ازايا بەردى. ماعان مۇنداعى مۋزىكالىق اۋرا قاتتى اسەر ەتتى. الەمگە ايگىلى انشىلەرمەن ءبىر ساپتا تۇرۋ ءانشى ءۇشىن قانداي باقىت ەكەنىن ونەر ادامدارى جاقسى بىلەدى. وسىنىڭ ءبارى مەنىڭ ساحناداعى جولىمدى, تىنىسىمدى اشتى. اكتەرلىك شەبەرلىگىمدى شىڭدادىم, ناتيجەسىندە كورەرمەنگە جاقسى ويىن مەن تەحنيكامدى كورسەتتىم. ارىپتەستەرىم مەنى وتە جوعارى باعالادى, – دەدى م.شوتاباەۆ اۆستريا ساپارى جايىندا.
سپەكتاكلدەن كەيىن سوليست تۋرالى مۋزىكالىق سىنشىلاردىڭ ماقالاسى جارىق كوردى. نەمىس تىلىندە شىعاتىن سونداي باسىلىمداردىڭ ءبىرى – «Kronen Zeitung» ول جايىندا: «قازاقستاندىق جاس ءانشى ءوزىنىڭ سىڭعىرلاعان كەڭ اۋقىمدى داۋسىن, يكەمدى تەحنيكاسىن پاش ەتتى» – دەپ جازدى.
قازاق ەلىنىڭ مارتەبەسىن شىنايى ونەرىمەن بيىكتەتكەن ءانشى قاي جەردە ونەر كورسەتسە دە بارلىق افيشالاردا ونىڭ ەسىمىمەن قوسارلانىپ «استانا وپەرا» تەاترى, قازاقستان اتاۋى بىرگە جۇرەدى ەكەن.
– بۇل ساپاردا وتە كولەمدى جۇمىس اتقارىلدى, كۇنارا ءان شىرقادىم, ءاردايىم كوتەرىڭكى كوڭىل كۇيدە بولدىم. ۆ.بەللينيدىڭ «نورما» وپەراسى بەلكانتو ءستيلى ۇلگىسىندەگى شىڭداردىڭ ءبىرى ەكەنىن اتاپ وتكەن ءجون. سپەكتاكلدەر اراسىندا براتيسلاۆاعا بارىپ قايتتىم, ول جەردە چايكوۆسكيدىڭ «ەۆگەني ونەگين» وپەراسىنداعى لەنسكي پارتياسىن ورىندادىم. وسىدان ساحنالىق مانسابىم ءوستى, بۇل پارتيانى تاعى برازيليادا ۇسىندىم. كورەرمەندەر مەن باسشىلىققا ۇناعانى سونشالىق, مەنى كەلەسى ماۋسىمدا دج.ۆەرديدىڭ «تراۆياتا» وپەراسىنداعى الفرەد پارتياسىن ورىنداۋعا شاقىردى, – دەپ الداعى ساپارلارى جايىندا دا ويىمەن ءبولىستى ءانشى.
مەدەت شوتاباەۆتىڭ شەتەلگە ساپارى ءۇش ايعا سوزىلىپتى. ەل ارالاپ, الىسقا اتىڭدى تانىتقان جاقسى ارينە, الايدا ء«وز ءۇيىڭ – ولەڭ توسەگىڭ» دەمەكشى, سۇيىكتى ءانشىسىن قازاقستاندىق جانكۇيەرلەر دە ابدەن ساعىنىپ قالعان ءتارىزدى. ە.برۋسيلوۆسكيدىڭ «قىز جىبەك» وپەراسىنان سۇيىكتى ءانشىسىنىڭ داۋسىن ەستىگەن جۇرت ەرەكشە تولقىپ, قوشەمەتتەپ ۇزاق قول سوقتى. ويتكەنى, بۇل وپەرادا مەدەت تولەگەننىڭ پارتياسىن ورىندادى. ال تامىزدا ءانشى اتاقتى ماەسترو پلاسيدو دومينگومەن بىرگە دج.ۆەرديدىڭ «تراۆياتا» سپەكتاكلىندە ونەر كورسەتپەك.
قاراشاش توقسانباي, «ەگەمەن قازاقستان»