«جالپى العاندا, جىلدىڭ ءبىرىنشى جارتىسىندا الەۋمەتتىك-ەكونوميكالىق دامۋدىڭ بارلىق كورسەتكىشتەرى بويىنشا وڭ ءوسىم قامتاماسىز ەتىلدى. مۇناي ءوندىرۋ كورسەتكىشىن جانە سايكەسىنشە, ونەركاسىپ ءوندىرىسىنىڭ كولەمىن قوسپاعاندا. بىراق, بۇل جەردە وبەكتيۆتى سەبەپ بار – مۇناي ءوندىرۋ كولەمىنىڭ تابيعي تومەندەۋى. بۇل – وزدەرىڭىزگە بەلگىلى. وكىنىشكە قاراي, بۇل كورسەتكىشكە ءبىز ەشقانداي اسەر ەتە المايمىز. 2017 جىل بولجامى – 6,8 ملن.توننا, 2016 جىلعا قاراعاندا 840 مىڭ تونناعا از, ال 4 جىل بۇرىنعى كورسەتكىشتەن 4,2 ملن تونناعا تومەندەگەن. بۇل, كورشىلەس اقتوبە وبلىسىنىڭ جىلدىق مۇناي ءوندىرۋ كولەمىنە سايكەس. جىل باسىنان ءبىز 450 مىڭ توننانى الا المادىق. جاعداي مۇنايدىڭ تۇراقسىز, تومەن باعاسىنا قاتىستى كۇردەلەنۋدە», دەدى وبلىس اكىمى.
اكىمنىڭ ايتۋىنشا شىعىننىڭ كولەمى مەن مۇناي سالاسىنىڭ ەكونوميكاعا ىقپالىن ەلىمىزدىڭ ۇلتتىق قورىنا تۇسەتىن تۇسىمدەرگە قاراپ-اق پايىمداۋعا بولادى. 2013 جىلدىڭ وزىندە مەملەكەت قازىناسىنا قىزىلوردا وبلىسىنان 500 ملرد. تەڭگە اۋدارىلعان بولسا, ال, بيىلعى جىل باسىنان بار بولعانى - 58 ملرد.تەڭگە.
وسىعان بايلانىستى ايماق باسشىلىعى ۇكىمەتتەن جاڭا كەن ورىندارىن بارلاۋ قۇقىعىن بەرەتىن كەلىسىمشارتتاردىڭ مەرزىمدەرىن ۇزارتۋ, ەكسپورتقا شىعارىلاتىن مۇناي كولەمىن ارتتىرۋ ماسەلەلەرىن تەزدەتىپ قاراۋدى سۇراعان بولاتىن. سونداي-اق, وڭىردەگى ۋران ءوندىرۋ كولەمىن قىسقارتپاۋ ماسەلەسى دە قويىلدى.
ايتا كەتۋ كەرەك, قىزىلوردا وبلىسىندا مۇناي قورىنىڭ ازايۋىنا بايلانىستى شيكىزاتقا تاۋەلدىلىكتەن ارىلىپ, قۇرىلىس كولەمىن ارتتىرۋ جانە جاڭا ءوندىرىس ورىندارىن اشۋ ماقساتىندا ءوڭىر ەكونوميكاسىن ءارتاراپتاندىرۋدى كوزدەيتىن 2020 جىلعا دەيىنگى دامۋ باعدارلاماسى ازىرلەندى. ايماق وڭدەۋ ونەركاسىبىنىڭ دامۋى بويىنشا رەسپۋبليكادا الدىڭعى قاتاردا, بۇل وبلىس ەكونوميكاسىنداعى قۇرىلىمدىق وزگەرىستەر مەن ءارتاراپتاندىرۋدىڭ قارقىنىن كورسەتەدى. مۇنداي قارقىندى دامۋ ينۆەستيتسيا تارتۋ, قۇرىلىس, اوك دامىتۋ جانە الەۋمەتتىك سالادا دا بار.
بۇگىن قىزىلوردا وبلىسىندا وبلىستىق ءماسليحاتتىڭ ءحىV سەسسياسى ءوتىپ, وندا وبلىس اكىمى قىرىمبەك كوشەرباەۆ ايماقتىڭ ءبىرىنشى جارتىجىلدىقتاعى الەۋمەتتىك-ەكونوميكالىق دامۋ قورىتىندىسى تۋرالى باياندادى.