بىرەگەي جوبانىڭ قويۋشى ديريجەرى - الەمدە سۇرانىسقا يە ماەسترولاردىڭ ءبىرى, «استانا وپەرا» تەاترىنىڭ باس ديريجەرى الان بورىباەۆ بولىپ تابىلادى.
«№8 سيمفونيا - ەشبىر ادام مەكەن ەتپەيتىن ەلسىز ارالعا وزىمەن بىرگە جەتەلەيتىن شىعارمالاردىڭ ءبىرى, سول جەردە وسى ءبىر تاڭعاجايىپ مۋزىكانى ۇنەمى تىڭداۋمەن بولۋشى ەدىم. قىزىقتى ءبىر جايت: 1910 جىلدىڭ قىركۇيەگىندەگى تۇساۋكەسەر كەزىندە ەۋروپادا «ەكسپو» كورمەسى ءوتىپ جاتقان بولاتىن. ءدال سول كەزدە ورىنداۋشىلاردىڭ سانى بويىنشا «مىڭ قاتىسۋشى سيمفونياسى» دەگەن اتاۋ العاش رەت پايدالانىلعان ەدى. وسىنداي اسا ءىرى جوبانى ىسكە اسىرۋ - كەز كەلگەن ۇجىم ءۇشىن كۇردەلى سىن. ءبىر ۇلكەن حور مەن وركەسترگە بىرىكتىرۋ ءۇشىن الدىمەن ءبىر ۇجىمنان ەكىنشىسىنە كوشىپ ءجۇرىپ, وتە كوپ دايىندالامىن. بىرلىك, باۋىرلاستىق, جالپىعا ورتاق ماحاببات يدەياسى ءار كەزدە دە وزەكتى ءارى وسى نيەتتىڭ قوزعاۋشى كۇشى بولدى, ونىڭ ۇستىنە بۇل سيمفونيانىڭ باستى ويى - ءبىزدىڭ بارلىق عالام ماحابباتتان جارالعان دەگەن پىكىرگە سايادى. پرەمەرا شىنىمەن دە الەمدە تەڭدەسى جوق بىرەگەي وقيعا بولماق», - دەپ اتاپ ءوتتى الان بورىباەۆ.
كونتسەرتكە «استانا وپەرا» تەاترىنىڭ جەتەكشى سوليستەرى سالتانات احمەتوۆا, جۇپار عابدۋللينا, ايگۇل نيازوۆا, نۇرلان بەكمۇحامبەتوۆ, تاتيانا ۆيتسينسكايا, سونىمەن قاتار اباي اتىنداعى ماوبت جەتەكشى سوليستەرى وكسانا داۆىدەنكو, ولەگ تاتاميروۆ, تاير تاجيگۋلوۆ قاتىسادى.
ۇيىمداستىرۋشىلاردىڭ حابارلاۋىنشا, گۋستاۆ مالەردىڭ عالامات تۋىندىسىن «استانا وپەرانىڭ» سيمفونيالىق وركەسترى, حورى جانە بالالار حورى, سونداي-اق اتاقتى يتالياندىق كارلو فەليچە (گەنۋيا قالاسى) تەاترىنىڭ, اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ وركەسترى مەن حورى, قازاقستان رەسپۋبليكاسى مەملەكەتىك اكادەميالىق سيمفونيالىق وركەسترى مەن «سوليستەر اكادەمياسى» مەملەكەتتىك كامەرالىق وركەسترى ورىندايتىن بولادى.
ولارعا قازاقستاندىق جەتەكشى حور ۇجىمدارى قوسىلادى: اتاپ ايتقاندا, ب.بايقاداموۆ اتىنداعى مەملەكەتتىك حور كاپەللاسى, وڭتۇستىك قازاقستان وبلىستىق وپەرا جانە بالەت تەاترىنىڭ حورى, ع.جۇبانوۆا اتىنداعى اقتوبە وبلىستىق فيلارمونياسىنىڭ قازاق كامەرالىق حورى, قازاق ۇلتتىق ونەر ۋنيۆەرسيتەتىنىڭ ارالاس حورى, ۇلدار حورى, «ەلىگاي» بالالار حورى, ا.جۇبانوۆ اتىنداعى رەسپۋبليكالىق دارىندى بالالارعا ارنالعان مامانداندىرىلعان مۋزىكالىق قازاق ورتا مەكتەپ-ينتەرناتىنىڭ, ك.بايسەيىتوۆا اتىنداعى رەسپۋبليكالىق دارىندى بالالارعا ارنالعان مامانداندىرىلعان مۋزىكالىق ورتا مەكتەپ-ينتەرناتىنىڭ, م.تولەباەۆ اتىنداعى مۋزىكالىق №5 مەكتەپتىڭ, پ.چايكوۆسكي اتىنداعى مۋزىكالىق كوللەدجدىڭ بالالار حورى جانە استانا, الماتى, پاۆلودار, پەتروپاۆل, اقتوبە, كوكشەتاۋ, سەمەي, ورال قالالارىنان كەلگەن باسقا دا قۇرامدار بار.