«نۇرلى جەر» باعدارلاماسى ەكىنشى دەڭگەيلى بانكتەر بەرەتىن سىياقى مولشەرلەمەسىن سۋبسيديالاۋ ارقىلى يپوتەكالىق نەسيەنىڭ قولجەتىمدىلىگىن ارتتىرۋعا باعىتتالعان. سۋبسيديالاۋ ەكىنشى دەڭگەيلى بانكتەردىڭ ءۇي سالۋشىدان العاشقى تۇرعىن ءۇي الۋعا بەرىلگەن يپوتەكالىق تۇرعىن ءۇي قارىزدارى بويىنشا جۇرگىزىلەدى.
– قازىر ەكىنشى دەڭگەيلى بانكتەر تۇرعىندارعا جىلىنا 17 پايىزبەن يپوتەكا بەرەدى, ەندى اتالعان باعدارلاما ارقىلى مەملەكەت يپوتەكالىق قارىزدىڭ سىياقى مولشەرلەمەسىنىڭ 6-7 پايىزىن سۋبسيديالايتىن بولادى, – دەپ حابارلادى اتىراۋ وبلىستىق قۇرىلىس باسقارماسىنىڭ باسشىسى مالىك امانوۆ. – ناتيجەسىندە, قارىز الۋشىنىڭ اي سايىنعى تولەمى 30-40 پايىزعا ازايادى. ايتا كەتۋ كەرەك, باعدارلاماعا قاتىسۋ ءۇشىن يپوتەكا كەزەگىنە تۇرۋ تالاپ ەتىلمەيدى, تۇرعىن ۇيلەرىنىڭ سانى ماڭىزدى ەمەس جانە قوسىمشا كوميسسيالار جوق. «نۇرلى جەر» باعدارلاماسى بويىنشا قر-نىڭ كەز كەلگەن ازاماتى يپوتەكالىق قارىز الۋعا ءوتىنىش بەرە الادى.
باعدارلامانى جۇزەگە اسىرۋ باسپانا العىسى كەلەتىندەرگە دە, باعدارلاماعا قاتىساتىن ءۇي سالۋشىلارعا دا ءتيىمدى.
– ەدب سۋبسيديالاۋ تۋرالى شەشىم قابىلدانعان كەزدە قازاقستان رەسپۋبليكاسى ۇلتتىق بانكىنىڭ بازالىق مولشەرلەمەسىنىڭ 5 پايىزىنان اسپايتىن سىياقى مولشەرلەمەسى بويىنشا قارىز بەرەدى, - دەيدى «دامۋ» كدق» اق اتىراۋ وبلىسى بويىنشا ايماقتىق بولىمشەسىنىڭ ديرەكتورى Əليا وتەپقاليەۆا. – قارىز الۋشىنىڭ نەسيەسى بويىنشا جىلىنا سىياقى مولشەرلەمەسىنىڭ 7 پايىزىن ەدب-كە مەملەكەت تولەيدى.
يپوتەكالىق نەسيەلەۋدىڭ قولجەتىمدىلىگىن ارتتىرۋ, جەكە كومپانيالاردىڭ تۇرعىن ءۇي سالۋىن ىنتالاندىرۋمەن قاتار «نۇرلى جەر» باعدارلاماسىنىڭ باسقا دا ماقساتتارى بار.
بۇگىندە اتىراۋ وبلىسىندا «نۇرلى جەر» باعدارلاماسىمەن حالىقتىڭ الەۋمەتتىك تۇرعىدان ءالسىز توبى ءۇشىن نەسيەلىك جانە جالعا بەرىلەتىن تۇرعىن ءۇي قورىن قۇرۋ اياسىندا جالپى اۋدانى 135,6 مىڭ شارشى مەتر بولاتىن, 2007 پاتەرلى 37 تۇرعىن ءۇيدىڭ قۇرىلىسى ءجۇرىپ جاتىر. قۇرىلىس جۇمىستارى جىل سوڭىنا دەيىن اياقتالادى. بيىلعى 6 ايدا 291,8 مىڭ شارشى مەتر تۇرعىن ءۇي پايدالانۋعا بەرىلدى, ياعني 12 ءۇي, 717 پاتەر, – دەيدى اتىراۋ وبلىستىق قۇرىلىس باسقارماسىنىڭ باسشىسى مالىك امانوۆ. – سونىمەن قاتار, بيىل ينجەنەرلىك-كوممۋنيكاتسيالىق ينفراقۇرىلىم قۇرىلىسىنا 11,2 ملرد تەڭگە ءبولىندى, ول تۇرعىن ءۇي قۇرىلىسىنىڭ قارقىنىن جەدەلدەتۋگە مۇمكىندىك بەرەدى. قازىر 4 368 پاتەردەن تۇراتىن 43 كوپ پاتەرلى تۇرعىن ءۇيدىڭ جوبالىق-سمەتالىق قۇجاتتاماسى دايىندالۋ ۇستىندە. قۇرىلىس 2018 جىلى اتىراۋ قالاسىنىڭ «بەرەكە», «نۇرسايا» ىقشاماۋداندارىندا جوسپارلانعان. بيىل اتالعان جوبالاردىڭ ىشىندە جەرگىلىكتى بيۋدجەت ەسەبىنەن 2118 پاتەرلى 14 تۇرعىن ءۇيدىڭ قۇرىلىسى باستالادى.
قۇرىلىس باسقارماسىنىڭ باسشىسى مالىك امانوۆتىڭ ايتۋىنشا, ءۇي سالۋشىلار «نۇرلى جەر» باعدارلاماسىنا بەلسەندى قىزىعۋشىلىق تانىتۋدا, قازىر بانكتەر بىرنەشە جوبالاردى قاراپ جاتىر. بولجام بويىنشا ازاماتتاردان ءوتىنىش قابىلداۋ 2017 جىلدىڭ تامىز ايىندا باستالادى.
كۇنى بۇگىن باعدارلاماعا قاتىسۋعا 7 بانك قولداۋ كورسەتىپ وتىر, ولار: «تسەسنابانك» اق, «سبەربانك» اق, «بانكتسەنتركرەديت» اق, «بانك RBK» اق, «اتفبانك» اق, «قازاقستاننىڭ تۇرعىن ءۇي جيناق بانكى» اق, «Tengri Bank» اق. «بانكتسەنتركرەديت» پەن «اتفبانك» ءوتىنىش قابىلداۋدى باستادى.
باقىتگۇل باباش, «ەگەمەن قازاقستان»