كەشە استانادا وتكەن ساۋدا-ەكونوميكالىق ىنتىماقتاستىق جونىندەگى قازاقستان-گەرمانيا ۇكىمەتارالىق جۇمىس توبىنىڭ 11-ءشى وتىرىسىندا دا ەكى ەل اراسىنداعى قارىم-قاتىناستىڭ جاي-كۇيى جان-جاقتى تالقىلاندى. بۇل باسقوسۋ گەرمانيا فەدەراتيۆتىك رەسپۋبليكاسىنىڭ پرەزيدەنتى فرانك-ۆالتەر شتاينمايەردىڭ ەلىمىزگە رەسمي ساپارى اياسىندا ۇيىمداستىرىلدى. وتىرىسقا ەلىمىزدىڭ ينۆەستيتسيالار جانە دامۋ ۆيتسە-ءمينيسترى ەرلان حايروۆ جانە گفر ەكونوميكا جانە ەنەرگەتيكا فەدەرالدى مينيسترلىگىنىڭ سىرتقى ەكونوميكالىق ساياسات دەپارتامەنتىنىڭ ديرەكتورى ەگحارت فرانتس توراعالىق ەتتى.
جۇمىس توبى وتىرىسىندا ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى قارالدى. ماسەلەن, ەنەرگەتيكا سالاسى بويىنشا تيىمدىلىك, قورشاعان ورتانى قورعاۋ جانە جاسىل ەكونوميكا, شيكىزات, ونەركاسىپ جانە تەحنولوگيا, ءبىلىم, تۋريزم, ينفراقۇرىلىم ساپاسى, كولىك لوگيستيكاسى, اۋىل شارۋاشىلىعى, تاعى باسقا ماسەلەلەر تالقىلاندى. سونداي-اق, ەكونوميكالىق دامۋ جانە ىنتىماقتاستىق ۇيىمى كوميتەتتەرىمەن جۇمىس اياسىنداعى ىنتىماقتاستىق جايىنا نازار اۋداردى.
ۆيتسە-مينيستر ەرلان حايروۆ ءوز كەزەگىندە گەرمانيانىڭ ەنەرگيالىق تيىمدىلىك پەن ەنەرگيا ۇنەمدەۋ بويىنشا الەمدىك كوشباسشى ەكەنىن اتاپ ءوتتى. جاڭعىرمالى ەنەرگيا كوزدەرى مەن گەرمانيانىڭ مامانداندىرىلعان ەكسپو-2017 حالىقارالىق كورمەسىنە بەلسەنە قاتىسۋى ەكى ەلدىڭ بولاشاقتاعى ءوزارا ءىس-قيمىلىنىڭ پەرسپەكتيۆالارى مەن جوعارى دەڭگەيىن ايعاقتايتىنىن جەتكىزدى. ال شەتەلدىكتەر قازاقستاننىڭ ينۆەستيتسيالىق احۋالىنىڭ زور الەۋەتىن ايتىپ, قىزىعۋشىلىقتارىن جەتكىزدى.
قوس تاراپ گەرمانيانىڭ وزىق تەحنولوگياسى مەن ءبىلىمىن جانە تاجىريبەسىن قولدانۋعا باعىتتالعان ەكونوميكالىق ءوزارا ءىس-قيمىلدى دامىتۋ ماسەلەلەرىن ايرىقشا اتادى. نەگىزىنەن, ءبىز ءۇشىن نەمىس تەحنولوگياسى, تاۋارى قاشاندا ساپالى, ۇنەمدى بولادى دەگەن تۇسىنىك بۇرىننان قالىپتاسقان. ال نەمىستەر وزدەرى تۋرالى قالىپتاستىرعان بۇل «برەندتەرىن» قازىرگى كۇنى دە جويعان جوق. ارينە, گەرمانيادان ۇيرەنەرىمىز كوپ. سول سەبەپتى دە ەلىمىز گەرمانيا سياقتى الپاۋىت ەلمەن سەنىمدى سەرىكتەس بولۋعا مۇددەلى.
ەلدەردىڭ ساۋدا-ەكونوميكالىق بايلانىسىنىڭ ءساتتى شىققان ۇلگىسى رەتىندە ينۆەستيتسيالار جانە دامۋ مينيسترلىگى مەن گەرمانيانىڭ «DENA» ەنەرگەتيكالىق اگەنتتىگى اراسىنداعى قازاقستاندا ەنەرگەتيكالىق سەرۆيستىك نارىقتى دامىتۋ مودەلىن ازىرلەۋ جونىندەگى ىنتىماقتاستىعىن ايرىقشا ايتۋعا بولادى. سونداي-اق, «قازاقستاننىڭ يندۋستريانى دامىتۋ ينستيتۋتى» اق پەن گەرمانيانىڭ فراۋنگوففەرا ينستيتۋتى اراسىنداعى «يندۋستريا 4.0» تەحنولوگياسىن ەنگىزۋ سالاسى بويىنشا قازاقستان ونەركاسىبىن تسيفرلاندىرۋ ىنتىماقتاستىعى دا ءتيىمدى جۇزەگە اسۋدا. گەرمانيالىق سەرىكتەستەرمەن شيكىزات, ونەركاسىپ جانە تەحنولوگيا سالالارىنداعى سەرىكتەستىك تۋرالى ۇكىمەتارالىق كەلىسىم اياسىندا دا قولعا الىنعان بىرقاتار جوبالار بار. ايتالىق, قازاقستاندىق 3 تسەمەنت ءوندىرۋ زاۋىتىندا جۇزەگە اسقان «HeidelbergCement» كومپانياسىنىڭ جوبالارىن, «قازگەولوگيا» اق پەن «Ulmus Fund» كومپانياسىنىڭ قاراعاندى وبلىسىنداعى مىس, ءتۇرلى-ءتۇستى جانە قىمبات مەتالداردى بىرلەسىپ بارلاۋ جوباسى, جامبىل وبلىسىنداعى جوبالىق قۋاتتىلىعى جىلىنا 5100 كگ التىن قۇيماسىن جانە باسقا دا مەتالدار وندىرەتىن «Aurum Deutschland» جشس كەن مەتاللۋرگيالىق كومبيناتى مەن التىن كەن ورنىن يگەرەتىن قۇرىلىس جوبالارىن مىسالعا كەلتىرۋگە بولادى.
قازاقستان-گەرمانيا ىسكەرلىك كەڭەسى تۇراقتى تۇردە جۇمىس ىستەۋدە. قازىردىڭ وزىندە گەرمانيالىق ينۆەستورلاردىڭ قاتىسۋىمەن 2020 جىلعا دەيىن جالپى قۋاتى 189 مۆت بولاتىن جاڭعىرمالى ەنەرگيا كوزدەرى جونىنەن 5 جوبانى جۇزەگە اسىرۋ بويىنشا جۇمىستار جۇرگىزىلىپ جاتىر. ال كەزەكتى وتىرىستىڭ قورىتىندىسىندا 872 ملن ەۋرو سوماسىنداعى 21 قۇجاتقا قول قويىلدى.
دينارا بىتىك, «ەگەمەن قازاقستان»