ويىننىڭ العاشقى مينۋتتارىنان-اق العا ۇمتىلعان «استانا» فۋتبوشىلارى الاڭ يەلەرى قاقپاسىنا ءجيى شابۋىلداعانىمەن, گول سوعا المادى. وسى رەتتە, ءوز قاقپاسىن 100 پايىزدىق گولدان امان ساقتاپ قالعان «سپارتاك» كلۋبىنىڭ قاقپاشىسىن ەرەكشە اتاپ وتكەن ءجون. بۇل قاقپاشى بولماعاندا ەلوردالىق كلۋب كەلەسى كەزەڭنىڭ ماسەلەسىن ءبىرىنشى تايمدا-اق شەشىپ قوياتىن ەدى. دەگەنمەن ءبىرىنشى 45 مينۋتتا ەسەپ اشىلمادى.
ەكىنشى تايمدا الاڭ يەلەرى بەلسەندىلىك تانىتا باستادى. «استانا» دا ءساتى تۇسكەندە ەسەپ اشۋعا تىرىستى. ويىننىڭ 73-مينۋتىندا قارسىلاس كلۋبتىڭ قاقپاسى ماڭىندا ايىپ سوققىسىن ورىنداعان پاتريك تۆۋماسي اۋەلەتە پاس بەرۋدىڭ ورنىنا, جاقىن بۇرىشقا سوققى جاساپ, ەسەپتى اشتى. بۇل ەسەپ ويىن سوڭىنا دەيىن ساقتالىپ, «استانانىڭ» جەڭىسىمەن اياقتالدى.
سوڭعى ەكى ەۋروماۋسىمدا چەمپيوندار ليگاسى مەن ەۋروپا ليگاسىنىڭ توپتىق كەزەڭىندە ويناپ, تاجىريبە جيناقتاعان استانالىقتار ءۇشىن ەكىنشى كەزەڭ ماتچتارى قيىندىق تۋعىزباۋى ءتيىس ەدى. ونىڭ ۇستىنە, بۇل كەزەڭدەگى قارسىلاسىن ازۋلى دەپ ايتا المايمىز. لاتۆيالىق «سپارتاك» چەمپيوندار ليگاسىنا ءوز تاريحىندا تۇڭعىش رەت قاتىسىپ وتىرعانىن دا ايتا كەتكەن ءجون.
ماتچتان كەيىنگى ءباسپاسوز ءماسليحاتىندا «استانا» كلۋبىنىڭ باس باپكەرى ستانيمير ستويلوۆ الاڭنىڭ ساپسى ويىنعا كەرى اسەر ەتكەنىن ايتادى. «الاڭعا ويىن بولاتىن كۇنى سۋ شاشىلماعانى مەن ءۇشىن دە «توسىنسىي» بولدى. ەكى كۇن وسىندا دايىندالدىق, كۇندە سۋارىلعان, دوپ ورنىمەن دومالاپ ءجۇردى. بۇگىن تاڭەرتەڭ عانا الاڭعا سۋ شاشىلمايتىنىن ايتتى. ونى كىم ويلاپ تاپقانىن بىلمەيمىن, بىراق ويىن دەڭگەيى بىردەن 40%-عا ءتۇسىپ كەتتى. الاڭ دوپتىڭ جىلدام قوزعالىسىنا كەدەرگى كەلتىردى. كۇندە سۋدى قۇيىپ تۇرىپ, بۇگىن نەگە سۋارماعانىن مەن دە تۇسىنبەدىم. بۇل دا ادەمى ويىنعا كەدەرگى كەلتىرەتىن كىشكەنە سەبەپتەردىڭ ءبىرى», دەيدى ول.
ايتا كەتەيىك, قوس كوماندا اراسىنداعى قارىمتا ويىن 18 شىلدە كۇنى «استانا ارەنا» ستاديونىندا وتەدى.
ءالي بيتورە,
«ەگەمەن قازاقستان»