«جاسىل كوپىر» ارقىلى «جاسىل تەحنولوگيا» ورتالىعىنا جەتەمىز...

سونىمەن قاتار, پاريج كليماتتىق كەلىسىمىن ىسكە اسىرۋ جانە «جاسىل» قار­جىنى موبيليزاتسيالاۋ ءۇشىن تومەن كومىرتەكتى تەحنولوگيالار مەن ساياسات جو­نىندە ءسوز بولماق. جيىنعا نوبەل سىي­­لىعىنىڭ لاۋرەاتى راە كۆون چۋنگ, پاكىستاننىڭ كليماتتى وزگەرتۋ جو­نىندەگى فەدەرالدى ءمينيسترى زاحيد حا­ميد, قازاقستانداعى بۇۇ دامۋ باع­دار­لا­ماسىنىڭ تۇراقتى وكىلى نوريماسا شيمومۋرا جانە باسقا دا حالىقارالىق جا­نە ۇكىمەتتىك ەمەس ۇيىمداردىڭ, بيزنەس قوعامداستىقتىڭ جوعارى لاۋازىمدى وكىل­دەرى قاتىسۋدا.  باسقوسۋ بارىسىنداعى ءباسپاسوز ءماس­ليحاتىندا ەنەرگەتيكا ءمينيسترى قا­نات بوزىمباەۆ قازاقستان ۇلتتىق دەڭ­گەيدە ەكونوميكانى جاڭعىرتۋدىڭ اۋ­قىمدى باعدارلاماسىن جۇزەگە اسىرۋعا كىرىس­كە­نىن جەتكىزدى. «جاسىل» ەكونوميكاعا كو­شۋ ءۇشىن زاڭنامالىق بازا قۇرىلدى. قازاقستان ورتالىق ازيا ەلدەرى اراسىندا ءبىرىنشى بولىپ مەملەكەتتىك دەڭگەيدە «جاسىل» ەكونوميكاعا كوشۋدىڭ ستراتەگيالىق قۇجاتىن قابىلداپ, ونى ءتورت جىلدان بەرى ءساتتى ىسكە اسىرىپ كەلەدى. وڭىرلىك تۇرعىدا قازاقستان ەنەرگيالىق قاۋىپسىزدىك جۇيەسىن قامتاماسىز ەتۋدە جاۋاپكەرشىلىگى جوعارى ءارى سەنىمدى قاتىسۋشى رەتىندە ءوزىن كورسەتۋدە. ەلىمىز تۇراقتى ساياسي جانە ەكونوميكالىق دامۋعا ۇندەۋ جا­ساپ كەلەدى. وتكەن جىلى پاريجدىك كلي­ماتتىق كەلىسىم كۇشىنە ەندى. بارلىق ەلدەردىڭ الدىندا عاسىردىڭ سوڭىنا دەيىن ەكى گرادۋستىق دەڭگەيدى ۇستاپ تۇرۋ ماقساتى تۇر. قازاقستان پارنيكتىك گازدار شىعارىندىلارىن 1990 جىلداعى دەڭگەيگە قاراعاندا 2030 جىلعا قاراي 15 پايىزعا تومەندەتۋ مىندەتىن وزىنە الدى. جاڭاراتىن ەنەرگيا كوزدەرىن دامىتۋ, ەنەرگيا ۇنەمدەۋ, ەنەرگيا تيىمدىلىكتى ارتتىرۋ, كولىكتى ەكولوگيالىق تازا وتىن تۇرلەرىنە كوشىرۋ, سونداي-اق, ورماندى القاپتاردىڭ اۋماعىن ارتتىرۋ سەكىلدى شارالاردى ىسكە اسىرۋ العا قويىلعان ماقسات-مىندەتتى ورىنداۋعا مۇمكىندىك بەرەدى», دەدى مينيستر. ونىڭ سوزىنە قاراعاندا, «جاسىل كوپىر» سەرىكتەستىك باع­دارلاماسى «جاسىل» تەحنولوگيالار ترانسفەرتى جولىمەن بەلگىلەنگەن ماق­سات­تارعا قول جەتكىزۋدە ماڭىزدى ءرول اتق­ارا الادى. جوعارىدا اتالعان شارالاردى جۇزەگە اسىرۋعا قولداۋ كورسەتۋ ءۇشىن «جا­سىل» كليماتتىق قوردىڭ جانە وزگە دە حا­لىق­ارالىق قارجى ينستيتۋتتارىنىڭ ينۆەستيتسياسىن تارتۋ قاراستىرىلىپ وتىر.  ەنەرگەتيكا ءمينيسترى ەلىمىزدە «جا­سىل كوپىر» باستاماسىن دامىتۋدىڭ كە­لەسى قادامى «جاسىل تەحنولوگيالار» حالىقارالىق ورتالىعىن قۇرۋمەن جال­­عاساتىنىن جەتكىزدى. قازاقستان  پرەز­يدەنتىنىڭ بۇل باستاماسىنا بۇگىندە حالىقارالىق ۇيىمدار قولداۋ بىلدىرگەن. «قازاقستان دايەكتى تۇردە «جاسىل» ەكونوميكاعا اۋىسۋ تۇجىرىمداماسىن جۇزەگە اسىرۋدا. وسى تۇجىرىمدامانى ىسكە اسىرۋداعى قادامداردىڭ ءبىرى –ەكسپو پاۆيلوندارى ءبىرىنىڭ بازاسىندا «جاسىل» تەحنولوگيالار جانە ينۆەستيتسيالار ورتالىعىن قۇرۋعا نەگىزدەلگەن. وزدەرىڭىز بىلەسىزدەر, ورتالىقتى بۇۇ-نىڭ ءتۇرلى ۇيىمدارىنىڭ قولداۋىمەن قۇرۋ قاراستىرىلىپ وتىر. سونىمەن قاتار, ءبىز جەكە كاپيتالدىڭ قاتىسۋىن دا ەسكەرۋدەمىز. جاڭا جىلعا دەيىن نەگىزگى قۇجاتتارعا قول قويىپ, كەلىسسوزدەردى اياقتايمىز دەگەن ويدامىن. وسى رەتتە الداعى جىلى ورتالىق تولىققاندى قىزمەت ەتۋى ءتيىس», دەدى ق.بوزىمباەۆ. كونفەرەنتسيا بارىسىندا «جاسىل» تەحنولوگيالار سالاسىندا اۆستريالىق تەحنولوگيالار ينستيتۋتىمەن, «KaukoInternational Group» فين كومپانياسىمەن ىنتىماقتاستىق تۋرالى مەموراندۋمعا قول قويىلدى. فورۋمنىڭ ەكىنشى كۇنىندە, ياعني, بۇگىن, 13 شىلدەدە كونفەرەنتسيا قاتىسۋشىلارى «ارناساي» جاسىل تەحنولوگيالار ورتالىعىندا بولادى. وندا يننوۆاتورلار مەن جاستاردىڭ قاتىسۋىمەن «جاسىل» تەحنولوگيالار كورمەسىمەن, قازاقستاننىڭ ءبىرىنشى «جاسىل» اۋىلىمەن, «EXPO-Camp» جاسوسپىرىمدەر لاگەرىمەن تانىستىرۋ شارالارى وتپەك.