اقتوبەدە 2016-2020 جىلدارعا ارنالعان جەكەشەلەندىرۋ جوسپارىنا 9 كوممۋنالدىق مەنشىك نىسانى كىردى. ولاردىڭ اراسىندا «اقتوبە» فۋتبول كلۋبى مەن قوبىلاندى باتىر اتىنداعى ورتالىق ستاديون بار.
«وتكەن جىلى تازالىق جۇمىستارىن جۇرگىزەتىن, قوقىس جينايتىن «تازالىق» مەملەكەتتىك-كوممۋنالدىق كاسىپورىنىن ءۇش رەت ساتۋعا قويىپ, وتپەي قالدى. قازىرگى ۋاقىتتا كاسىپورىندى جويۋ جۇمىستارى ءجۇرىپ جاتىر. بيىل تاعى 6 كاسىپورىن جەكەشەلەندىرىلەدى. ولاردىڭ اراسىندا قالا ىشىندەگى تازالىققا جاۋاپتى «اقتوبە تازا قالا» مەكەمەسى مەن «نامىس» سپورتتىق ويىن تۇرلەرى كلۋبى, «اقتوبە-اگروسەرۆيس» جشس-ى بار. بۇل كاسىپورىندار 100 پايىز مەملەكەتكە تيەسىلى بولدى. ال «اقتوبە وبلىستىق مەملەكەتتىك-جەكەشەلىك سەرىكتەستىكتىڭ ايماقتىق ورتالىعى» جشس-نىڭ 51 پايىزدىق ۇلەسى ساتىلادى. «اقتوبە» ايماقتىق يندۋستريالدى تەحنوپاركىندەگى مەملەكەت ۇلەسى 30 پايىز. سول بولىگى عانا ساتۋعا شىعارىلادى. «حرومتاۋ - تازالىق» مەكەمەسىنىڭ 49 پايىزدىق ۇلەسى دە جەكەشەلەندىرىلەدى. قازىرگى ۋاقىتتا باعالاۋ جۇمىستارى ءجۇرىپ جاتىر. تەك «اقتوبە تازا قالا» جشس-ى 355 ميلليون تەڭگەگە ساتىلدى. يەسى ءبىر جىلدان كەيىن جەكەشەلەندىرەدى»,- دەدى اقتوبە وبلىستىق قارجى باسقارماسىنىڭ باسشىسى گۇلقاسيما سۋەنتاەۆا.
جەكەشەلەندىرۋگە قويىلعان كاسىپورىندار اراسىندا «اقتوبە» فۋتبول كلۋبى مەن قوبىلاندى باتىر اتىنداعى ورتالىق ستاديون دا بار.
«ەكى مەملەكەتتىك-كوممۋنالدىق كاسىپورىن 2018 جىلى جەكەشەلەندىرىلەدى. قۇنى ازىرگە بەلگىسىز. باعالاۋشىلار اقتوبە وبلىستىق دەنە شىنىقتىرۋ جانە سپورت باسقارماسىنان قۇجاتتاردى الىپ, كەيىن ەكى نىساننىڭ نەگىزگى قۇنىن انىقتايدى. سودان كەيىن ساتۋعا شىعارىلادى. قازىرگى ۋاقىتتا «اقتوبە» فۋتبول كلۋبىنا جىل سايىن 2 ميلليارد تەڭگە اۋدارىلىپ وتىر. كلۋبتىڭ قارىزى تۋرالى بىلمەيمىن»,- دەدى گۇلقاسيما سۋەنتاەۆا.