سوڭعى جىلدارى كىتاپ وقۋدى ناسيحاتتايتىن جۇمىستار ءار ءتۇرلى فورمادا ىسكە اسىپ جاتىر. «جاقسى كىتاپ جارناماسىن ءوزى جاسايدى» دەگەن ۇعىمعا سۇيەپ قويىپ, كىتاپتى ناسيحاتتاماي وتىرا بەرۋگە تاعى بولمايدى. سوڭعى ۋاقىتتا كىتاپتان قول ۇزبەۋ ماسەلەسىنىڭ ءجيى كوتەرىلىپ جۇرگەنى دە تەگىن ەمەس.
الماتى وبلىسىنىڭ ورتالىعى تالدىقورعان قالاسىندا كىتاپ وقيمىن دەۋشىلەرگە جاڭا مۇمكىندىكتىڭ كوكجيەگى اشىلدى. بۇرىندارى كىتاپ وقۋ ءۇشىن كىتاپحاناعا بارىپ تىركەلۋ كەرەك بولسا, ەندىگىدە كوشەدە كەلە جاتىپ, ءوزىڭىز قاجەت ەتكەن كىتاپتى تاۋىپ الۋىڭىز مۇمكىن. وبلىستىق اكىمدىك جانە تىلدەردى دامىتۋ باسقارماسىنىڭ ۇيىمداستىرۋىمەن «جەتىسۋ – كىتاپقۇمارلار ولكەسى» اتتى ەركىن كىتاپ الماسۋ جوباسى, ياعني, «بۋككروسينگ» ۇيىمداستىرىلدى. اشىلۋ سالتاناتى «جاستار» ساياباعىنداعى مۇقاعالي ەسكەرتكىشىنىڭ الدىندا وتكەن شاراعا قالا تۇرعىندارى, باسقارما, مەكەمە قىزمەتكەرلەرى, وبلىستىق قازاقستان حالقى اسسامبلەياسىنىڭ حاتشىلىعى, «نۇر وتان» پارتياسى وبلىستىق فيليالى قاتىستى.
جوبا اۆتورلارىنىڭ ماقساتى تۇسىنىكتى – كىتاپ وقۋعا دەگەن ىنتانى وياتۋ. كىتاپتى پايدالانۋ جولدارىن جەڭىلدەتە وتىرىپ, وقىرماننىڭ رۋحاني جانە زياتكەرلىك تۇرعىدان تولىعۋىنا مۇمكىندىك بەرۋ.
وبلىستىق تىلدەردى دامىتۋ جونىندەگى باسقارما باسشىسى ايدار باشباەۆ جوبانىڭ نەگىزى ەلباسىنىڭ «كىتاپسىز جان-جاقتى دامۋ مۇمكىن ەمەس» دەگەن دايەك سوزىنە سۇيەنە وتىرىپ جاسالعانىن ايتتى. «كىتاپ العىرلىققا جەتەلەيتىن, ويلاۋ قابىلەتىن دامىتاتىن, ءسوز مادەنيەتىن قالىپتاستىراتىن, شەشەندىككە باۋليتىن مي گيمناستيكاسى بولىپ تابىلادى. سوندىقتان جاڭا جوبا ارقىلى جاستاردى كىتاپ وقۋعا شاقىرىپ, كوپشىلىكتىڭ وعان وڭاي قول جەتكىزۋىن قامتاماسىز ەتۋ ماقساتىندا «اربا» بويىندا, «جاستار» ساياباعىندا جانە قاراتال وزەنىنىڭ جاعالاۋىندا كىتاپ سورەلەرى ورنالاستىرىلدى. بۇل سورەدە كىتاپ سانى 600-گە جۋىق. باستاپقى كەزدە سورەلەر جانىنا كەزەكشىلەر قويىلادى. وقىرماندارعا جوبا ءمانى, ەرەكشەلىگى تۇسىندىرىلەدى. «بۋككروسسينگ» جوباسى ء«وزىڭ وقى, باسقاعا بەر!» قاعيداسىنا سايادى», – دەيدى. جانە قالادان باستاۋ العان جوبا جۇمىسى وڭ ناتيجەگە قول جەتكىزىپ جاتسا, اۋدان, اۋىلداردا دا جالعاسىن تابادى.
جوبانىڭ تۇساۋىن كەسكەن «جەتىسۋ» گازەتىنىڭ باس رەداكتورى امىرە ءارىن: «قالاي دەسەك تە, قازىر باسپا ونىمىنە دەگەن سۇرانىس قايتا بەل الىپ كەلەدى. جاپونيادا «اساحي», «يوميۋري» گازەتتەرى اپتاسىنا 14 ميلليون تارالىممەن شىعادى. بۇل جاپون حالقىنىڭ ورەسىنىڭ كەڭەيىپ كەتكەندىگىن بىلدىرەدى. بىزگە دە, رۋحاني جاڭعىرۋ ءۇشىن, ەڭ الدىمەن سانا كەرەك. سوندىقتان, جاتپاي-تۇرماي وقۋ وقىپ, ىزدەنۋىمىز قاجەت. بۇگىن اشىلىپ وتىرعان جوبا قازاقستاننىڭ رۋحاني جاڭعىرۋىنا قوسىلعان ءبىر ۇلەس دەپ باعالاۋ كەرەك», – دەدى.
ۇيىمداستىرۋشىلاردىڭ ايتۋىنشا, ەركىن كىتاپ الماسۋدىڭ ءمانى – شاڭ باسىپ جاتقان دۇنيەلەردى جارىققا شىعارۋ, كوپشىلىككە قىزمەت ەتۋ, پايدا اكەلۋ, شىن مانىندە ءبىلىم بۇلاعىنا اينالدىرۋدى قامتاماسىز ەتۋ. ەگەر, سورەدەن كىتاپ الىپ, وقيمىن دەسەڭىز سىزگە قويىلار ءبىر عانا تالاپ بار – العان شىعارماڭنىڭ ورنىنا باسقا كىتاپ قويىپ كەتەسىڭ. سول ارقىلى, وزىڭىزگە ۇناعان كىتاپتى وزگەگە ۇسىناسىز جانە جاقسى شىعارماعا ەكىنشى ءومىر سىيلايسىز دەۋگە بولادى.
الماس ءنۇسىپ,
«ەگەمەن قازاقستان»
الماتى وبلىسى