تابيعي ءوسىم جانە كوشىپ كەلۋشىلەر ەسەبىنەن تۇرعىندار سانى كۇرت ارتقان وڭىردە حالىققا جەتكىلىكتى كولەمدە اۋىز سۋ تاۋىپ بەرۋدى كۇن تارتىبىنە قويدى. سونداي-اق, وڭىردە جۇرگىزىلىپ جاتقان وندىرىستىك جۇمىستار, تابيعي بايلىقتاردى يگەرۋ «بىزدە سۋ رەسۋرستارى شەكتەۋلى» دەپ قول قۋسىرۋدى ەمەس, تىعىرىقتان جول تاۋىپ شىعۋدى قاجەت ەتەتىنى بەلگىلى. قازىرگى تاڭدا ماڭعىستاۋ وبلىسىندا سۋمەن قامتاماسىز ەتۋ تۇششىتىلعان تەڭىز سۋى, جەر استى سۋ كوزدەرى, «قازترانسويل» اكتسيونەرلىك قوعامى «استراحان-مانگىشلاك» سۋ تاراتقىشى ارقىلى بەرىلەتىن ەدىل وزەنىنىڭ سۋى سەكىلدى ءۇش جول ارقىلى شەشىمىن تاۋىپ وتىر. وسى ءۇش كوز ارقىلى وتكەن جىلى وبلىستى سۋمەن قامتۋ كورسەتكىشى جىلىنا 41,6 ملن. تەكشە مەتر كولەمىندە بولعان. وڭىردەگى تەڭىز سۋىن تۇشىتۋمەن اينالىساتىن «ماەك-قازاتومونەركاسىپ» جشس» اقتاۋ قالاسى مەن تۇپقاراعان اۋدانى تۇرعىندارىن, ال «كاسپي» سۋ تۇششىتۋ زاۋىتى» جشس مۇنايلى, تۇپقاراعان اۋداندارىنا, اقشۇقىر, تەلمان, قۇرىق اۋىلدارىنا جانە اقتاۋ قالاسىنىڭ سولتۇستىك بولىگىنە تۇششى سۋ جەتكىزىپ كەلەدى. ال جەر استى سۋ كەن ورىندارى سۋىن نەگىزگى تۇتىنۋشىلار جاڭاوزەن قالاسى, ماڭعىستاۋ, بەينەۋ جانە تۇپقاراعان اۋداندارى بولسا, «قازترانسويل» اق استراحان-مانگىشلاك» سۋ تاراتقىشى ارقىلى بەرىلەتىن ەدىل سۋىن جاڭاوزەن قالاسى, ماڭعىستاۋ, بەينەۋ جانە قاراقيا اۋداندارى, مۇناي كومپانيالارى تۇتىنۋدا. سۋ جەتىمسىزدىگىن بولدىرماۋ باعىتىنداعى جۇمىستار اياسىندا ماڭعىستاۋدا تاعى ءبىر جاعىمدى جاڭالىق جۇرتقا جاريا بولدى. ول – «كاسپي» سۋ تۇششىتۋ زاۋىتى جۇمىسىنىڭ ەكىنشى ساتىسىنىڭ ىسكە قوسىلۋى. قايتا جابدىقتاۋدان ءوتىپ, زاماناۋي سۋ تۇششىتۋ قۇرىلعىلارىن ىسكە قوسقان كاسىپورىندا جۇمىس قۋاتىن ارتتىرۋعا مۇمكىندىك مول. جاڭعىرتۋ جۇمىستارىنا ۇلتتىق قوردان 3 ملرد 138 ملن تەڭگە بولىنگەن زاۋىتتا 121 ادام قىزمەت ەتەدى. «كاسپي» سۋ تۇششىتۋ زاۋىتى تاۋلىگىنە 30 000 تەكشە مەتر سۋ وڭدەۋدى مەجەلەپ وتىر, بۇل بۇعان دەيىنگى تۇششى سۋدىڭ بەرىلۋ مولشەرىنەن 3 ەسە ارتىق. – ەلباسىمىز ءوزىنىڭ جولداۋىندا تۇرعىن-ءۇي كوممۋنالدىق شارۋاشىلىعىن جاڭعىرتۋ, ينفراقۇرىلىمدى دامىتۋدىڭ قاجەتتىلىگىن الدىمىزعا ماقسات ەتىپ قويعانى بارشامىزعا بەلگىلى. بۇگىنگى «كاسپي» سۋ تۇششىتۋ زاۋىتىنىڭ قايتا جاڭعىرتۋدان ءوتىپ, حالىق يگىلىگىنە پايدالانۋعا بەرىلگەنىنە كۋا بولىپ وتىرمىز. بۇل دا – تاۋەلسىز ەلىمىزدى دامىتۋعا, قازىر ءوڭىرىمىز ءۇشىن ەڭ وزەكتى بولىپ وتىرعان اۋىز سۋمەن قامتاماسىز ەتۋ ماسەلەسىن شەشۋگە ءوز سەپتىگىن تيگىزەتىنىنە سەنىمدىمىن. الداعى ۋاقىتتا زاۋىتتىڭ جالپى قۋاتتىلىعىن 40 000 تەكشە مەترگە دەيىن جەتكىزۋ جوسپاردا بار. بۇل جوبا دا ءساتتى جۇزەگە اسىرىلاتىنىنا سەنەمىن, – دەدى ماڭعىستاۋ وبلىسىنىڭ اكىمى ەرالى توعجانوۆ زاۋىتتىڭ اشىلۋىندا. ول تۇتىنۋشىلاردى تۇششى سۋمەن تۇراقتى قامتاماسىز ەتۋدى جانە 2019 جىلى ماڭعىستاۋ وبلىسىن تولىقتاي تۇششى سۋمەن قامتاماسىز ەتۋ ءۇشىن زاۋىت قۋاتتىلىعىن تاۋلىگىنە 40 000 تەكشە مەترگە جەتكىزۋ تۋرالى تاپسىرما بەردى. دەمەك, وڭىردە تۇششى سۋمەن قامتۋ باعىتىنداعى جۇمىستار ءجۇرىپ جاتىر دەۋگە سەبەپ بار. بۇل ماسەلەدەگى ەكىنشى ءبىر تەتىك – تۇرعىنداردىڭ اسا ىسىراپشىلىققا جول بەرمەي, سۋدى دا ورنىمەن پايدالانا ءبىلۋى. ويتكەنى, سۋدىڭ دا سۇراۋى بار...
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى