بۇگىندە ءوڭىر اۋماعىنداعى جول بويىندا 142 نىسان قىزمەت كورسەتەدى. ولاردىڭ 123-ءى رەسپۋبليكالىق ماڭىزى بار جولداردىڭ بويىندا ورنالاسقان. وعان جانار-جاعارماي قۇيۋ بەكەتتەرى, تەحنيكالىق قىزمەت كورسەتۋ ستانسالارى, ءدامحانالار, قوناقۇيلەر, تاعى باسقا وبەكتىلەر كىرەدى.
ۆەدوموستۆو باسشىسىنىڭ ەسەبىن تىڭداپ بولعاننان كەيىن قۇمار ىرگەباي ۇلى جول بويىنداعى سەرۆيستىك قىزمەت كورسەتۋ نىساندارىنىڭ بەستەن ءبىرى عانا ۇلتتىق ستاندارت تالاپتارىنا سايكەس كەلەتىنىن اتاپ كورسەتتى.
«پەتروپاۆلدان استاناعا دەيىن تاقتايداي جولدىڭ تارتىلعانىنا قاراماستان سەرۆيستىك قىزمەت بۇرىنعى كۇيىندە قالىپ وتىر. سانيتارلىق-گيگيەنالىق تازالىقتى ايتپاي-اق قويايىق, ءجونى ءتۇزۋ تۇستەنەتىن, دامىلدايتىن نىساندار جوقتىڭ قاسى», دەدى ايماق باسشىسى.
ق. اقساقالوۆ شەكارالىق ايماقتاردىڭ كوركىن قالاي بولسا سولاي ورناتىلعان ۆاگون-ۇيشىكتەر قاشىرىپ تۇرعانىن, ولاردا قىزمەت كورسەتەتىن ساقتاندىرۋ مەكەمەلەرىن جەدەل كوشىرۋدى, جاعدايدى تەز ارادا تۇزەتۋدى قاتاڭ تاپسىردى.
ءومىر ەسقالي, «ەگەمەن قازاقستان»