بۇۇ قاۋىپسىزدىك كەڭەسىنىڭ اياسىندا وتكەن اتالعان باسقوسۋدا مەملەكەتتىك ەمەس قۇرىلىمداردىڭ جاپپاي قىرىپ-جوياتىن قارۋلارمەن شابۋىلداۋ قاۋپى جان-جاقتى ءسوز بولدى. وسى ورايدا جيىنعا قاتىسۋشىلار مەملەكەتتەر تاراپىنان قولعا الىنعان شارالارعا قاراماستان, لاڭكەستىك توپتاردىڭ يادرولىق, حيميالىق جانە بيولوگيالىق قارۋلاردى قولدانۋ قاۋپى كۇن سايىن ارتىپ كەلە جاتقانىن ءبىراۋىزدان اتاپ ءوتتى. بۇۇ-نىڭ قارۋسىزدانۋ ماسەلەلەرى بويىنشا جوعارعى كوميسسارى يدزۋمي ناكاميتسۋدىڭ سوزىنە قاراعاندا, مەملەكەتتىك ەمەس زاڭسىز قۇرىلىمدار وزدەرىنە قاجەتتى جابدىقتار مەن ماتەريالداردى ساتىپ الۋدا بالامالى ينتەرنەت پورتالدارى, ۇشقىشسىز ۇشۋ اپپاراتتارى, ءۇش ولشەمدى پرينتەرلەر سەكىلدى وزىق تەحنولوگيالاردىڭ كومەگىن پايدالانۋدا. ءوز كەزەگىندە ەلىمىزدىڭ بۇۇ-داعى تۇراقتى وكىلى قايرات وماروۆ قازاقستان تاراپى عىلىم مەن تەحنيكا سالاسىندا جاسالىپ جاتقان ادامزاتقا قاۋىپ ءتوندىرۋى ىقتيمال جاڭالىقتاردى باقىلاۋعا الۋ ماسەلەسىنە توقتالدى. وسى ورايدا ول مەملەكەت باسشىسى نۇرسۇلتان نازارباەۆتىڭ جاپپاي قىرىپ-جوياتىن قارۋ جاساۋ جانە جەتىلدىرۋ ءۇشىن پايدالانىلۋى مۇمكىن عىلىمي جاڭالىقتاردىڭ تىركەۋ رەەسترىن ءتۇزۋ قاجەتتىگى تۋرالى باستاماسىن ەسكە سالدى. ءوزىنىڭ قورىتىندى سوزىندە ق.وماروۆ جاپپاي قىرىپ-جوياتىن قارۋلاردان قۇتىلۋ ماقساتىندا الەمدىك قوعامداستىقتىڭ زامان تالابىنا ساي كۇش بىرىكتىرۋى ماڭىزدى ەكەنىنە نازار اۋداردى. جيىندا قاتىسۋشىلار جاھاندى الاڭداتىپ وتىرعان بۇل ماسەلەنىڭ ماڭىزدىلىعىن, بۇل ورايدا كەشەندى شارالار قابىلداۋ قاجەتتىگىن اتاپ كورسەتتى.
بۇۇ قاۋىپسىزدىك كەڭەسىندە جاپپاي قىرىپ-جويۋ قارۋلارىن تاراتپاۋ ماسەلەسىنە ارنالعان جيىن بولدى. ۇيىمنىڭ نيۋ-يورك قالاسىنداعى شتاب-پاتەرىندە ۇيىمداستىرىلعان بۇل شارا اشىق پىكىرتالاس پىشىمىندە ءوتتى, دەپ حابارلادى قازاقستاننىڭ بۇۇ جانىنداعى تۇراقتى وكىلدىگى.