قر ۇلتتىق ەكونوميكا ءمينيسترى تيمۋر سۇلەيمەنوۆ مەملەكەتتىك جانە كوممۋنيكاتسيالىق مەنشىكتەگى كاسىپورىندار مەن ءىرى كومپانيالاردى وتكىزۋ جوسپارى تۋرالى باياندادى, «سامۇرىق-قازىنا» ۇاق نىساندارىن جەكەشەلەندىرۋ بويىنشا جۇمىس جۇرگىزىلۋدە.
ءوز كەزەگىندە, قر قارجى ءمينيسترى باقىت سۇلتانوۆ مەملەكەتتىك مەنشىك جانە كۆازيمەملەكەتتىك سەكتور نىساندارىن ساتۋدى جىلدامداتۋ بويىنشا قولدانىلعان شارالاردىڭ ارالىق ناتيجەلەرى جانە بەكىتىلگەن كەستەلەر اياسىنداعى الداعى مىندەتتەر تۋرالى باياندادى. 2016 جىلدان باستاپ جەكەشەلەندىرۋدىڭ كەشەندى جوسپارى بويىنشا 221 نىسان وتكىزىلدى, 189 نىسان قايتا قۇرۋ نەمەسە جويۋ كەزەڭىندە.
«قولدانىلعان شارالار جەكەشەلەندىرۋ ۇدەرىسىن جانداندىرۋعا مۇمكىندىك بەردى, جانە كەشەندى جوسپار نىساندارىنىڭ نەگىزگى بولىگى (80% استامى) اعىمداعى جىلى وتكىزىلەدى. جالپى, جەكەشەلەندىرۋدىڭ كەشەندى جوسپارىن ىسكە اسىرۋ بويىنشا ءىس-شارالاردى ۋاقىتىلى جانە تابىستى ورىنداۋ ءۇشىن بارلىق العىشارتتار جاسالعان», - دەدى ب. سۇلتانوۆ.
وتىرىس اياسىندا «سامۇرىق-قازىنا» ۇاق باسقارما توراعاسى ءو. شۇكەەۆ, «بايتەرەك» حولدينگىنىڭ باسقارما توراعاسى ە. دوساەۆ, «قازاگرو» حولدينگىنىڭ باسقارما توراعاسى ن. مالەلوۆ جەكەشەلەندىرۋ بارىسى تۋرالى بايانداما جاسادى.
قر پرەمەر-ءمينيسترى باقىتجان ساعىنتاەۆ مەملەكەتتىك ورگاندار مەن حولدينگتەردىڭ باسشىلارىنا نىسانداردى ساتۋ كەستەسىن ساقتاۋدى جانە ولاردى بەلگىلەنگەن مەرزىمدەردە وتكىزۋدى قامتاماسىز ەتۋدى تاپسىردى.
بۇدان وزگە, مەملەكەت باسشىسىنىڭ مەملەكەتتىك مەنشىكتە قالاتىن نىساندار ءتىزىمىن دايىنداۋ تۋرالى تاپسىرمالارىن ورىنداۋ بويىنشا جۇمىستى بارىنشا قىسقا مەرزىمدە اياقتاۋ قاجەت. ۇلتتىق ەكونوميكا, قارجى جانە ادىلەت مينيسترلىكتەرىنە اتالعان ءتىزىمدى بەكىتۋ ماسەلەسىن پىسىقتاۋ كەرەك.
اتالعان تاپسىرمالاردى ورىنداۋدى باقىلاۋ قر پرەمەر-ءمينيسترىنىڭ ءبىرىنشى ورىنباسارى اسقار مامينگە جۇكتەلدى.