بارشا جۇرت تانىعان باس قالا دۇنيە جۇزىندە 251 مەملەكەت بار ەكەن. ولار تۇگەلدەي بۇۇ-عا مۇشەلىككە وتپەسە دە, بىزدىڭشە, ءبارى دەرلىك تاۋەلسىز, دەربەس مەملەكەتتەر بولۋى كەرەك. ارالارىندا ىرىلەرى دە, بار-جوعى ءبىزدىڭ ءبىر اۋدان كولەمىنەن اسپايتىندارى دا جوق ەمەس. ارال مەملەكەتتەر مەن قالا مەملەكەتتەر دە كەزدەسەدى. مۇنى ءبىز نە ءۇشىن ايتىپ وتىرمىز؟ جەر-جاھاندا وسىنشاما مەملەكەت بار ەكەنىن, قازاقتىڭ كەڭ پەيىلىنە قاراي الەمدە توعىزىنشى ورىن الاتىن اۋماقتىڭ بۇيىرعانىن ايتا وتىرىپ ماقتانۋ ءۇشىن, ارينە! جانە مۇنى ماقتانۋعا ابدەن بولاتىن ماسەلە دەپ بىلەمىز. دۇنيە جۇزىندە الاقانداي جەر ءۇشىن قىرىق پىشاق بولىپ قىرىلىسىپ جاتاتىن حالىقتار از با؟ ءتىپتى, اۋماعى جونىنەن الەمدە توعىزىنشى ورىن الاتىن ەگەمەن ەل اتانۋ تۇرماق, وزىمدىكى دەيتىن ۇلتاراقتاي جەرى بولماعاندىقتان, دەربەستىگىنە قول جەتكىزە الماي پۇشايمان كۇي كەشكەن ۇلىستاردى دا جاقسى بىلەمىز ەمەس پە؟! قازاقستان حالقى بۇگىندە جەرىمەن عانا ەمەس, تۇتاستاي ەلىمەن دە ماقتانا الادى. ەگەمەن ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ سارابدال ىشكى, سىرتقى ساياساتىنىڭ ارقاسىندا كوپتەگەن ۇلت پەن ۇلىس مەكەن ەتەتىن كەڭ-بايتاق وتانىمىزدا ەتنوسارالىق تاتۋلىق پەن دىنارالىق كەلىسىم سالتانات قۇرعان. مەملەكەت باسشىسىنىڭ جول كورسەتىپ, باعىت-باعدار سىلتەۋىمەن قازاق ەلى جىل وتكەن سايىن ءوسىپ-وركەندەپ كەلەدى. حالىقارالىق قوعامداستىق الدىنداعى بەدەلى دە ادام ايتقىسىز دەڭگەيدە ارتا ءتۇسىپ وتىر. ەلباسى دەگەندە الدىمەن اۋىزعا تاۋەلسىزدىگىمىزدىڭ تۇعىرىن بەكىتە تۇسۋگە ۇلكەن ۇلەس قوسىپ قانا قويماي, الەمدىك ساياساتتىڭ امبەباپ قالاسىنا اينالا باستاعان اسەم قالا – استانا ىلىگەتىنى انىق. ەلوردانى بۇگىندە جۇرتشىلىق ەلباسىنىڭ ءتول پەرزەنتى سانايدى جانە مۇنى وتە ورىندى پىكىر دەگەنىمىز ابزال.
دىندەر سەزى كەلىسىمگە ۇندەيدى بۇگىندە الەم تانىعان استانا, سونىمەن قاتار, حالىقارالىق ساياسي-ەكونوميكالىق جانە مادەني-گۋمانيتارلىق ءىس-شارالاردىڭ دا ورتالىعىنا اينالىپ كەلەدى. وسىنداي الەمدىك دەڭگەيدەگى اۋقىمدى حالىقارا لىق شارانىڭ ءبىرى – ەلباسىنىڭ باستاماسىمەن ۇيىمداستىرىلىپ, بۇگىندە ءار ءۇش جىل سايىن وتكىزىلىپ كەلە جاتقان الەمدىك جانە ءداستۇرلى دىندەر كوشباسشىلارىنىڭ سەزدەرى. ول العاش رەت ەلوردادا 2003 جىلى قانات قاقسا, سودان بەرى تاعى ءتورت مارتە ۇيىمداستىرىلدى. سەزد 2006 جىلدان باستاپ وسى شارا ءۇشىن دەپ ارنايى سالىنعان, بۇگىندە «پيراميدا» اتالىپ كەتكەن بەيبىتشىلىك جانە كەلىسىم سارايىندا وتكىزىلىپ كەلەدى. سەزد شاقىرۋ باستاماسىن دا ەلباسى نۇرسۇلتان نازارباەۆ ءوزىنىڭ حالىقارالىق قاۋىپسىزدىك سالاسىن نىعايتۋعا قوسقان ۇلەسىم بولسىن دەپ كوتەرگەنى كۇمان تۋعىزبايدى. قازىرگى تاڭدا ەلارالىق جانجالداردىڭ باسىم بولىگى بولىنۋشىلىك پەن ءدىني دۇردارازدىق سالدارىنان تۋىنداپ جاتاتىنى جاسىرىن ەمەس. مىنە, وسى پروبلەمانى ءسال دە بولسا جەڭىلدەتۋ ماقساتىندا شاقىرىلىپ جۇرگەن سەزدەر كەزىندە, ءتىپتى, ءبىر-بىرىنە قول بەرمەيتىن ءدىن وكىلدەرىن ءبىر ۇستەل باسىنا وتىرعىزىپ ۇنقاتىستىرۋدىڭ ءساتى تۇسسە, بۇل وسىعان دەيىن ەشبىر ەلدە, ەشبىر جەردە بولىپ كورمەگەن وقيعا ەدى. جاقىندا پارلامەنت سەناتىنىڭ توراعاسى, الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى قاسىم-جومارت توقاەۆتىڭ توراعالىعىمەن ءتۇرلى ەلدەردەن كەلگەن, ءتۇرلى دىندەر كوشباسشىلارىنىڭ قاتىسۋىمەن الداعى جىلى وتكىزىلەتىن ءVى سەزگە بايلانىستى حاتشىلىق وتىرىسى بولدى. وندا ءVى سەزدىڭ كۇن ءتارتىبى مەن ۇيىمداستىرىلاتىن مەرزىمى بەكىتىلدى. ءسويتىپ, كەزەكتى سەزد 2018 جىلعى قىركۇيەك ايىندا وتكىزىلەدى دەپ شەشىلدى. جالپى, بۇل سەزدەردىڭ الەمدەگى ءتۇرلى دىندەردى جاقىنداستىرۋداعى ءرولى وتە جوعارى ەكەنىن ايتا كەتكەن ءجون.
اسپاندا «استانا رۋحى» قالىقتادى قازاقستاننىڭ ەلورداسى كۋا بولعان ساياسي-ەكونوميكالىق, مادەني-گۋمانيتارلىق شارالار اۋقىمى جىل وتكەن سايىن كەڭەيە ءتۇسىپ كەلەدى. وسى ورايدا, وتانىمىزدىڭ سىرتقى ساياساتتاعى ەڭ ۇلكەن تابىسى دەپ تاۋەلسىز مەملەكەتتەر دوستاستىعى (تمد) مەن ورتالىق ازيا ەلدەرىنىڭ ىشىندە العاش بولىپ ەۋروپاداعى قاۋىپسىزدىك جانە ىنتىماقتاستىق ۇيىمىنا (ەقىۇ) توراعالىق قۇقىن جەڭىپ الىپ, وسى حالىقارالىق بەدەلدى ۇيىمنىڭ 11 جىل بويى وتكىزىلمەي كەلگەن ءسامميتىن ۇيىمداستىرۋىن اتاساق, قاتەلەسپەيتىنىمىز انىق. جانە ۇيىمعا توراعالىق ەتۋ قۇقىن جەڭىپ الىپ قانا قويماي, ونىڭ ءسامميتىن ۇيىمداستىرۋعا ەلباسى نۇرسۇلتان نازارباەۆتىڭ جاھاندىق اۋقىمداعى جوعارى بەدەلىنىڭ ارقاسىندا قول جەتكىزگەنىمىز تاعى داۋسىز. ەقىۇ-نىڭ ەۋروپا, سولتۇستىك امەريكا, ورتالىق ازيا جانە وڭتۇستىك كاۆكازداعى 56 مەملەكەتتىڭ باسىن قوسقان جەتەكشى ۇيىم ەكەنى بەلگىلى. باسقالاي ايتقاندا, ۆلاديۆوستوكتان ۆانكۋۆەرگە دەيىنگى ەۋرواتلانتيكالىق ارەالداعى مەملەكەتتەردى بىرىكتىرگەن بىرەگەي قۇرىلىم بولىپ تابىلادى. ونىڭ باستى باعدارى – ۇنقاتىسۋ ارقىلى قاۋىپسىزدىك سالاسىنداعى تۇيتكىلدەردىڭ ءتۇيىنىن تارقاتۋ جانە ونى مامىلەگەرلىك, ىنتىماقتاستىق جولىمەن بەكەمدەۋ. بۇل ىرگەلى حالىقارالىق ۇيىمعا جۇكتەلەتىن مىندەتتىڭ ۇلكەن, ارتىلاتىن جاۋاپكەرشىلىكتىڭ زور ەكەنىن بىلدىرەدى. قازاقستان وسى بەدەلدى قۇرىلىمنىڭ توراعالىعىنا قالاي قول جەتكىزدى؟ قازاقتىڭ دارحان دالاسىندا ۇيىم ءسامميتىن وتكىزۋگە ىقپال ەتكەن نە نارسە؟ ءتىپتى, توبەبيلىك تىزگىنى قانداي ولشەمدەرگە سايكەس سەنىپ تاپسىرىلدى؟ تاۋەلسىزدىگىمىزدىڭ ءتاڭسارى شاعىندا-اق ەلىمىز كوپقىرلى سەرىكتەستىك قاعيداتىن باتىل ۇستاندى. ۇلتىمىزدىڭ سىرتقى ساياساتتاعى ستراتەگيالىق وزەگى كوپقىرلىلىق جانە اشىقتىق بولدى. وسى سەبەپتى دە, استانا سىرتقى ساياساتتا جەتەكشى حالىقارالىق ۇيىمدارمەن, الەمدىك دەرجاۆالارمەن ىقىلاستى ىقپالداستىقتى دامىتۋدى باعدارشام ەتىپ الدى. ەقىۇ-مەن ءوزارا مۇددەلەستىككە نەگىزدەلگەن سەرىكتەستىكتى نىعايتۋدى ماقسات تۇتتى. ال بۇل ۇيىم دا قۋاتى جاعىنان دۇنيە جۇزىندەگى ءتورتىنشى يادرولىق ارسەنالعا يە بولعان, كەيىن ودان ءوز ەركىمەن باس تارتقان جانە وسى باستامانى حالىقارالىق قوعامداستىققا بارىنشا ناسيحاتتاعان استانامەن ۇيلەسىمدى ۇنقاتىسۋ ورناتۋعا بەيىلدى ەدى. ۇيىمعا توراعالىق پەن ونىڭ ءسامميتىن وتكىزۋ جۇمىستارىنىڭ سەنىپ تاپسىرىلۋى – قازاقستاننىڭ, ونىڭ كوشباسشىسى نۇرسۇلتان نازارباەۆتىڭ بەيبىتشىلىكتى, ۇلتارالىق تاتۋلىق پەن دىنارالىق كەلىسىمدى, ساياسي تۇراقتىلىقتى قامتاماسىز ەتكەن, جاڭا مەملەكەت قۇرۋدىڭ ەۆوليۋتسيالىق جولىن تابىستى تاڭداعان, حالىقارالىق قوعامداستىق پەن ءتۇرلى باعىتتاعى بايلانىستاردىڭ سونى مودەلىن ورنىقتىرعان ساياساتىنا بەرىلگەن وڭ باعانىڭ ناتيجەسى دەپ سەنىممەن ايتۋعا تولىق نەگىز بار. قازاقستاننىڭ ەقىۇ-داعى توراعالىعى مەن ونىڭ ءسامميتى تابىستى اياقتالىپ, الاشتىڭ ابىرويىن اسقاقتاتتى. زەڭگىر كوكتە «استانا رۋحى» قالىقتادى.
«استانا پروتسەسىنەن» ناتيجە كۇتىلەدى استانا – بۇگىندە باسقا دا جاھاندىق دەڭگەيدەگى اۋقىمدى ءىس-شارالار تابىستى ءوتىپ جۇرگەن ۇنقاتىسۋ الاڭى. ولاردىڭ قاتارىندا تمد ەلدەرىنىڭ ءتۇرلى دەڭگەيدەگى باسقوسۋلارىنىڭ, ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ (اوسشك) وتىرىستارىن اتاۋعا بولادى. بۇل ەكى قۇرىلىمنىڭ قازاقستان ءۇشىن ماڭىزى ەرەكشە. العاشقىسى – بۇرىنعى كەڭەستىك كەڭىستىك رەسپۋبليكالارى – بۇگىنگى ەگەمەن ەلدەردىڭ ينتەگراتسيالىق بايلانىستارىن بۇزباي, ءتۇرلى سالاداعى قارىم-قاتىناستارىن ءداستۇرلى نەگىزدە جالعاستىرۋىن كوزدەسە, ەكىنشىسى – تىكەلەي قازاقستان باسشىسىنىڭ باستاماسىمەن قۇرىلعان بىرلەستىك رەتىندە ءوڭىر ەلدەرى اراسىنداعى ءوزارا ىقپالداستىق پەن سەنىم شارالارىنىڭ تەرەڭدەي تۇسكەنىنە مۇددەلىلىك تانىتادى. استانانىڭ حالىقارالىق قوعامداستىقتا ەرەكشە ورنى بار قالا ەكەنىن كورسەتەتىن كەزەكتى اۋقىمدى ءىس-شارانىڭ ءبىرى دەپ باستالعانىنا التى جىلعا تاياپ قالعان سيرياداعى قارۋلى قاقتىعىستى توقتاتۋ بويىنشا ءتورت بىردەي راۋند ءوتىپ, «استانا پروتسەسى» دەگەن اتاۋعا يە بولعان سيرياارالىق كەلىسسوزدەردى اتاپ ايتۋعا بولادى. جالپىسىندا, سيريا ماسەلەلەرى بويىنشا وتكىزىلىپ كەلە جاتقان استانا پروتسەستەرى جەنەۆا كەلىسسوزدەرى سىندى حالىقارالىق كەزدەسۋلەردى تولىقتىرۋشى قىزمەتىن اتقارۋ ۇستىندە. ءوز الدىنا اۆتونومدى اۋقىمدى شارا سيريا داعدارىسىنا قاتىستى بارلىق مۇددەلى تاراپتىڭ باسقا دا كەلىسسوزدەرىمەن ءبىر ارنادا ءوتىپ وتىر. اتالعان شارانىڭ ءمان-ماڭىزى تۋرالى ايتقاندا, ءبىرىنشى كەزەكتە, 2017 جىلدىڭ قاڭتار ايىندا ەلوردادا وتكەن حالىقارالىق كەزدەسۋدە سيريانىڭ قارۋلى وپپوزيتسياسىنىڭ وكىلدەرى مەن سيريا ۇكىمەتىنىڭ ادامدارى العاش رەت ءبىر ۇستەل باسىنا وتىرىپ, ءبىر-بىرىمەن جۇزبە-ءجۇز سويلەسىپ, ءوزارا مامىلەگە كەلۋگە مۇمكىندىك العانىن ەرەكشە اتاپ ءوتۋ كەرەك. استانا پىشىمىندەگى كەلىسسوزدەردىڭ نەگىزى اتىستى توقتاتۋ رەجىمىنە باعىتتالسا, بۇل – بۇگىنگى تاڭدا ناقتى العا قويىلىپ وتىرعان مىندەت. استانا پروتسەسىنىڭ جەتىستىكتەرىن جەنەۆا كەلىسسوزدەرى تابىستى بولۋىنىڭ العىشارتى دەپ تە قاراستىرعان ءجون. قازىرگى كەزگە دەيىن قازاقستاننىڭ باس قالاسى مۇددەلى تاراپتاردىڭ بارشاسى وزدەرىنىڭ كوزقاراستارى مەن ۇستانىمدارىن كەڭ اۋديتورياعا جەتكىزە الاتىن تۇعىرناما رەتىندەگى تيىمدىلىگى مەن وزەكتىلىگىن كورسەتتى.
شانحاي ۇيىمىن سەگىزدىككە اينالدىرعان شاھار كەلەسى كەزەكتە شانحاي ىنتىماقتاستىق ۇيىمىنىڭ (شىۇ) وڭىردەگى قاۋىپسىزدىكتى قامتاماسىز ەتۋدەگى ءرولى وراسان زور دەۋىمىز كەرەك. شىۇ-نىڭ قالىپتاسۋ تاريحىندا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ بەلسەندى ءرولى, حالىقارالىق بەدەلى انىق كورىنەدى. وسى ورايدا, بۇعان ۇيىم ابىرويىنىڭ بۇگىنگىدەي ارتۋىندا ەلباسىنىڭ ۇلەسى ايتارلىقتاي ەكەنىن قوسا كورسەتۋىمىز قاجەت. كۇنى كەشە قازاقستاننىڭ ەلورداسىندا شىۇ-نىڭ جاڭا تاريحى باستالعان ءسامميتى تابىستى اياقتالدى. اۋقىمدى باسقوسۋدا ءۇندىستان رەسپۋبليكاسى مەن پاكىستان يسلام رەسپۋبليكاسى ۇيىمعا تولىققاندى مۇشەلەر بولىپ قابىلداندى. ءسويتىپ, اۋەلدە «شانحاي بەستىگى» رەتىندە ىرگە كوتەرىپ, كەيىن وزبەكستاننىڭ قوسىلۋىمەن شانحاي ىنتىماقتاستىق ۇيىمى دەگەن اتاۋعا يە بولعان وڭىرلىك قۇرىلىمنىڭ اۋقىمى اناعۇرلىم كەڭەيە ءتۇستى. ۇيىمنىڭ جاۋاپكەرشىلىك اياسى 3 ميللياردتان استام حالقى بار اۋماقتى قامتىپ, «شانحاي سەگىزدىگى» سياقتى ينستيتۋتتىق دامۋدىڭ جاڭا كەزەڭىنە قادام باستى. ۇيىمعا مۇشە مەملەكەتتەر قاتارىنىڭ ارتاتىنى تۋرالى حابار حالىقارالىق قوعامداستىقتىڭ استاناداعى سامميتكە دەگەن قىزىعۋشىلىعىن ارتتىرا تۇسكەن ەدى. ونىڭ الدىندا تاشكەنتتە وتكەن سامميتتە سويلەگەن سوزىندە ەلباسى نۇرسۇلتان نازارباەۆ ءۇندىستان مەن پاكىستاننىڭ قوسىلۋىنىڭ ناتيجەسىندە شىۇ ەۋرازيانىڭ كوپ بولىگىن, جەر شارى حالقىنىڭ جارتىسىن جانە الەم ەكونوميكاسىنىڭ 20 پايىزىن قامتيتىن جاھاندىق زور قۇرىلىمعا اينالاتىنىن اتاپ كورسەتكەن-ءتىن. بۇل ۇدەرىسكە استانادا وتكەن سامميتتە سوڭعى نۇكتە قويىلىپ, ۇيىم ءۇشىن دامۋدىڭ جاڭا ءداۋىرى باستالدى دەۋىمىز كەرەك. وزگە دە حالىقارالىق نەمەسە ايماقتىق ۇيىمدار سياقتى شىۇ دا جاڭا سىن-قاتەرلەرمەن بەتپە-بەت كەلىپ وتىرعانى بەلگىلى. ولار: تەرروريزم مەن ەكسترەميزم, ەسىرتكى تاسىمالى, اسىرەسە, دايش (قازاقستاندا تىيىم سالىنعان) سەكىلدى حالىقارالىق تەررورلىق ۇيىمدار. مۇنداي سىن-قاتەرلەرمەن ۇيىمعا مۇشە مەملەكەتتەردىڭ ءوزارا كۇش بىرىكتىرۋى ارقىلى عانا ءتيىمدى كۇرەس جۇرگىزۋگە بولاتىنى انىق. بۇل ارادا شىۇ-نىڭ جاڭا مۇشەلەرى – ءۇندىستان مەن پاكىستان ەلدەرىنىڭ الەۋەتىن پايدالانۋعا مۇمكىندىك مول. جوعارىدا ايتىلعانداردى سارالاي كەلگەندە ايتارىمىز, بۇگىندە شىۇ ەۆوليۋتسيالىق دامۋعا باتىل قادام باستى دەۋىمىز كەرەك. ال دامۋدىڭ كەلەسى كەزەڭىندە ونىڭ ىرگەسى بەكىپ, تۇعىرى بيىكتەي تۇسەتىنىنە ەش كۇمان جوق.
ەكسپو – ەل ابىرويىن اسىرعان شارا ەكسپو-2017 حالىقارالىق مامانداندىرىلعان كورمەسى جاھان جۇرتشىلىعىنىڭ نازارىن باس قالامىزعا اۋداردى. بۇل كورمەنى وتكىزۋ ەلىمىز ءۇشىن ۇلكەن جەتىستىك ەكەنى ءسوزسىز جانە وتانىمىزدىڭ وركەنيەت كوشىندەگى ەلدەر قاتارىنا قوسىلعانىن ايعاقتايدى. كورمە وتكىزۋ قۇقىن جەڭىپ الۋدىڭ ءوزى كەيبىر مەنمىن دەپ كەۋدە قاققان ەلدەردىڭ دە پەشەنەسىنە جازىلا بەرمەيدى. اقتىق باسەكەدە استانانىڭ بەلگيانىڭ لەج قالاسىمەن باسەكەگە تۇسكەنى بەلگىلى. بىراق استانانىڭ ءباسى جوعارى شىقتى. داۋىس بەرگەن حالىقارالىق كورمەلەر بيۋروسىنا (حكب) مۇشە 148 ەلدىڭ 103-ءى ەكسپو-نىڭ قازاقستاننىڭ ەلورداسىندا وتكەنىن قالايتىندارىن ءبىلدىردى. ءيا, تاڭداۋدىڭ كەز كەلگەن ەلگە تۇسە بەرمەيتىنىن مىنا مىسالدان-اق ايقىن كورۋگە بولادى. استانانىڭ ارتىنشا, ياعني 2018 جىلعى ەكسپو كورمەسىن وتكىزۋ جولىنداعى باسەكەگە ەجەلگى كورشىمىز – رەسەيدىڭ ەكاتەرينبۋرگ قالاسى ءتۇستى. بىراق جاھاندىق دەڭگەيدەگى جالپىۇلتتىق كورمە وتكىزۋ باسەكەسىندە جەڭىلىس تاپتى. تاڭداۋ جاساعان حكب-عا مۇشە ەل وكىلدەرى ەكسپو وتكىزۋگە ەكاتەرينبۋرگ لايىقتى ەمەس دەگەن شەشىم قابىلداپ, داۋىستارىن ونىڭ قارسىلاسىنا بەرگەندى ءجون كوردى. ال استانانىڭ جەڭىسىندە, ءبىرىنشى كەزەكتە, مەملەكەت باسشىسى نۇرسۇلتان نازارباەۆتىڭ حالىقارالىق تانىمالدىعى مەن بەدەلى شەشۋشى ءرول اتقاردى دەسەك, ەشكىم داۋ ايتا الماس. ەكىنشىدەن, ەلىمىزدە بۇعان دەيىن كوپتەگەن حالىقارالىق اۋقىمدى شارالار تابىستى ۇيىمداستىرىلدى. ازيا ويىندارى, ۋنيۆەرسيادا ۇلكەن جەتىستىكتەرمەن ءوتتى. ەندى, مىنە, ەلوردانى دۇبىرگە بولەپ جاتقان دۇنيەجۇزىلىك كورمەگە كەلەتىندەر قاتارى كۇن وتكەن سايىن قالىڭداپ كەلەدى. بۇعان قاتىستى ەلباسىنىڭ ءوزى ەكسپو-نىڭ اشىلۋىندا سويلەگەن سوزىندە كورمەگە كەلەتىن قوناقتاردى قازاقستاننىڭ باسقا دا كورىكتى جەرلەرىن ارالاپ, جاقىنىراق تانىسۋعا شاقىردى. ەلىمىزدە كەز كەلگەن شەتەلدىكتىڭ تاڭدايىن قاقتىرار ورىنداردىڭ جەتكىلىكتى ەكەنىن اتاپ كورسەتتى. استانا ەكسپو وتكىزۋ قۇقىن جەڭىپ العاننان كەيىن بۇل حالىقارالىق اۋقىمدى شارا جالپىۇلتتىق جوباعا اينالدى. قاجەتتى كولەمدە قارجى ءبولىنىپ, اتشاپتىرىم اۋماقتى الىپ جاتقان تۇتاس ءبىر اۋدان بوي كوتەردى. ءسويتىپ, ەلوردا كوركىنە كورىك قوسىلدى. كورمە اياقتالعاننان كەيىن جاڭا قۇرىلىستاردىڭ يگىلىگىن ەل كورەتىن بولادى. مۇنى كورمەدەن تيىمدىلىك كورمەيمىز دەگەن كەرتارتپالاردىڭ پەسسيميستىك كوڭىل كۇيلەرىنە ناقتى جاۋاپ دەپ بىلەمىز. قورىتا ايتقاندا, ەكسپو-2017 حالىقارالىق مامانداندىرىلعان كورمەسى قازاق ەلىن, ونىڭ ەلورداسىن بۇكىل الەمگە بۇرىنعىدان بەتەر تانىتا تۇسۋگە ۇلكەن ۇلەس قوسۋ ۇستىندە.
سامات مۇسا, «ەگەمەن قازاقستان»