«باۋىرجان» قايىرىمدىلىق قورىنىڭ ۇيىمداستىرۋىمەن, قازاقستان فۋتبول فەدەراتسياسى, «نۇر وتان» پارتياسى جانە «تسەسنابانك» اق-تىڭ قولداۋىمەن ءوتىپ جاتقان فۋتبول چەمپيوناتىنىڭ ىرىكتەۋ ويىندارى ەلىمىزدىڭ 13 ايماعىندا 2017 جىلدىڭ 25 ساۋىرىندە باستاۋ العان بولاتىن. بيىل بەسىنشى رەت وتكەلى وتىرعان اتالمىش چەمپيوناتتىڭ ىرىكتەۋ كەزەڭىندە رەسپۋبليكامىزدىڭ ءار ايماعىنان فينالدىق جولداماعا 26 كوماندا تارتىسقا ءتۇسىپ, بالالار ۇيلەرى مەن مەكتەپ-ينتەرناتتارىنان 11-14 جاس ارالىعىنداعى 250-دەن استام تاربيەلەنۋشى قاتىسقان ەدى. «باۋىرجان» قايىرىمدىلىق قورىنىڭ وكىلى اينۇر سالىمباەۆا مۇنداي مۇمكىندىكتەر جاس جەتكىنشەكتەردىڭ سپورتقا دەگەن ىنتاسىن, جارقىن بولاشاققا دەگەن قۇلشىنىسىن وياتا تۇسەتىنىن ايتادى: «ەۋروپانىڭ بەلدى فۋتبول كلۋبىنا بارۋ ءار دوپ قۋعان جانكۇيەردىڭ ارمانى دەسەك ارتىق ەمەس. ال ءبىزدىڭ بالالار ۇيلەرىنىڭ فۋتبولشىلارى سونداي زور مۇمكىندىككە يە بولۋدا. جەتكىنشەكتەر 2013 جىلدان بەرى ەۋروپانىڭ ايگىلى فۋتبول كلۋبتارىنا بارىپ, رونالدو, مەسسي, روبەن, حاۆي, توررەس, گريزمانن سىندى اتاقتى تەڭبىل دوپ شەبەرلەرىمەن كەزدەسىپ قايتتى». «كوماندامىز بۇل چەمپيوناتقا ءتورتىنشى جىل قاتارىنان قاتىسىپ كەلەمىز. بيىل العاش رەت فينالعا وتتىك. بارلىق قاتىسۋشىلارعا ساتتىلىك, وزىمىزگە جەڭىس تىلەيمىن», – دەپ اعىنان جارىلعان تالدىقورعان قالاسىنداعى بالالار ءۇيىنىڭ «اينالايىن» كومانداسىنىڭ ويىنشىسى تەمىرلان نيازباەۆ جەتىم بالالار اراسىنان فۋتبول دارىندارىن تاۋىپ, قازاقستاندىق فۋتبول دەڭگەيىنىڭ ارتۋىنا ۇلەس قوسۋدى ماقسات تۇتقان چەمپيونات دەمەۋشىلەرىنە العىسىن ءبىلدىردى. 2014 جىلى الماتى وبلىستىق №1 بالالار ءۇيىنىڭ «بارىس» كومانداسى ميلان قالاسىنا جولداما الىپ, «ميلانەللو» بازاسىن تاماشالادى, ال 2015 جىلى قاراعاندى قالاسىنىڭ «تاڭشولپان» بالالار ءۇيىنىڭ تاربيەلەنۋشىلەرى چەمپيوناتتا وزىپ شىعىپ, ايگىلى ميۋنحەن قالاسىنداعى (گەرمانيا) ALLIANZ ARENA ورتالىعىندا بولعان ايگىلى «باۆاريا» مەن «رەال مادريد» فۋتبول كلۋبتارىنىڭ ويىنىن كورىپ قايتقان ەدى.
ميرا بايبەك, «ەگەمەن قازاقستان»
الماتى