كەشە ەكسپو-2017 حالىقارالىق كورمەسىنىڭ قالاشىعى فرانتسيانىڭ ۇلتتىق كۇنىن اتاپ ءوتتى.
مەرەكەلىك شارانىڭ ءبىرىنشى بولىمىندە سىرتقى ىستەر مينيسترلىگى ەۋروپا دەپارتامەنتىنىڭ ديرەكتورى ايگۇل قۇسپان ءسوز سويلەپ, قازاقستان پەن فرانتسيانىڭ ستراتەگيالىق ارىپتەستەر ەكەنىن ەسكە سالدى. قوس مەملەكەت قويان-قولتىق جۇمىس جاساپ, قازىرگى زاماننىڭ سىن-تەگەۋرىندەرىنە, ونىڭ ىشىندە عالامدىق جىلىنۋعا قارسى ارەكەت ەتىپ جاتقانىن ايتتى. «ەكسپو-2017 حالىقارالىق كورمەسىنىڭ تاقىرىبى – «بولاشاق ەنەرگياسى». بۇل ۇزاق مەرزىمگە ارنالعان شەشىمدەردى, تەحنولوگيالىق يننوۆاتسيانى ۇسىنادى. فرانتسيا, بۇل تۇرعىدا, ەكولوگيالىق جاۋاپكەرشىلىكتىڭ ۇلگىسى. جاڭارتىلعان ەنەرگيا كوزىن پايدالانۋدا فرانتسۋزدىق ەڭ ۇزدىك تاجىريبەلەر – ادامزاتتىڭ باعا جەتپەس قۇندىلىعى. مەن ەكسپو-2017 حالىقارالىق كورمەسى ەيفەل مۇناراسى سياقتى تانىمال بولادى دەگەن ۇمىتتەمىن», دەدى ا.قۇسپان. جيىندا فرانتسيا پاۆيلونىنىڭ باس كوميسسارى پاسكال لورو قوس ەل اراسىنداعى دوستىقتى جوعارى باعالادى. «فرانتسيا مەن قازاقستان – دوس مەملەكەتتەر. ءبىزدىڭ ەلىمىز قازاقستانمەن 2008 جىلى ستراتەگيالىق ارىپتەستىك تۋرالى كەلىسىمگە قول قويدى. فرانتسيا ءوز كەزەگىندە ەنەرگەتيكا سالاسىنداعى تاجىريبەلەرىمەن بولىسە الادى. سوندىقتان بۇگىن وسى جەردە ەلىمىزدىڭ ەڭ ءىرى كاسىپورىندارىنىڭ جانە ەنەرگەتيكا سالاسىندا جاڭا تەحنولوگيالاردى دامىتقىسى كەلەتىن شاعىن جانە ورتا كاسىپورىن وكىلدەرى بار», دەدى ول. باس كوميسسار حالىقارالىق شاراعا فرانتسيانىڭ قانداي جوبالارمەن كەلگەندەرىن اڭگىمەلەدى.
ء«بىزدىڭ پاۆيلونىمىزدا بىرنەشە تاقىرىپتاعى جوبالار قويىلعان. ءبىرىنشى قابات – اقىلدى قالالار بويىنشا. ءبىز ءوز قالامىزدا جاقسى تۇرۋ ءۇشىن نە ىستەۋىمىز كەرەك؟ ال ەكىنشى جوبا ەكولوگيالىق كولىكپەن بايلانىستى. بىزدە تازا ەنەرگيانى قولداناتىن قانداي كولىكتى جاساپ شىعارۋعا بولادى؟ سوندىقتان «Peugeot» كومپانياسى گيبريداۆتوموبيلدى الىپ كەلدى. كولىك جارتىلاي بەنزينمەن جارتىلاي ەلەكتروەنەرگيامەن جۇمىس ىستەيدى», دەدى پاسكال لورو. مەرەكەلىك شارانىڭ ەكىنشى بولىمىندە فرانتسۋزدىق ارتىستەر ونەرلەرىن كورسەتتى. اسىرەسە, «Le hall de la Chanson» مۋزىكالىق توبى شىرقاعان اسەم اندەر قازاقستاندىقتاردىڭ كوڭىلىن كوتەردى. ال «اۋەت» تسيركىنىڭ ارتىستەرى قويعان كورىنىس كورەرمەندەردى ەرىكسىز پاريج كوشەلەرىندە جۇرگەندەي اسەرگە بولەدى. ء«بىز ءوز قويىلىمىمىزدا تسيركتىڭ تەحنيكاسىن قولدانامىز. بىراق وسى نومىرىمىزدە پاريج كوشەلەرىندەگى كورىنىستەردى بەينەلەگىمىز كەلدى. مىسالى, شاعىن كافە, وفيتسيانت, انشىلەر. بۇل يدەيامىزدى وسى جەردە جۇزەگە اسىرۋعا تىرىستىق. الداعى ۋاقىتتا ءالى 10 قويىلىم قويامىز», دەدى تسيرك وكىلى وليۆەر لاندرە.