كەشە ەكسپو-2017 حالىقارالىق كورمەسى اياسىندا وتكەن «سالاماتتى بولاشاق» بالالار سۋرەتى بايقاۋىنىڭ قورىتىندىسى شىعارىلىپ, جەڭىمپازدار ماراپاتتالدى. ونەر سايىسىندا بالالار ءۇيىنىڭ, «SOS بالالار اۋىلىنىڭ» جانە ارنايى تۇزەتۋ مەكتەپ-ينتەرناتىنىڭ تاربيەلەنۋشىلەرى باق سىنادى. ماراپاتتاۋ ءراسىمى «مەديكەر» مەديتسينالىق كومپانياسىنىڭ كورمە پاۆيلونىندا ءوتتى. جەتى مەن ون بەس جاس ارالىعىنداعى بالالار وزدەرىنىڭ شىعارماشىلىق قابىلەتىن كورسەتتى. 16-31 مامىر ارالىعىندا قابىلدانعان جۇمىستارعا باعا بەرىلدى. ءبىر ايتا كەتەرلىگى, ولاردىڭ بارلىعى دەنساۋلىق تاقىرىبىنا ارنالعان. سۋرەتتەردى «ايالا» قايىرىمدىلىق قورىنىڭ, «مەديكەر» مەديتسينالىق كومپانياسىنىڭ جانە «Philips» كومپانياسىنىڭ وكىلدەرىنەن قۇرالعان ساراپشىلار باعالادى. ءبىرىنشى, ەكىنشى جانە ءۇشىنشى ورىنداردى يەلەنگەن جەڭىمپازدارعا «Philips» كومپانياسى جانە «ايالا» قايىرىمدىلىق قورى باعالى سىيلىقتار تابىستادى. قوسىمشا تاعايىندالعان التى اتالىم بويىنشا جۇلدەلەردى «Philips» كومپانياسى ۇسىندى. جارىسقا قاتىسقان باسقا بالالار دا قۇرالاقان قايتقان جوق. سەبەبى, قازىلار القاسى مۇشەلەرىنىڭ ايتۋىنشا, بارلىق جۇمىستار نازار اۋدارۋعا جانە جۇلدەلى ورىنعا لايىق. سونىمەن, «سالاۋاتتى بولاشاق» بالالار سۋرەتى بايقاۋىنىڭ ءبىرىنشى جۇلدەسى – ەرجان دىنيسلامعا, ەكىنشى ورىن – يرينا ولەينيككە, ءۇشىنشى جۇلدە ليۋبوۆ چۋگاەۆاعا بۇيىردى. ال «تاقىرىپتى اشقانى ءۇشىن» اتالىمى بويىنشا – اناتولي پوپوۆ, «ەڭ جاس سۋرەتشى» جۇلدەسىمەن – ەرجان قاسقىرباي, كرەاتيۆتى تۋىندىسى ءۇشىن – ۆلاديمير ولەينيك, «ەڭ جارقىن سۋرەتىمەن» دارالانعان – ۇلان تاسپولات, «بولاشاققا كوزقاراس» جۇلدەسىن يەلەنگەن لانا ىبراەۆا, تابيعاتپەن ەتەنە ەڭبەك ەتە بىلگەن البينا نۇربەكوۆا جەڭىمپاز بولىپ تابىلدى. بايقاۋ ۇزدىگى ەرجان ءدىنيسلامنىڭ ايتۋىنشا, ونەر بايگەسىنە مۇنان كەيىن دە كوپتەپ قاتىسا بەرۋ قاجەت. ويتكەنى, ارىپتەستەرمەن باسەكەدە ءار سۋرەتشى ءوزىن بارىنشا كورسەتۋىنە ءارى ءتۇرلى قىرىنان اشىلۋىنا مۇمكىندىك تابادى.
قارشىعا كۇلەن