الماتى وبلىسىندا «سۋدا اباي بولىڭىز! بالالاردى قاراۋسىز قالدىرماڭىز!» اكتسياسى ءوتتى. ماقسات – جاز ماۋسىمىندا وزەن-كول جاعالاۋلارىندا قاۋىپسىزدىك ساقتاۋ, زارداپ شەگۋشىلەرگە العاشقى كومەك قولىن سوزۋ, سۋعا جۇزە المايتىنداردى جانە بالالاردى نازاردان تىس قالدىرماۋعا ۇندەۋ. زارداپ شەگۋشىلەرگە جاردەمدەسكەندە ەڭ الدىمەن ەسكەرەتىن ءوز ءومىرىڭ ەكەنى دە ەسكەرتىلدى. ايتپەسە, وزگەنى قۇتقارام دەپ ءجۇرىپ ءوزى دە سۋعا كەتكەندەر از ەمەس. ءوز بەتىڭىزشە ارەكەت ەتۋگە بەل بايلاساڭىز, الدىمەن قاۋىپسىزدىك ەرەجەلەرىن ءبىلۋ ماڭىزدى. بۇدان دا باسقا ءبىراز ماسەلەلەر قامتىلعان اكتسيانىڭ ەڭ باستى ارتىقشىلىعى – وزەن جاعاسىندا تابيعي جاعدايدا وتكەندىگى. دەمالۋشىلاردى ارالاپ ءجۇرىپ, ەسكەرتپە پاراقتار تاراتقان وبلىستىق توتەنشە جاعدايلار دەپارتامەنتىنىڭ قىزمەتكەرلەرى قاراپايىم حالىققا ارناپ وقۋ-جاتتىعۋ جۇمىستارىن وتكىزدى. دەمالۋشىلار نازارىنا سۋعا باتۋشىنى قۇتقارۋ قيمىلدارى مەن وعان كورسەتىلەتىن العاشقى مەديتسينالىق كومەك جايلى كورىنىستەر ۇسىنىلدى. سۋدان كەلەتىن قاتەرلەر جايلى ارنايى اقپاراتتار بەرىلىپ, قىسقاشا ءدارىس وقىلدى. «سۋعا ءتۇسۋ ماۋسىمىندا ورىن الاتىن ءولىم جاعدايلارىنىڭ 70 پايىزى – ماس كۇيدە سۋعا تۇسكەننەن بولادى. ال بارلىق قايعىلى وقيعالاردىڭ 98 پايىزى – ارنايى جابدىقتالماعان جانە شومىلۋعا تىيىم سالىنعان جەرلەردە سۋعا تۇسكەندىكتەن ورىن الىپ جاتادى. جاعاجايدا قاۋىپسىزدىك ەرەجەلەرىن ۇمىتپاعان ءجون. سۋداعى قاۋىپسىز دەمالىس – ەرەجەلەردىڭ قاتاڭ ساقتالۋىمەن تىكەلەي بايلانىستى», دەيدى ماماندار. بيىلعى جىلدىڭ وزىندە وبلىس بويىنشا 9 ادام سۋعا باتقان. ونىڭ تورتەۋى بالا. تەكسەرە كەلگەندە, تورتەۋىن دە اتا-اناسىنىڭ قاراۋسىز قالدىرعانى انىقتالعان. اكتسيا شارتتارىنا بايلانىستى, جەدەل-قۇتقارۋ جاساعىنىڭ قۇتقارۋشىلارى مەن وبلىستىڭ تجد قىزمەتكەرلەرى جەرگىلىكتى پوليتسيا قىزمەتكەرلەرىمەن بىرىگىپ قاراتال جانە بالىقتى وزەندەرىنىڭ شومىلۋعا تىيىم سالىنعان جەرلەرىنە رەيد وتكىزدى.
الماس ءنۇسىپ, «ەگەمەن قازاقستان»
الماتى وبلىسى