ونىڭ ايتۋىنشا, دوللارلاندىرۋدىڭ جوعارى كورسەتكىشتەرى ەكىنشى دەڭگەيلى بانكتەردىڭ عانا ەمەس ۇلتتىق بانكتىڭ دە جۇمىسىنا كەرى اسەر ەتەدى. الايدا, بۇل كەرى اسەر ەتۋ ىقپالىن بىرنەشە تاسىلدەرمەن ازايتۋعا بولادى. ول ءۇشىن اينالىمنان دوللاردى الىپ تاستاۋ سياقتى قادامدارعا بارۋدىڭ كەرەگى جوق.
«ەكونوميكانى دوللارلاندىرۋ - ۇلكەن پروبلەما. بۇل قر ۇلتتىق بانكىنىڭ جۇمىسىنا كەدەرگى كەلتىرەدى. ويتكەنى, باس بانك ۇلتتىق ۆاليۋتانىڭ ەميتەنتى بولىپ ەسەپتەلەدى. 2016 جىلى ەلدەگى دوللارلاندىرۋ كورسەتكىشى 80%-دى قۇرادى, جەكە تۇلعالاردىڭ دەپوزيتتەرىنىڭ بارلىعى شەتەلدىك ۆاليۋتادا بولدى. وسىنداي جاعدايدا بانكتەر جۇمىس ىستەي المايدى. ويتكەنى ولاردا تەڭگە بولمادى. ورتالىق بانك دۇرىس اقشا نەسيە ساياساتىن جۇرگىزە المادى. سەبەبى, ءبىز تەڭگە نارىعىنداعى ستاۆكالاردى پايدالانامىز. ال بانكتەردە تەك دوللار», دەدى د. اقىشەۆ.
باس بانكير تەڭگە دەپوزيتتەرىنىڭ كولەمىن ارتتىرۋ ءۇشىن قانداي قادام جاسالعانىن ايتىپ ءوتتى.
«دوللارلاندىرۋ پروتسەسىن باستان وتكەرۋ كەرەك. مۇنى نارىقتىق تەتىكتەرمەن جاساۋعا بولادى. ارينە, اكىمشىلىك قۇرالدار دا بار. بىراق دوللارمەن اقشا جيۋعا تىكەلەي تىيىم سالۋ قازاقستاندا مۇمكىن ەمەس. سوندىقتان تەڭگە دەپوزيتتەرىنىڭ ستاۆكاسىن كوتەرىپ, دوللار دەپوزيتتەرىنىڭ ستاۆكالارىن ازايتتىق. قازىرگى تاڭدا جەكە تۇلعالار, كاسىپورىندار مەن ۇيىمدار اكتيۆتەرىن تەڭگەگە اۋىستىرا باستادى. تالداۋ قورىتىندىسىنا سايكەس, سوڭعى 15 ايدا دوللار باعامى تومەندەدى», دەدى ول.
ايتا كەتەيىك, 2015 جىلى قازاقستاندا ەكونوميكاداعى دوللارلاندىرۋ دەڭگەيىن تومەندەتۋ بويىنشا جوسپار قابىلدانعان بولاتىن. بۇل جوسپار قر ۇكىمەتىنىڭ وتىرىسىندا, ۇلتتىق بانك باسقارماسىنىڭ وتىرىسىندا ماقۇلداندى. جوسپارعا ماكروەكونوميكالىق تۇراقتىلىقتى قامتاماسىز ەتۋ, قاراجاتتىڭ كولەڭكەلى اينالىمىن قىسقارتۋ مەن ناقتى اقشاسىز تولەم كولەمىن دامىتۋ, ۇلتتىق ۆاليۋتانىڭ باسىمدىعىن ارتتىرۋ سياقتى 3 نەگىزگى ستراتەگيالىق باعىت ەنگەن بولاتىن.
2017 جىلدىڭ ءساۋىرىنىڭ سوڭىندا ۇلتتىق ۆاليۋتاداعى دەپوزيتتەر كولەمى 9 090,2 ملرد تەڭگەگە جەتكەن (1 ايدا 2,6%-عا وسكەن), شەتەلدىك ۆاليۋتاداعى دەپوزيت كولەمى 1 ايدا 1,4%-عا ازايىپ, 8 654,7 ملرد تەڭگە بولدى.
وسىمەن ەكىنشى اي بويى ۇلتتىق ۆاليۋتاداعى دەپوزيتتەر كولەمى شەتەلدىك ۆاليۋتاداعى دەپوزيتتەر كولەمىنەن ارتىق بولىپ وتىر. دوللارلاندىرۋ كولەمى 49,8%-دان 48,8%-عا دەيىن تومەندەدى. زاڭدى تۇلعالاردىڭ ۇلتتىق ۆاليۋتاداعى دەپوزيتتەرى 2017 جىلى ساۋىردە 0,6%-عا ارتىپ, 5 752,5 ملرد تەڭگەنى قۇرادى. شەتەلدىك ۆاليۋتاداعى دەپوزيت كولەمى 0,3%-عا تومەندەپ, 4 415,9 ملرد تەڭگەگە جەتتى.