بۇل – قازاقستان رەسپۋبليكاسى پرەزيدەنتىنىڭ 2011 جىلعى 29 ماۋسىمداعى №110 جارلىعىمەن بەكىتىلگەن «تىلدەردى قولدانۋ مەن دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىن» جۇزەگە اسىرۋدىڭ ءبىر كورىنىسى.
پوليتسيا قىزمەتكەرلەرىنىڭ مەملەكەتتىك ءتىلدى جەتىك مەڭگەرۋ تالابى كوپ جىلدان بەرى جۇيەلى ءجۇرىپ كەلەدى. دەپارتامەنتتىڭ مەملەكەتتىك ءتىل جانە اقپارات ءبولىمى ماماندارى باتىس قازاقستان وبلىستىق تىلدەردى دامىتۋ باسقارماسىنىڭ قولداۋىمەن بىرنەشە مارتە جەدەلدەتە وقىتۋ كۋرستارىن وتكىزگەن. ءسويتىپ, 2013-2014 جىلدارى بقو ءىىد-ءنىڭ 200-گە جۋىق پوليتسيا قىزمەتكەرى «قازتەست» جۇيەسى بويىنشا سىناقتى ءساتتى تاپسىردى. 2015 جىلى قاراشا ايىندا وتكەن دياگنوستيكالىق تەستىلەۋگە قاتىسقان 200-دەن استام قىزمەتكەردىڭ 80 پايىزى جوعارى دەڭگەيگە قول جەتكىزىپ, سەرتيفيكاتقا يە بولدى.
مىنە, جاقىندا باتىس قازاقستان وبلىستىق تىلدەردى دامىتۋ باسقارماسىنىڭ قولداۋىمەن ىشكى ىستەر دەپارتامەنتىندە ءتىل ۇيرەتۋ كۋرسى جاڭا توپتى قابىلدادى. ساباقتى ماحامبەت وتەمىس ۇلى اتىنداعى بقمۋ-ءدىڭ اعا وقىتۋشىسى ينديرا سۇلتانيازوۆا جۇرگىزەدى. توپ قۇرامىندا 32 ادام وقىپ جاتىر, ونىڭ 13-ءى ۋكراين, ورىس, تاتار, ۇيعىر سەكىلدى وزگە ەتنوس وكىلدەرى. سونىمەن بىرگە, ورىس مەكتەبىن بىتىرگەن 19 قازاق ورتا دەڭگەي باعدارلاماسى بويىنشا ءبىلىم الۋدا.
– ءبىزدىڭ قىزمەتكەرلەر ءۇشىن «قازتەست» سىناعى بيىلعى جەلتوقسان ايىندا بولادى. وعان دەپارتامەنت قىزمەتكەرلەرىنىڭ 70 پايىزى قامتىلادى, – دەيدى مەملەكەتتىك ءتىل جونىندەگى مامان جازيرا كەنجەەۆا.
ءتىل ساباقتارى سۇراق-جاۋاپ ستيلىندە ويىن تۇرىندە وتەدى. ال جالپىسىندا باتىس قازاقستان وبلىستىق ىشكى ىستەر دەپارتامەنتىندە 158 وزگە ەتنوس وكىلى بار, ولاردىڭ 35%-ى قازىردىڭ وزىندە مەملەكەتتىك تىلدە سويلەي الادى.
قازبەك قۇتتىمۇرات ۇلى, «ەگەمەن قازاقستان»
ورال