بۇعان دەيىن ومارتا ۇستاپ, بال اراسىن ءوسىرۋ – ەلىمىزدىڭ كوپتەگەن وڭىرلەرى ءۇشىن تاڭسىق بولىپ كەلدى. سوندىقتان دا اتالعان ايماقتاعى تاۋار وندىرۋشىلەر ونى ءداستۇرلى ەمەس شارۋاشىلىقتىڭ قاتارىنا قوستى. سونىڭ ءبىرى – اقتوبە وبلىسى. ايتسە دە سوڭعى كەزدە مۇندا ارا شارۋاشىلىعىن دامىتۋعا جان-جاقتى كوڭىل بولىنە باستادى. وسىعان وراي وبلىستا ءتيىستى ءىس-شارالار جوسپارى بەكىتىلدى. اتالعان ءىس ءوز باستاۋىن وتكەن جىلدان الادى. وسى كەزدە 11 جەكە كاسىپكەر وزدەرى بەتتەسىپ كورمەگەن ومارتا ۇستاۋ كاسىبىنە بەت بۇرىپ, بال وندىرۋگە بەل شەشە كىرىسىپ كەتكەن ەكەن. ال بيىلعى كورىنىس وتكەن جىلمەن سالىستىرا قاراعاندا كوپ ىلگەرى دەۋگە بولادى. ياعني, ارادا ءبىر جىل وتكەندە «اقتوبە ومارتاشىلارى» اتتى كووپەراتيۆ قۇرىلىپ, بۇل قۇرىلىم 34 كاسىپكەر-ارا ءوسىرۋشىنىڭ باستارىن بىرىكتىردى.
الايدا, مۇنىڭ ءوزىن دە الداعى اتقارىلاتىن ۇلكەن ىستەردىڭ العاشقى قارلىعاشى دەپ ساناعانىمىز ءجون سەكىلدى. وسى كوزقاراس تۇرعىسىنان قاراستىرعاندا وڭىردە ارا شارۋاشىلىعىن ودان ءارى وركەندەتۋدىڭ باستى تۇتقالارى مەن تەتىكتەرى قانداي بولماق؟ بۇل ارينە, ومارتاشىلاردىڭ شيكىزات شىلاۋىندا قالىپ قويماي, بال وندىرۋدەن ونى وڭدەۋ ساتىسىنا وتۋلەرىن, ءسويتىپ ءازىر تاۋارلى ءونىم شىعارۋ دەڭگەيىنە دەيىن جەتۋلەرىن قاجەت ەتەدى. وڭىردە بۇگىنگى كۇنى مۇنداي جەتىستىككە قول جەتكىزگەن اگروقۇرىلىمدار دا بار. وسى ورايدا «تاڭشولپان» شارۋا قوجالىعى كوش باستاپ كەلەدى. ءتىپتى وسى فيرمانىڭ قۇرامىنداعى ماماندار بالدى وڭدەۋگە ارنالعان تسەحتى دا قۇراستىرىپ شىعارىپتى. تاڭشولپاندىقتار ازىرلەگەن ونىمدەرىن جاڭا ديزاينمەن ساۋدا ورىندارىنا جونەلتۋ جولدارىن دا ويلاستىرىپ, ونى قوراپتار مەن بانكىلەرگە سالىنعان كۇيىندە تۇتىنۋشىلارعا ۇسىنۋدى جوسپارلاپ وتىر ەكەن.
ەندەشە وسىناۋ جەرگىلىكتى ءونىمنىڭ تانىمالدىعىن, ءباسى مەن مارتەبەسىن كوتەرۋ جانە ارتىقشىلىعىن جەتكىزۋ ماسەلەلەرى دە قوسا ويلاستىرىلعانى ارتىقتىق ەتپەيدى. وبلىستىق اۋىل شارۋاشىلىعى باسقارماسىنىڭ باسشىسى قۇسايىن سارسەمبايدىڭ مالىمدەۋىنشە, بۇعان بايلانىستى جايتتەر قازىردىڭ وزىندە شەشىمىن تابا باستاپتى. ويدى وي قوزعايدى. العاشقى پىكىردى ەكىنشى ءبىر پىكىر ودان ءارى جالعايدى. ادەتتە سەلەكتسيالىق اسىلداندىرۋ جۇمىستارى دەگەن تىركەس كوپ جاعدايلاردا مال شارۋاشىلىعىنا قاتىستى ايتىلاتىنى بەلگىلى. بۇل تار تۇسىنىك بولىپ شىقتى. سونداي-اق, مۇنداي ىستەر ارا شارۋاشىلىعىن بيىك ساپالىق دەڭگەيگە جەتكىزۋگە دە اسا قاجەت ەكەن. جەرگىلىكتى ۆەدومستۆو جەتەكشىسى بۇل تۇرعىدا ۇكىمەت جەتى ميلليون تەڭگە كولەمىندە قارجىلاي قولداۋ كورسەتۋدى بەلگىلەگەنىن قاناعات كوڭىل كۇيمەن جەتكىزدى.
وسى ماتەريالدى گازەت وندىرىسىنە ازىرلەۋ بارىسىندا ۇققانىمىز ەلىمىزدە ارا شارۋاشىلىعىن ودان ءارى دامىتۋ تۇرعىسىندا تۇتاستاي العاندا ءالى دە شەشىمىن تاپپاعان ماسەلەلەردىڭ جەتكىلىكتى ەكەندىگى. بۇل باعىتتاعى باستى پروبلەمالاردىڭ ءبىرى كاسىبي ءارى بىلىكتى كادرلار مەن مامانداردىڭ جەتىسپەيتىنى بولىپ وتىر. اتالعان تۇيتكىلدى ماسەلەگە تاياۋ ارادا جوعارى وكىلەتتى ورگاندار تاراپىنان ءتيىستى كوڭىل اۋدارىلماسا, ەلىمىزدەگى ارا شارۋاشىلىعى توقىراۋعا ۇشىراۋى ابدەن مۇمكىن دەپ قاۋىپ ەتەدى ءداستۇرلى ەمەس سالا جاناشىرلارى.
بۇگىنگى كۇنى عىلىمي ىزدەنىستەردى قاجەت ەتپەيتىن ءوندىرىس سالاسىن تابۋ قيىن-اق. ارا شارۋاشىلىعى دا وعان ءزارۋ ەكەنىنە كوز جەتكىزدىك. اتالعان ءىس العا جىلجۋى ءۇشىن اۋىل شارۋاشىلىعى مينيسترلىگى ءتيىستى ۇسىنىستار بىلدىرسە, ولقىلىعىمىزدىڭ ورنى تولار ەدى دەيدى اقتوبەلىك ومارتاشىلار. سونداي-اق, ولار بال ءوندىرۋ مەن وڭدەۋ سالاسىن جەتىك مەڭگەرگەن بەساسپاپ, كاسىبي مامانداردىڭ قاتىسۋىمەن تاجىريبەلىك سەمينارلار وتكىزۋ قاجەتتىلىگىن دە العا تارتتى.
ويىمىزدى تۇيىندەي كەلە, وبلىستا الداعى جىلدارعا ارنالعان ارا شارۋاشىلىعى سالاسىن دامىتۋ جونىندەگى باعدارلاما جوباسىن قابىلداۋ قاجەتتىلىگى تۋىنداپ وتىرعانىن ايتقىمىز كەلەدى. اقتوبە وبلىستىق اۋىل شارۋاشىلىعى باسقارماسىنىڭ باسشىسى قۇسايىن سارسەمباي وبلىستىق ءماسليحاتتىڭ كەزەكتى سەسسياسى كەزىندە مۇنداي ۇسىنىستى ءماسليحات دەپۋتاتتارىنىڭ نازارىنا ۇسىندى.
قاجەتتى دە پايدالى ۇسىنىس ولاردىڭ تاراپىنان اياقسىز قالا قويماس دەگەن ويدامىز.
تەمىر قۇسايىن, «ەگەمەن قازاقستان»
اقتوبە
سۋرەتتە: ارا شارۋاشىلىعىنان كورىنىس