مەملەكەتتىك حاتشى كەزدەسۋ بارىسىندا اتو براۋن دۇنيەجۇزىلىك بانكتىڭ قازاقستانداعى وكىلى بولىپ تاعايىندالۋىمەن قۇتتىقتادى. گۇلشارا ابدىقالىقوۆانىڭ ايتۋىنشا, دۇنيەجۇزىلىك بانك تاۋەلسىزدىگىمىزدىڭ العاشقى جىلدارىنان بەرى ەلىمىزبەن بايلانىس ورناتىپ, ەكونوميكانىڭ كۇردەلى كەزەڭدەرىندە ءاردايىم قولداۋ كورسەتىپ كەلەدى.
بيىل ەكىجاقتى ىنتىماقتاستىققا 25 جىل تولىپ وتىر. وسى ۋاقىت ىشىندە دۇنيەجۇزىلىك بانكتىڭ قولداۋىمەن جالپى قۇنى 8,1 ملرد اقش دوللارىن قۇرايتىن 46 جوبا ىسكە اسىرىلعان. ولاردىڭ كوبى اۆتوموبيل جولدارى, ءبىلىم بەرۋ, دەنساۋلىق ساقتاۋ, يننوۆاتسيا, ورتا جانە شاعىن كاسىپكەرلىك سەكىلدى ماڭىزدى سالالاردى قولداۋعا باعىتتالعان. مەملەكەتتىك حاتشى بۇگىنگە دەيىنگى بىرلەسە اتقارىلعان جۇمىستار ناتيجەلى بولعانىن اتاپ ءوتىپ, بۇل سالاداعى ارىپتەستىك ءارى قاراي جالعاساتىنىنا سەنىم ءبىلدىردى.
– وسىدان بىرنەشە جىل بۇرىن بيزنەستى دامىتۋعا, الەۋمەتتىك سالانى وركەندەتۋگە قاتىستى دۇنيەجۇزىلىك بانكپەن بىرقاتار كەلىسىمدەر جاسالعان بولاتىن. سولاردىڭ بارلىعى ساتىمەن جۇزەگە اسىرىلىپ جاتىر. بۇگىندە قازاقستان ءۇشىنشى جاڭعىرۋعا قادام باستى. ەلىمىز ەكونوميكانىڭ جەدەلدەتىلگەن تەحنولوگيالىق جاڭعىرتىلۋىنا, تسيفرلى تەحنولوگيانى قولدانۋ ارقىلى قۇرىلاتىن جاڭا يندۋستريالاردى وركەندەتۋگە ەرەكشە كوڭىل ءبولىپ وتىر. مەملەكەت دامۋىنداعى مۇنداي ماڭىزدى مىندەتتەردى جۇزەگە اسىرۋعا دۇنيەجۇزىلىك بانك تە وزىندىك ۇلەسىن قوسىپ, قولداۋ بىلدىرەتىنىنە كۇمانىمىز جوق, – دەدى گۇلشارا ابدىقالىقوۆا.
ءوز كەزەگىندە اتو براۋن بۇل كەزدەسۋدىڭ ماڭىزى ۇلكەن ەكەنىن اتاپ ءوتتى. ونىڭ ايتۋىنشا, بيىل 2012-2017 جىلدارعا ارنالعان ىنتىماقتاستىق جونىندەگى ستراتەگيالىق قۇجات قورىتىندىلانىپ وتىر. كەلەسى جىلدان باستاپ, ەكىجاقتى ارىپتەستىك قارىم-قاتىناس جاڭا دەڭگەيگە كوتەرىلىپ, بايلانىس سالالارىنىڭ اۋقىمى كەڭەيە تۇسپەك.
دۇنيەجۇزىلىك بانك قازاقستاننىڭ ءۇشىنشى جاڭعىرۋىن جانە وسى ماقساتتى جۇزەگە اسىرۋ جولىنداعى باسىم باعىتتاردى قولداۋعا ءاردايىم دايىن. «قازاقستان 2050 جىلعا قاراي الەمدەگى الدىڭعى قاتارلى 30 مەملەكەتتىڭ قاتارىنا قوسىلۋعا تالپىنىپ وتىر. سونداي-اق, جاسىل ەكونوميكانى دامىتۋعا, بالامالى ەنەرگيا كوزدەرىن وندىرۋگە دەگەن ىقىلاسى دا جوعارى. ءبىز ءوز تاراپىمىزدان قازاقستاننىڭ باسەكەگە قابىلەتتىلىگىن ارتتىرۋعا, ەكسپورت كولەمىن ۇلعايتۋعا, تىكەلەي ينۆەستيتسيا تارتۋعا قولۇشىن بەرەتىن بولامىز. قازىردىڭ وزىندە ەنەرگيا ۇنەمدەۋدى ارتتىرۋ باعىتىنداعى جالپى سوماسى 24 ملن اقش دوللارىن قۇرايتىن جوبا جۇزەگە اسىرىلىپ جاتىر. الداعى ۋاقىتتا ەنەرگەتيكا مينيسترلىگىمەن بىرلەسىپ, تاعى بىرقاتار جاڭا باستامالاردى تالقىلاۋدى جوسپارلاۋدامىز», دەدى دۇنيەجۇزىلىك بانكتىڭ قازاقستانداعى تۇراقتى وكىلى.
كەزدەسۋدىڭ سوڭىندا مەملەكەتتىك حاتشى گۇلشارا ابدىقالىقوۆا ەكىجاقتى ىنتىماقتاستىقتىڭ قازىرگى قارقىنىنا ريزاشىلىعىن بىلدىرە كەلە, دۇنيەجۇزىلىك بانكتىڭ ەل ەكونوميكاسىنىڭ تۇراقتى ءوسىمىن قامتاماسىز ەتۋ جولىنداعى ەڭبەگىن جوعارى باعالادى.
قىمبات توقتامۇرات, «ەگەمەن قازاقستان»