ەندى, بيىلعى تەستىلەۋ سىناعىنىڭ نەگىزگى ەرەكشەلىكتەرىنە تاعى ءبىر مارتە توقتالايىق. ەڭ الدىمەن, ۇلتتىق بىرىڭعاي تەستىلەۋ 5 ءپان بويىنشا تاپسىرىلادى. اتاپ ايتقاندا, قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى (20 تاپسىرمادان, شەكتى دەڭگەيى – ءار پاننەن كەمىندە 5 بالدان) جانە تاڭداعان ماماندىققا سايكەس 2 بەيىندى پاننەن (30 تاپسىرمادان, شەكتى دەڭگەيى 15 بالدان كەم بولماۋى ءتيىس) تاپسىرادى. 120 تەستىلەۋ تاپسىرماسى بويىنشا تۇلەك ماكسيمالدى 140 بالل جيناي الادى. تاپسىرمالاردى ورىنداۋعا 3 ساعات 50 مينۋت ۋاقىت بولىنەدى.
ۇلتتىق تەستىلەۋ ورتالىعىنىڭ مالىمەتىنشە, بيىل ۇبت-عا قاتىسۋعا 92 827 تۇلەك نيەت ءبىلدىرىپ, ءوتىنىش جازعان. ولار بيىلعى مەكتەپ بىتىرۋشىلەردىڭ (131 377) 71 پايىزىن قۇرايدى. ۇبت تاپسىرۋعا نيەتتى 69 209 تۇلەك قازاق تىلىندە, ال 23 618 مەكتەپ ءبىتىرۋشى ورىس تىلىندە تاپسىرادى. ۇبت 165 تاپسىرۋ پۋنكتىنىڭ 1431 اۋديتورياسىندا وتكىزىلەدى. بۇل اۋديتوريالار بايلانىس سيگنالدارىن بوگەيتىن قۇرىلعىلارمەن, مەتالل دەتەكتورلارىمەن, ۇبت بارىسىن باقىلاۋ جانە جازۋ بەينەكامەرالارىمەن, سونداي-اق ينتەرنەت ارقىلى ونلاين تاراتۋ كامەرالارىمەن جابدىقتالعان.
اتا-انالارعا ىڭعايلىلىقتى قامتاماسىز ەتۋ ماقساتىندا 108 پۋنكتتەگى ۇبت بارىسى مونيتورعا شىعارىلىپ, كورسەتىلەدى. ادەتتەگىدەي, ۇبت وتكىزۋ ورىندارىندا مەديتسينالىق قىزمەت پەن قۇقىق قورعاۋ ورگاندارىنىڭ وكىلدەرى جۇمىس ىستەپ, اۋىز سۋ جانە تاعام ونىمدەرىن ساتۋ ورىندارى قىزمەت كورسەتەدى.
ۇبت-نىڭ بەلگىلەنگەن ءتارتىپ بويىنشا وتكىزىلۋى مەن ەرەجەلەردىڭ ورىندالۋىن قاداعالاۋ ءۇشىن تەستىلەۋ وتكىزىلەتىن پۋنكتتەرگە ءبىلىم جانە عىلىم مينيسترلىگى تاراپىنان جوعارى وقۋ ورىندارى (75%) جانە كوللەدجدەردىڭ (25%) وقىتۋشىلارى جىبەرىلدى. ۇيىمداستىرۋ ماسەلەلەرىن شەشۋ ءۇشىن وڭىرلەردە جەرگىلىكتى جوعارى وقۋ ورىندارىنىڭ, ءبىلىم بولىمدەرىنىڭ, اكىمدىكتەردىڭ, قۇقىق قورعاۋ ورگاندارىنىڭ, قوعامدىق ۇيىمدار مەن باق وكىلدەرىنەن قۇرالعان مەملەكەتتىك كوميسسيالاردى قۇرۋ قولعا الىندى.
ءبىلىم جانە عىلىم ءمينيسترىنىڭ بۇيرىعىمەن تەستىلەۋ تاپسىرمالارى مەن تەحنيكالىق اقاۋلىقتار جونىندەگى اپەللياتسيالىق ارىزداردى قاراستىراتىن رەسپۋبليكالىق اپەللياتسيالىق كوميسسيامەن قاتار جەر-جەردە اپەللياتسيالىق كوميسسيالار كۇرىلدى. اپەللياتسيالىق ارىزدار ۇبت ناتيجەلەرى جاريالانعاننان كەيىنگى كۇنى ساعات 13.00-گە دەيىن قابىلدانىپ, ءبىر كۇنتىزبەلىك كۇن ىشىندە قاراستىرىلادى.
بيىل تەستىلەۋگە ساپالى دايىندىق جۇرگىزۋ ءۇشىن قاجەتتى جاعداي جاسالعان. ۇيرەنشىكتى, ياعني قاعاز بەتىندە قابىلدانىپ كەلگەن سىناق- تىق تەستىلەۋمەن قاتار, ونلاين-تەستىلەۋدەن ءوتۋ مۇمكىندىگى اشىلدى. ال ماۋسىم ايىنان باستاپ اتالعان قىزمەت ءۇشىن اقى تولەۋ ينتەرنەت-بانكينگ ارقىلى جۇرگىزىلە باستادى. بۇل وپەراتسيانى كەز كەلگەن بانك كارتاسى ارقىلى ورىنداۋعا بولادى ءارى كوميسسيالىق پايىز ۇستالمايدى. مينيسترلىكتىڭ ءباسپاسوز قىزمەتىنىڭ ايتۋىنشا, كوميسسيا ماتەريالدارى قۇپيالىلىقتى قامتاماسىز ەتۋ نۇسقاۋلىعىنىڭ قاتاڭ تالاپتارى بويىنشا 99 مىڭ دانا تارالىممەن باسىلىپ شىققان.
دۋماش اناش, «ەگەمەن قازاقستان»