ءىس-شاراعا «حالىقارالىق باعدارلامالار ورتالىعى» اق ۆيتسە-پرەزيدەنتى مەيىرجان الپىسباي, «حالىقارالىق باعدارلامالار ورتالىعى» اق ۆيتسە-پرەزيدەنتى زۋلفيا تورەبەكوۆا جانە كونكۋرستىق راسىمدەردى ۇيىمداستىرۋ دەپارتامەنتىنىڭ ديرەكتورى ايمان اۋباكىروۆا قاتىستى.
مەيىرجان الپىسباي سويلەگەن سوزىندە اتاپ وتكەندەي, جاڭا ەكونوميكالىق ساياسات پەن مەملەكەتتى جاڭعىرتۋ باسىمدىقتارى جاعدايىندا قازاقستان ءۇشىن ەلدىڭ ساپالى الەۋەتىن ارتتىرۋ جانە ءتيىمدى كاسىبي رەسۋرستى قالىپتاستىرۋ ەرەكشە ماڭىزعا يە بولىپ وتىر. وسىعان بايلانىستى, «بولاشاق» حالىقارالىق ستيپەندياسى ارقىلى وزىق تاجىريبە مەن ءبىلىمدى ۇلگى الۋ رەسپۋبليكادا باستالعان جاڭعىرتۋدىڭ ءۇشىنشى تولقىنى تۇرعىسىنان دا باسىم بولىپ قالاتىنىن مەكەمە باسشىسى اتاپ ءوتتى.
مەيىرجان الپىسباي وكق-داعى بريفينگتە سويلەگەندە: «بولاشاق» حالىقارالىق ستيپەندياسى ءبىلىم بەرۋ سالىسىنداعى قازاقستاندىق العاشقى سەرپىلىستى جوبالاردىڭ ءبىرى بولىپ, كاسىبي مامانداردى دايارلاۋ جۇيەسى رەتىندە ەلدىڭ كادرلارداعى ءوسىپ كەلە جاتقان قاجەتتىلىكتەرىنە تولىق بەيىمدەلۋگە ۇمتىلۋدا. باعدارلاما ماڭىزى «100 ناقتى قادام» ۇلت جوسپارىنىڭ ينستيتۋتتىق رەفورمالارى, ەلدىڭ يندۋستريالدى-يننوۆاتسيالىق دامۋى جانە مەملەكەت باسشىسىنىڭ «جاڭعىرتۋ 3.0» جولداۋىندا بەلگىلەنگەن «ادامي كاپيتال ساپاسىن جاقسارتۋ» بويىنشا مىندەتتەر اياسىندا نىعايادى, – دەپ اتاپ ءوتتى.
ءبىلىم جانە عىلىم مينيسترلىگى «100 ناقتى قادام» ۇلت جوسپارى مەن «جاڭعىرتۋ 3.0» ىسكە اسىرۋ شەڭبەرىندە «بولاشاق» ستيپەندياسىن اكىمشىلەندىرۋدىڭ بىرقاتار نەگىزگى پارامەترىن قايتا قاراستىردى.
23 مامىردا قازاقستان رەسپۋبليكاسى ۇكىمەتىنىڭ قاۋلىسىمەن «بولاشاق» ستيپەندياسىنا ۇمىتكەرلەردى ىرىكتەۋدىڭ داڭا قاعيدالارى قابىلداندى, سونداي-اق كونكۋرستىق ىرىكتەۋ راسىمىنە وزگەرىستەر ەنگىزىلدى.
ءبىرىنشى. IELTS 6.5 جانە ودان جوعارى سەرتيفيكاتى, سونداي-اق GPA 3.3 جانە ودان جوعارى ديپلومى بار تۇلعالار ءۇشىن «جالپى كونكۋرس» جاڭا ساناتى ەنگىزىلدى. ۇمىتكەرلەردىڭ وسى ساناتى ءۇشىن جۇمىس ءوتىلى مەن جۇمىس بەرۋشى ءوتىنىمىنىڭ بولۋىنا تالاپ قويىلمايدى. وسى سانات ماگيستر دارەجەسىن الۋ ءۇشىن ستيپەندياتتاردىڭ باسقا ساناتتارىمەن قاتار, 2 ايعا دەيىنگى مەرزىمدە وقۋ الدىنداعى دايارلىقتان (pre-master's) ءوتۋ مۇمكىندىگىن بەرەدى.
ەكىنشى. اكادەميالىق باعدارلامالار (ماگيستراتۋرا, دوكتورانتۋرا, رەزيدەنتۋرا) ءۇشىن ۇمىتكەرلەردىڭ بارلىق ساناتتارىنا باكالاۆر نەمەسە مامان ديپلومىنىڭ ورتاشا بالىنا قويىلاتىن تالاپتار 3.0-دەن 3.3 (4.0/4.33-تەن) GPA دەڭگەيىنە دەيىن وزگەرتىلدى.
ءۇشىنشى. «ماگيستراتۋرا» باعدارلاماسى بويىنشا ۇمىتكەرلەردىڭ بارلىق ۇلەستىك ساناتتارى ءۇشىن اعىلشىن ءتىلىن مەڭگەرۋ دەڭگەيىنىڭ ولشەمشارتتارى IELTS جۇيەسى بويىنشا 5.0 بالدان 5.5 بالعا دەيىن كوتەرىلدى. سونىمەن, «ينجەنەرلىك-تەحنيكالىق ماماندىق» ساناتى بويىنشا ۇمىتكەرلەرگە قويىلاتىن تالاپتار بۇرىنعى دەڭگەيدە – IELTS 5.0 قالادى.
ءتورتىنشى. ستيپەنديا تاعايىنداۋ ءۇشىن ۇمىتكەرلەردى كونكۋرستىق ىرىكتەۋ راسىمىنە وزگەرىستەر ەنگىزىلدى. 2017 جىلدان باستاپ كونكۋرس 6 (التى) كەزەڭنەن تۇراتىن بولادى:
ءبىرىنشى كەزەڭ – ۇمىتكەرلەردى ۋاجدەمەلىك جانە ۇسىنىم حاتتار بويىنشا ازىرلەنگەن ولشەمشارتتارعا سايكەس الدىن الا ىرىكتەۋ.
ەكىنشى كەزەڭ – ۇمىتكەردىڭ شەت ءتىلىن بىلۋى دەڭگەيىن انىقتاۋ.
ءۇشىنشى كەزەڭ – ۇمىتكەردىڭ مەملەكەتتىك ءتىلدى بىلۋى دەڭگەيىن انىقتاۋ.
ءتورتىنشى كەزەڭ – ۇمىتكەرلەردى پسيحولوگيالىق دياگنوستيكادان وتكىزۋدى, قازاقستان رەسپۋبليكاسى كونستيتۋتسياسى مەن تاريحىن ءبىلۋىن تەستىلەۋدى قامتيتىن كەشەندى تەستىلەۋ.
بەسىنشى كەزەڭ – تاۋەلسىز ساراپاتامالىق كوميسسيامەن جەكە اڭگىمەلەسۋ, وندا ۇمىتكەرلەردىڭ كاسىبي دايارلىعى دەڭگەيى, سونداي-اق ماماندانۋ بويىنشا قازاقستان رەسپۋبليكاسىنىڭ ستراتەگيالىق جانە باعدارلامالىق قۇجاتتارىن ءبىلۋى باعالانادى.
التىنشى كەزەڭ – قر مەملەكەتتىك حاتشىسى توراعالىق ەتەتىن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ قورىتىندى ماتەريالداردى قاراۋى.
تاعىلىمدامادان ءوتۋ جوىنىدە. شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ 2017 جىلعى 13 ناۋرىزداعى شەشىمىنە سايكەس باعدارلاما شەڭبەرىندە تاعىلىمدامادان ءوتۋ ۇشىن «عىلىمي قىزمەتكەرلەر» جانە «استانا» حالىقارالىق قارجىلىق ورتالىعى قىزمەتكەرلەرى» ساناتتارى بەلگىلەندى.
التىنشى. جۇمىس وتەلىمىنىڭ وڭىردە 3 جىلدىق بالامالى مەرزىمىمەن, استانا مەن الماتى قالالارىنداعى جۇمىس وتەلىمىنىڭ 5 جىلىنىڭ ورنىنا, «ورتالىق-وڭىر» ۇلگىسى بويىنشا سارالانعان تەتىگى ەنگىزىلدى. وسى تەتىك تۇلەكتەردىڭ بارلىق ساناتتارىنا قاتىستى.
«بولاشاق» حالىقارالىق ستيپەندياسى 1993 جىلى 5 قاراشادا قازاقستان رەسپۋبليكاسى پرەزيدەنتى ن.ءا. نازارباەۆتىڭ قاۋلىسىمەن جاريالاندى. 24 جىل ىشىندە ەكونوميكا جانە الەۋمەتتىك سالا سەكتورلارىنداعى ۇلتتىق ەڭبەك نارىعى ۇشىن «بولاشاق» باعدارلاماسى بويىنشا 9,5 مىڭنان استام جوعارى بىلىكتى مامان دايارلاندى, ونىڭ ىشىندە ەل وڭىرلەرى ءۇشىن 4000 ينجەنەرلىك-تەحنيكالىق قىزمەتكەر, 2000 استام ءبىلىم سالاسىنداعى مامان جانە شامامەن 700 جوعارى بىلىكتى دارىگەر.