پورتۋگاليا بيلىگىنىڭ حابارلاۋىنشا, ورتەنگەن كولىكتەردەن 30, جول ماڭىنان 17, كويمبرا قالاسىنىڭ ماڭىنداعى پەدروگان-گراندي كەنتىنەن 11, باسقا جەرلەردەن تاعى بىرنەشە ادامنىڭ دەنەسى تابىلدى. قازا تاپقانداردىڭ ىشىندە ءتورت بالا بار. ۇكىمەت باسشىسى انتونيۋ كوشتانىڭ ايتۋىنشا, قازا تاپقانداردىڭ سانى ارتۋى مۇمكىن.
شەتەلدىك باسىلىمداردىڭ حابارلاۋىنشا, 60 ادامدى ءارتۇرلى دەڭگەيدەگى كۇيىك شالعان. وقيعا ورنىنا جۇزدەن استام ءورت كولىگى, اۆياتسيا, مىڭداعان قۇتقارۋشى مەن ءورت ءسوندىرۋشى جۇمىلدىرىلعان. بىراق ءورت ءبىر ۋاقىتتا 4 باعىت بويىنشا جىلدام تاراۋدا. سول سەبەپتى قالعان ەلدى مەكەندەردى ورتتەن ساقتاۋ ءۇشىن ادام جەتىسپەۋى مۇمكىن, دەيدى ۆۆس.
پرەمەر مينيستر بۇل وقيعانى ۇلكەن تراگەديا دەپ اتادى. ال پورتۋگاليا پرەزيدەنتى مارسەلۋ رەبەلۋ دي سوزا اپات ورنىنا بارىپ, قازا تاپقانداردىڭ وتباسىمەن كەزدەسۋدە.
پورتۋگاليا ءورت ءجيى بولاتىن وڭىرگە جاتادى. قازىردىڭ وزىندە بۇل ەلدە اۋا تەمپەراتۋراسى 40 گرادۋستان جوعارى بولىپ تۇر. ءبىر ايتا كەتەرلىگى, بىلتىر ءتىلسىز جاۋعا 4 مىڭ ءورت ءسوندىرۋشى مەن 26 ۇشاق جۇمىلدىرىلعان.