جەكسەنبىدەن دۇيسەنبىگە قاراعان ءتۇنى استاناعا «دۋشانبە-استانا» باعىتىنداعى العاشقى جولاۋشىلار پويىزى كەلدى, دەپ حابارلايدى «جولاۋشىلار تاسىمالى» اق ءباسپاسوز قىزمەتى.
ايتا كەتكەن ءجون, بۇدان بۇرىن قازاقستان مەن تاجىكستان استانالارىنىڭ اراسىنداعى تىكەلەي تەمىرجول باعىتى بولماعان ەدى.
بۇل مارشرۋت «ەكسپو-2017» كورمەسىن وتكىزۋ كەزەڭىندە ءتۋريزمدى دامىتۋعا ءوزىنىڭ ۇلەسىن قوساتىن بولادى. پويىزدى ىسكە قوسۋ شەشىمى «قازاقستان تەمىر جولى» ۇك» اق مەن «تاجىك تەمىر جولى» مبك باسشىلارىنىڭ اراسىنداعى كەلىسىمگە سايكەس قابىلداندى.
حالىقارالىق پويىز باعىتى تاجىكستان مەن قاراقالپاقستاننان كەيىن بەينەۋ-سەكسەۋىل-جەزقازعان جاڭا جولدارىن قامتىپ, وسى باعىتتاعى جولاۋشىلار اينالىمىن ۇلعايتۋعا مۇمكىندىك بەرەدى.
پويىز 9 ۆاگوننان تۇرادى جانە دۋشانبەدەن بەيسەنبى كۇنى, ال «استانا-نۇرلى جولدان» دۇيسەنبى كۇندەرى جولعا شىعادى.