سپيكەردىڭ سوزىنشە, بيىل تۇلەكتەر ۇبت-نى 5 ءپان بويىنشا تاپسىرادى. «قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى 20 تاپسىرمادان, شەكتى دەڭگەيى – ءار پاننەن كەمىندە 5 بالدان جانە تاڭدالعان ماماندىققا سايكەس 2 بەيىندى پاننەن 30 تاپسىرمادان, شەكتى دەڭگەيى 15 بالدان كەم بولماۋى ءتيىس. 120 تەستىلەۋ تاپسىرماسى بويىنشا تۇلەك ماكسيمالدى 140 بالل الۋى مۇمكىن. تاپسىرمالاردى ورىنداۋعا 3 ساعات 50 مينۋت ۋاقىت بولىنەدى», دەدى دارحان احمەت-زاكي. ۇلتتىق تەستىلەۋ ورتالىعىنىڭ مالىمەتىنشە, بيىل ۇبت-عا قاتىسۋعا 92 827 تۇلەك نيەت ءبىلدىرىپ, ارىز جازعان. «ولار بيىلعى مەكتەپ بىتىرۋشىلەردىڭ جالپى سانىنىڭ 71 پايىزىن قۇراپ وتىر. ۇبت تاپسىرۋعا نيەتتى 69 209 تۇلەك قازاق تىلىندە, ال 23 618 تۇلەك ورىس تىلىندە تاپسىرادى. ۇبت 165 تاپسىرۋ پۋنكتىنىڭ 1431 اۋديتورياسىندا وتكىزىلەدى. بۇل اۋديتوريالار بايلانىس سيگنالدارىن بوگەيتىن قۇرىلعىلارمەن, مەتالل دەتەكتورلارىمەن, ۇبت بارىسىن باقىلاۋ جانە جازۋ بەينەكامەرالارىمەن, سونداي-اق ينتەرنەت ارقىلى ونلاين تاراتۋ كامەرالارىمەن جابدىقتالعان», دەدى دەپارتامەنت ديرەكتورى. سونداي-اق, اتا-انالارعا ىڭعايلى جاعداي قامتاماسىز ەتۋ ماقساتىندا 108 پۋنكتتەگى ۇبت بارىسى مونيتورعا شىعارىلىپ, كورسەتىلەدى. ادەتتەگىدەي, ۇبت وتكىزۋ ورىندارىندا مەديتسينالىق قىزمەت پەن قۇقىق قورعاۋ ورگاندارىنىڭ وكىلدەرى جۇمىس ىستەپ, اۋىز سۋ جانە تاعام ونىمدەرىن ساتۋ ورىندارى قىزمەت كورسەتەدى. «ۇبت بەلگىلەنگەن ءتارتىپ بويىنشا وتكىزىلۋى مەن ەرەجەلەردىڭ ورىندالۋىن قاداعالاۋ ءۇشىن تەستىلەۋ وتكىزىلەتىن پۋنكتتەرگە ءبىلىم جانە عىلىم مينيسترلىگى تاراپىنان جانە كوللەدجدەردىڭ وقىتۋشىلارى جىبەرىلدى. ۇيىمداستىرۋ ماسەلەلەرىن شەشۋ ءۇشىن ەل وڭىرلەرىندە جەرگىلىكتى جوو-نىڭ, ءبىلىم بولىمدەرىنىڭ, اكىمشىلىكتەردىڭ, قۇقىق قورعاۋ ورگاندارىنىڭ, قوعامدىق ۇيىمدار مەن باق وكىلدەرىنەن قۇرالعان مەملەكەتتىك كوميسسيالاردى قۇرۋ قولعا الىندى», دەيدى دەپارتامەنت باسشىسى. سونىمەن قاتار, ول مينيسترلىكتىڭ بۇيرىعىمەن تەستىلەۋ تاپسىرمالارى مەن تەحنيكالىق اقاۋلىقتار جونىندەگى اپەللياتسيالىق ارىزداردى قاراستىراتىن رەسپۋبليكالىق اپەللياتسيالىق كوميسسيامەن قاتار, جەر-جەردە اپەللياتسيالىق كوميسسيالار كۇرىلعانىن اتاپ ءوتتى. ء«تارتىپ بۇرىنعىداي, اپەللياتسيالىق ارىزدار ۇبت ناتيجەلەرى جاريالانعاننان كەيىنگى كۇنى ساعات 13.00-گە دەيىن قابىلدانىپ, ءبىر كۇنتىزبەلىك كۇن ىشىندە قاراستىرىلادى», دەيدى د.احمەت-زاكي. ايتا كەتەتىن جايت, ەمتيحان ماتەريالدارى قۇپيالىقتى قامتاماسىز ەتۋ نۇسقاۋلىعىنىڭ قاتاڭ تالاپتارىمەن, 99 مىڭ دانا تارالىممەن باسىلىپ, بۋىلعان.
راۋان قايدار, «ەگەمەن قازاقستان»