مەملەكەتتىك ورگان باسشىسى ءسوزىنىڭ القيساسىن حالىقارالىق كورمە حاقىندا باستادى. ول ورىندى دا. سەبەبى, شەكارامىزدى اتتاپ, شەتەل اسىپ كەلىپ جاتقان قوناقتاردىڭ ءبىرى ەكونوميكامىزدى باقىلاپ كەلسە, ەندى ءبىرى مادەني احۋالىمىزعا كوز جۇگىرتەرى انىق. «قازىرگى ۋاقىتتا الەمنىڭ بار نازارى ءبىزدىڭ ەلوردامىز استاناعا اۋىپ وتىرعان شاق. ەلىمىزدىڭ تاريحىندا تۇڭعىش رەت ءوتىپ جاتقان اۋقىمدى دا, ماڭىزدى وقيعاعا الەمنىڭ تۇكپىر-تۇكپىرىنەن كەلىپ جاتقان قوناقتاردى قارسى الىپ وتىرمىز. بارلىق كەلۋشىلەر ەكسپو-نىڭ مادەني باعدارلامالارىنا بەلسەندى تۇردە قاتىسادى جانە كورمەنىڭ كەرەمەت مازمۇندى شىعارماشىلىق باعدارلامالارىنان ءلاززات الۋعا, قازاقستان حالقىنىڭ بىرەگەي وزىندىك تاريحي مۇرالارىمەن, ونىڭ قازىرگى زامانعى جەتىستىكتەرىمەن تانىسۋعا مۇمكىندىك الادى. تەك وتكەن كۇندەردىڭ وزىندە ەكسپو-عا ارنايى سالىنعان «ەتنواۋىل» ۇلتتىق-مادەني كەشەنىن بىرنەشە مىڭنان استام ادام تاماشالاعان. «نون-ستوپ» رەجىمىندە جۇمىس ىستەيتىن «ەتنواۋىلدا» قازاق حالقىنىڭ ساندىك-قولدانبالى ونەرى, ۇلتتىق سپورت, ءداستۇرلى اڭشىلىقتىڭ تۇرلەرى, ۇلتتىق تاعامدار, سونىڭ ىشىندە قازاقستان حالقى اسسامبلەياسىنىڭ اسحانالارى, وڭىرلەردىڭ مادەني كۇندەرى جانە تاعى باسقالار ۇسىنىلادى. العاش رەت «ەتنواۋىل» اۋماعىندا Nomad Way ەتنومۋزىكا فەستيۆالى بولدى. ەرتەڭ قۇرمانعازى اتىنداعى ءداستۇرلى ورىنداۋشىلار كونكۋرسىنىڭ گالا-كونتسەرتى وتەدى. «ەتنواۋىل» تۇتاس ءۇش اي بويى جۇمىس ىستەيدى, ءارى قاراي ونى تۇراقتى وتكىزۋدى داستۇرگە اينالدىرۋدى جوسپارلاپ وتىرمىز», دەدى مينيستر. سونىمەن قاتار, ول 11 ماۋسىمدا قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ جۇلدەسىنە ات سپورتى تۇرلەرىنەن «ەكسپو كۋبوگى» وتكەنىن تىلگە تيەك ەتتى. «جارىس جوعارى دەڭگەيدە ءوتتى. ەلىمىزدەن بولەك, رەسەي قىرعىزستان, وزبەكستان, پولشادان قاتىسۋشىلار كەلدى. ايتا كەتەيىك, مادەنيەت جانە سپورت مينيسترلىگى ەكسپو-2017 حالىقارالىق مامانداندىرىلعان كورمەسى اياسىندا حالىقارالىق دەڭگەيدەگى 18 اۋقىمدى سپورتتىق شارا ۇيىمداستىرادى. ەلىمىزدىڭ وڭىرلەرى دە سپورتتىق جارىستاردان قالىس قالمايدى. حالىقارالىق كورمە اياسىندا قازاقستاننىڭ 14 وبلىسىندا 20-دان استام سپورتتىق سايىس وتكىزىلەدى», دەدى ا.مۇحامەدي ۇلى. جيىن بارىسىندا ۆەدومستۆو باسشىسى وتكەن جىلدىڭ وزەكتى تۇستارىنا شولۋ جاساپ, 2016 جىلدان باستاپ مينيسترلىك تاراپىنان 160-تان استام نورماتيۆتىك-قۇقىقتىق اكتىلەر ازىرلەنگەنىن, «مادەنيەت تۋرالى», «دەنە شىنىقتىرۋ جانە سپورت تۋرالى» زاڭدار جاڭارتىلعانىن, «لوتەرەيالار جانە لوتەرەيا قىزمەتى تۋرالى» جاڭا زاڭ جوباسى قابىلدانعانىن, «ارحيۆ ءىسى ماسەلەلەرى تۋرالى» جانە «كينەماتوگرافيا تۋرالى» زاڭداردىڭ جوبالارى دايىندالعانىن ايتىپ ءوتتى. بەيجىڭ, لوندون, ريو-دە-جانەيرو وليمپيادالارىندا سپورتشىلارىمىز تولاعاي تابىستارعا قول جەتكىزگەنى سپورت سالاسىنداعى جۇيەلى جۇمىستاردىڭ ناتيجەسى دەۋگە بولادى. ءيا, بىلتىر عانا وتكەن XXVIII قىسقى دۇنيەجۇزىلىك ۋنيۆەرسيادا دا ەلىمىز العاش رەت قىتاي, جاپونيا, كورەيا, فرانتسيا سىندى مەملەكەتتەردى باسىپ وزىپ, 2-ءشى ورىنعا كوتەرىلدى. بۇل ميلليونداعان قازاقستاندىق ءۇشىن سپورتپەن اينالىسۋعا جانە سالاۋاتتى ءومىر سالتىن قولداۋعا باستى سەبەپ بولىپ, جاڭا سەرپىن بەرگەنى ءسوزسىز. بايانداما بارىسىندا ارىستانبەك مۇحامەدي ۇلى قانات يسلام, گەننادي گولوۆكين, جانقوش تۇراروۆ سياقتى قازاقتىڭ اتىن شىعارىپ, ابىرويىن اسىرعان سپورتشىلار سپورت سالاسىنا عانا ەمەس, ەلىمىزدىڭ داڭقىن كوتەرۋدە دە سۇبەلى ۇلەس قوسقانىن اتاپ ءوتتى. پ.ي.چايكوۆسكي اتىنداعى ح حالىقارالىق جاسوسپىرىمدەر بايقاۋى, «شامبالانى ىزدەۋ جولىندا: نيكولاي رەريحتىڭ نيۋ-يوركتەگى مۋزەيىنەن الىنعان جاۋھارلار» اتتى كورمەسى, «سۇلتان بەيبارىس جانە ونىڭ ءداۋىرى» كورمەسى, يتاليالىق كومپوزيتور دج.ۆەرديدىڭ «ايدا» وپەراسى, «رومەو مەن دجۋلەتتا» ميۋزيكلى, «قىتايدىڭ تسين شيحۋاندي يمپەراتورىنىڭ تەرراكوتا اسكەرى» اتتى كورمەسى, ە.برۋسيلوۆسكيدىڭ «قىز جىبەك» وپەراسى, ل.مينكۋستىڭ «دون كيحوت» بالەتى وسى جانە وزگە دە كونتسەرتتىك باعدارلامالاردىڭ بارلىعى ەكسپو-2017 حالىقارالىق كورمەسىنىڭ اياسىندا ۇيىمداستىرىلاتىنىن ايتا كەتسەك دەيمىز. ءسوز سوڭىندا مادەنيەت جانە سپورت ءمينيسترى ەكسپو-نىڭ تۇتاس ءوتۋ كەزەڭىندە مينيسترلىكپەن 1400-دەن استام مادەني جانە سپورتتىق ءىس-شارانى وتكىزۋ جوسپارلانعانىن جەتكىزدى. «جالپى بارلىق ءىس-شارالار تۋرالى حابارلاندىرۋلار ۇزدىكسىز تۇردە جاريالانىپ وتىرادى. ەكسپو-نىڭ تۇتاس ءوتۋ كەزەڭىندە مينيسترلىك تاراپىنان 1400-دەن استام مادەني جانە سپورتتىق ءىس-شارانى وتكىزۋ جوسپارلانعان. بارلىق مادەني نىساندار مەن سپورتتىق الاڭدار ۇزدىكسىز جۇمىس ىستەۋدە. كوپتەگەن ءىس-شارالارعا بيلەتتەر ولاردىڭ باستالۋىنان بۇرىن ساتىلىپ كەتكەن. مۇنىڭ ءوزى الەمگە قازاقستاندىق مادەنيەت پەن سپورتتىڭ زور مۇمكىندىكتەرىن اشىپ كورسەتەدى», دەدى ارىستانبەك مۇحامەدي ۇلى.
قازاقستاننىڭ قاتاردان قالماي, قارقىندى دامۋى جولىندا مادەنيەت پەن سپورتتىڭ قوسار ۇلەسى قوماقتى. قوس سالانىڭ وتكەن جىلعى اتقارعان ايشىقتى ىستەرى مەن الداعى كۇنگە قويعان ماڭىزدى مىندەتتەرى جايىندا مادەنيەت جانە سپورت ءمينيسترى ارىستانبەك مۇحامەدي ۇلى حالىق الدىندا ەسەپ بەرۋ كەزدەسۋىن وتكىزىپ, كەڭىنەن باياندادى.